I-ca-yaa 44 - RUAC KUƆTH IN RƐL RƆ

Kuoth Nhial ɛ jɛn la Kuoth ɔ kärɔa

¹ Cu Kuoth Nhial wee i̱, “Liŋɛ täämɛ lö ja̱ŋdä ni Je-kɔb, ji̱n I-thɛ-rɛl in cä mɛk!

² Nɛmɛ ɛ jɛn min ci Kuoth Nhial, in cak ji̱ ni jic min bi ji̱ luäk. /Cu dual lö ja̱ŋdä ni Je-kɔb, ji̱n Yɛ-cu-run in cä mɛk.

³ Kɛ ɣöö ɣän bä pi̱w wuɔc muun rɛ̈w, kä bä dɔr rɛ̈w moc kɛ löli pi̱i̱ni. Ɣän bä yiëëdä wuɔ̱c kuaykun, kä bi puɔ̱thdä tekɛ gaatkun.

⁴ Bikɛ piith ce̱tnikɛ juaac ti te rɛy pi̱i̱ni, ce̱tnikɛ jiɛn tin te thok kiɛɛr.

⁵ Kä bi ram kɛl a wee i̱, ‘Ɛ ɣän raan Kuɔth Nhial,’ kä ba ram in dɔ̱ŋ cɔl kɛ ciöt Je-kɔb, kä ŋotdɛ bi ram ɔ tetdɛ gɔ̱r i̱, ‘Kuoth Nhial,’ kä bɛ rɔ cɔli raan I-thɛ-rɛl.”

⁶ Nɛmɛ ɛ min ci Kuoth Nhial ɛ lar, Kuäär I-thɛ-rɛl kä Lueelɛ, ɛn Kuoth Nhial in la Ruey Ɣɔaa wëë i̱, “Ɛ ɣän min nhiam kä min jɔak, kä thilɛ Kuoth mi dɔ̱ŋ ɛ ni ɣän.

⁷ Kä ɛŋa mi cäät kɛ ɣä? Akɛ latkɛ jɛ, akɛ latkɛ jɛ a jɛ nööŋkɛ nhiamdä. Kä ɛŋa ŋäc mëë ci tuɔɔk ni wal ɔ lat? Akɛ latkɛ tɔ̱ ŋot ɛ bi tuɔɔkɔ.

⁸ A yɛ /cɛ lath kä /cuarɛ dual, ɣän /ka̱n nɛmɛ lat /ka̱n jɛ la̱r yɛ ni wal? Kɛ yɛn nëënkä! Tëë kɛ Kuoth mi dɔ̱ŋ mi /ci mɔ a ɣän? Kä thilɛ ram mi bum mi dɔ̱ŋ mi ŋa̱cä.”

Pal kuɔth jiaath thilɛ jɛ luɔt

⁹ Nɛy diaal tin la̱tkɛ kuth jiɛn kɛ guäy, kä tin ca la̱t thilɛ kɛ luɔt. Kä nɛy tin ruac kɛ kɛ /cikɛ gui̱c kä kui̱c kɛn ŋɔak. Kɛ kui̱c ɛmɔ bakɛ jak kä po̱c.

¹⁰ Ɛŋa mi dëë kuoth la̱t kä dëë ciik täth ala kuoth mi thilɛ mi bɛ jek thi̱n la̱t?

¹¹ Kɛn nɛy diaal tin palkɛ jɛ bakɛ jak kä po̱c, kä tin la̱tkɛ jɛ kɛ naath. Akɛ duɔlkɛ rɔ̱ kä akɛ ka̱nkɛ gua̱thkiɛn, bakɛ jak kä dual, ba kɛn diaal jak kä po̱c.

¹² Cu tääth ni bël yiëth ka̱n kä cuɛ jɛ wä täth wi̱i̱ maac, cuɛ jɛ dɛŋ kɛ dey, cuɛ jɛ duäc kɛ buɔ̱m wuɔ̱ɔ̱knikɛ. Cu mäni mëë ci buɔth ɛ näk kä cɛ buɔ̱mdɛ thuk, kä thilɛ pi̱w ti cɛ math kä ci puɔ̱nydɛ bɛ̈c.

¹³ Cu ŋäät jiɛn bëër kɛ̈k, cuɛ jɛ kɛ̈k kɛ galam jiaath, kä cuɛ jɛ ŋuɔ̱k kɛ car caarɛ, kä cuɛ jɛ thɛm kɛ theem. Cuɛ jɛ la̱t ala puɔ̱ny mi ce̱tkɛ raan, nikɛ ta̱a̱ gɔɔyä ran kä cuɛ ciɛŋ ni duel.

¹⁴ Kä cuɛ luɔ̱ɔ̱r jiɔap piny, kä cuɛ wä mɛk ni rit kiɛ dhuɔ̱ny kä cu piith nikɛn ala jiɛn ti buɔ̱m buɔ̱ɔ̱m kä jiɛn ruɔ̱ɔ̱p diaal. Kä cuɛ luɔ̱ɔ̱r pith kä cu nhiaal kɛ jak kä do̱ny.

¹⁵ Kä cuɛ cua tɔaŋ maac kä raan, cuɛ tha̱a̱ŋ jiaath la̱th maac kɛ ɣöö bɛ ɣɔ̱c kɛ jɛ, kä bulɛ jurayni kɛ macdɛ. Kä cuɛ kuoth la̱t kɛ jɛ mi palɛ, cuɛ jɛ ŋat ala puɔ̱ny mi goŋɛ rɔ nhiamdɛ.

¹⁶ Kä cuɛ tha̱a̱ŋ jiaath pɛt mac, kä thaalɛ tha̱a̱ŋdɛ mi̱ethdɛ, kä bulɛ ri̱ŋ mi camɛ, kä ɣɔ̱cɛ kɛ tha̱a̱ŋdɛ wëë i̱, “Wa̱a̱ ci puɔ̱nydä leeth, cä ɣɔ̱c kɛ mac!”

¹⁷ Kä cuɛ duɔth jiaath in dɔ̱ŋ lät ni kuoth min la kuoth jiaathdɛ, goŋɛ rɔ nhiamdɛ kä palɛ jɛ, la palɛ jɛ wëë i̱, “Kän ɣä, kɛ ɣöö ɛ ji̱n kuothdä!”

¹⁸ Kɛn thilɛ mi ŋäc kɛn ɛ, kä thilɛ kɛ ca̱r, kɛ ɣöö cikɛ wäŋkiɛn kum thilɛ mi dëë nɛn kä ci wuɔ̱thkiɛn ga̱a̱k thilɛ mi dëë ŋa̱c.

¹⁹ Thilɛ ram mi caar jɛ kiɛ mi tekɛ ŋäc mi dëë wee i̱, “Cä tha̱a̱ŋdɛ pɛt ni mac, kä cä jurayni bul kɛ mimkɛ, kä cä ri̱ŋ bul kɛ jɛ a cä jɛ cam. Ɛ bä mi jiääk ku la̱t kɛ min ci duɔth thi̱n? Ɛ dëë rɔ ku goŋ nhiam bakä jiaath?”

²⁰ Jɛn camɛ ni ŋɛ̈th, ci nyuɔɔn wecdɛ jɛ buath jɔ̱ɔ̱r, kä /cɛ rɔ dëë luäŋ kɛ ka̱n kiɛ derɛ wëë i̱, “/Ciɛ mɛ̈ɛ̈t ɛn mi te tetdä cuëëcdä mi?”

/Ka̱n I-thɛ-rɛl pa̱l ruëëc

²¹ Tim ti̱ti̱ lö Je-kɔb, kɛ ɣöö ɛ ji̱n ja̱ŋdä lö I-thɛ-rɛl, cä ji̱ cak, ɛ ji̱n ja̱ŋdä, kä lö I-thɛ-rɛl ɣän /cä ji̱ bi pa̱l ruëëc.

²² Ɣän cä dueerku lɔak jɔ̱ɔ̱r ce̱tnikɛ pua̱r, kä cä jiäku woc ce̱tnikɛ ruur, luɔ̱nyɛ kä ɣä kɛ ɣöö cä yɛ luɛl.

²³ Kiɛtdɛ diit tɛthkä lɔaac lö pua̱a̱r, kɛ ɣöö ci Kuoth Nhial nɛmɛ la̱t, kä kɛ̈tdɛ diit lö piny muɔ̱ɔ̱n, kä kɛ̈tdɛ diit lö pääm, kɛ yɛn ruɔ̱p amäni jiɛn diaal tin te thi̱n! Kɛ ɣöö ci Kuoth Nhial Je-kɔb luɛl, kä cuɛ buɔ̱mdɛ nyoth kɛ ka̱ndɛ kɛ I-thɛ-rɛl.

²⁴ Nɛmɛ ɛ min lat Kuoth Nhial in la Lueelu jɛ, mëë cak ji̱ ni jic wëë i̱, “Ɛ ɣän Kuoth Nhial min lät ti diaal, mëë lät pua̱a̱r ni kärɔa, mëë lät wi̱c muɔ̱ɔ̱n kɛ puɔ̱nydä,

²⁵ ɛ ɣän jak nyuuthni göökni kä kac ɔ, kä jak ti̱t kä dɔa̱a̱r, ɛ ɣän woc pɛl nath ɔ, kä ɛ ɣän jak ŋäc ŋɔaknidiɛn kä thil luɔt ɔ,

²⁶ ɛ ɣän jak ruac jäŋädä kä thuɔ̱k ɔ, kä ɛ ɣän jak ruac ja̱a̱knikɛ kä bi tuɔɔk ɔ, min ruac kɛ kui̱ Jɛ-ru-tha-lɛm i̱, ‘Ba jɛ ciɛŋ,’ min ruac kɛ kui̱ wi̱i̱ni Juda i̱, ‘Bakɛ nyɔk kɛ lätni, ɣän bä wi̱i̱kiɛn tin ci da̱k nyɔk kɛ lätni,’

²⁷ ɛ ɣän jio̱k yier ɔ i̱, ‘Köötni, ɣän bä kiɛrku jak kä kööt,’

²⁸ kä ɛ ɣän jio̱k Ko-rɛc ɔ i̱, ‘Ɛ yieen deetkä, kä bɛ cärkä diaal la̱th ni guäthdiɛn’. Kä ɛ ɣän ruac kɛ kui̱ Jɛ-ru-tha-lɛm ɔ i̱, ‘Ba jɛ nyɔk kɛ ta̱th,’ kä ɛ ɣän ruac kɛ kui̱ luaak Kuɔth ɔ i̱, ‘Ba cuɔ̱ɔ̱ŋku nyɔk kɛ lätni.’ ”