I-ca-yaa 43 - RUAC KUƆTH IN RƐL RƆ

Lär Kuɔth kɛ luäk nɛɛnikɛ

¹ Täämɛ nɛmɛ ɛ min ci Kuoth Nhial ɛ lar, jɛn ram in cak ji̱ lö Je-kɔb, jɛn ram in tääth ji̱ ji̱n I-thɛ-rɛl wëë i̱, “/Cuarɛ dual, kɛ ɣöö cä yɛ luɛl, kä cä yɛ cɔl ni ciöötni, kɛ yɛn nɛɛkä.

² Mi wä yɛn pi̱w wä jiɛth, ɣän bä te kɛɛl kɛ yɛ, mi jiathɛ kiɛr /ci yɛn bi mua, kä mi ja̱lɛ rɛy maac /cɛ yɛ bi waŋ, /cɛ yɛ bi pɛt ɛn bo̱l maac.

³ Kɛ ɣöö ɛ ɣän Kuoth Nhial ni Kuothdun, ɣän Kuoth I-thɛ-rɛl kä Käändun. Ɣän bä I-jëp jak kä pälɛ yɛ, bä Kuc kɛnɛ Thɛba thöp kɛ gua̱a̱thdun.

⁴ Kɛ ɣöö gɔw yɛn ɛlɔ̱ŋ waaŋdä, kä luɔ̱thkɛ yɛ kä nhɔakä yɛ, ɣän bä naath la̱th guäthdun, nɛy ti bä thöp kɛ kui̱ teekädun.

⁵ /Cuarɛ dual kɛ ɣöö ta̱a̱ kɛɛl kɛ yɛ, bä gaatkun nööŋ kui̱ känyä ca̱ŋ, kä bä yɛ ma̱a̱t kui̱ konyä ca̱ŋ.

⁶ Kä bä ji̱ kuec caam la̱r ɣöö pa̱lɛ kɛ, kä bä ji̱ kuec cuëëc la̱r ɣöö /cuarɛ kɛ rɔm jɔk, no̱o̱ŋni dhɔɔlkä guäth in nɔ̱a̱n nɔ̱a̱n, kä no̱o̱ŋni nyieekä ni peek ɣɔaa,

⁷ kɛn nɛy diaal tin cɔalkɛ kɛ ciötdä, tin cä cak kɛ kui̱ wutädä, kɛn tin cä la̱t kä cä täth.”

Juda ɛ neen Kuɔth

⁸ No̱o̱ŋni nɛy tin tekɛ wäŋ kä kɛ ciöör raar, nɛy tin tekɛ ji̱th kä kɛ mi̱eŋ!

⁹ Ɛ döör diaal duɔlkɛ rɔ̱ guäth kɛl, kä a naath matkɛ rɔ̱. Ɛŋa rɛydiɛn dëë nɛmɛ lat ɔ, mɔ dëë kɔn nyuɔ̱th tëë ci wä ni wal ɔ? Akɛ latkɛ nëndiɛn kɛ ɣöö bakɛ kulɛ ŋa̱c ɛn ɣöö kɛ thuɔ̱ɔ̱k, bi nɛy tin kɔ̱ŋ ɛ kulɛ liŋ, kä bikɛ cu wee kɛ thuɔ̱ɔ̱k.

¹⁰ Cu Kuoth Nhial wee i̱, “Ɛ ji̱n neendä,” kä ɛ ji̱n ja̱ŋdä mi cä mɛk, kɛ ɣöö bi ɣä ŋa̱c kä bi ɣä ŋäth, kä biɛ ŋa̱c ɛn ɣöö ɛ ɣän. Kä thilɛ kuoth mi te nhiamdä, kä thilɛ kuoth mi bi te kɔɔrä.

¹¹ Ɛ ɣän Kuoth Nhial, kä thilɛ kään mi dɔ̱ŋ mi /ci mɔ a ɣän.

¹² Cä yɛ nyuɔ̱ɔ̱th kä cä yɛ kän kä cä yɛ la̱t ruac, mëë thilɛ kuoth mi juɔ̱r mi te rɛydun, kɛ yɛn nëën kä ɣä, ruac ni ɣän Kuoth Nhial.

¹³ “Ɛ ɣän Kuoth kä bä ŋot ɛ ni ɣän, thilɛ ram mi dëë kään tetkädä, kä mi cä la̱t tëëkɛ ram mi dëë jɛ woc?”

Ba̱r nath kɛ rɔ̱ kä ji̱ Bɛ̈-bi-lɔn

¹⁴ Cu Kuoth Nhial in la Lueelu ni Kuoth I-thɛ-rɛl wee i̱, “Kɛ kui̱du, ɣän bä rɛm jäk kä Bɛ̈-bi-lɔn, ba gääkni diaal to̱l kä piny, kä bä rɔal ji̱ Bɛ̈-bi-lɔn loc ni jiath lɔaac.

¹⁵ Ɛ ɣän Kuoth Nhial Kɛlu min Rɛl Gɔɔydɛ rɔ, Kuääru kä cääk I-thɛ-rɛl.”

¹⁶ Kä cu Kuoth Nhial nɛmɛ lar, jɛn min ci duɔ̱ɔ̱p la̱t rɛy baar, min tekɛ duɔ̱ɔ̱p rɛy pi̱i̱ni ti ŋuan,

¹⁷ mëë däk thurbiɛɛli kɛnɛ jiöŋkööri, kä jooc rɛm köör tin wäth, tekɛ ni piny /ca rɔ̱ bi nyɔk kɛ jiëc, cua kɛ däk ce̱tkɛ min la mac ɛ yia̱nykɛ.

¹⁸ Kä cu Kuoth Nhial wee i̱, “/Cu tëë ci wä car, kä /cu tëë wal tim.

¹⁹ Kä nɛnɛ ɣän la̱tdä ni mi pay tuɔɔk, tuɔɔkɛ ɛn täämɛ, ci jɛ nɛn? Ɣän bä duɔ̱ɔ̱p la̱t däär dɔaar, kä bä kiɛr la̱t rɛy dɔaar rɛ̈w.

²⁰ Ba ɣä luɔ̱th ɛ ley dɔaar, ba ɣä luɔ̱th ɛ guɔɔr kɛ wuɔ̱t, kɛ ɣöö cä pi̱w jak kä te däär dɔaar, cä kiɛr jak kä te däär dɔaar rɛ̈w, cä nɛɛkä tin cä mɛk moc kɛ ti ba math,

²¹ kɛn nɛy tin cä lät kä rɔɔdä, kɛ ɣöö ba ɣä puany.”

Duer I-thɛ-rɛl

²² Cu Kuoth Nhial wee i̱, “Yɛn ji̱ Je-kɔb /ka̱nɛ ɣä cɔl, kä ci yɛn ŋɔa̱a̱ŋ kɛ ɣä lö ji̱ I-thɛ-rɛl!

²³ /Ken yɛn ɣä nöŋ muc deetkun tin waŋkɛ, kä /ken yɛn ɣä luɔ̱th kɛ luurikun. Ɣän /ka̱n yɛ moc rik kɛ thiec mucni, kä /ka̱n yɛ kok kɛ wa̱ŋ wal tin kɔp.

²⁴ /Ken yɛn ɣä kök wäl in kɔp kɛ yio̱w, kä /ken yɛn ɣä nöŋ thiɔl mucnikun. Duundɛ ɣöö cia dɛ̈c ni ɣä piny kɛ dueerkun, cia ɣä jak kä cuc kɛ jiäkun.

²⁵ “Ɛ ɣän, ɛ nëë päl dueerkun diaal kɛ ca̱r lɔaacdä, ɣän /cä dueerkun bi tim.

²⁶ Kä gɔanyɛ ɣä, wanɛ guäth luɔ̱k, lat go̱o̱nydu dɔ̱ŋ bi tekɛ cuɔ̱ɔ̱ŋ.

²⁷ Ci guuri tëë nhiam duer, kä ci nɛy tin luɔckɛ thokdu ɣä duer duer.

²⁸ Kɛ kui̱c ɛmɔ cä bööth luaakdu jak kä po̱c, kä bä Je-kɔb jakä da̱kɛ, kä ba I-thɛ-rɛl kuëth.”