I-ca-yaa 42 - RUAC KUƆTH IN RƐL RƆ

Ja̱ŋ Kuɔth Nhial

¹ Kä cu Kuoth Nhial wee i̱, “Nɛnɛ, nɛmɛ ɛ jɛn ja̱ŋdä min cä jak kä bum, ɛ jɛn ram in cä mɛk min nhɔk lɔcdä jɛ, ɣän cä jɛ thiäŋ kɛ yiëëdä, bɛ thuɔ̱k nööŋ rɛy dööri.

² Jɛn /cɛ bi wiee, kä /cɛ bi rɔal, kä /cɛ jɔwdɛ bi kap nhial rɛy duɔ̱pni,

³ /cɛ ruɔ̱ɔ̱r bi to̱l, kä /cɛ lɛmbär mi kuiy pɛ̈tdɛ bi yieny, bɛ nöŋ ni nɛy diaal thuɔ̱k.

⁴ /Cɛ bi thil ŋa̱th kä /cɛ rɔ bi luär amäni mi cɛ thuɔ̱k la̱t rɛy ɣɔaa, kä bi ji̱ dhuɔ̱li ŋäth ni ŋuɔ̱tdɛ.”

⁵ Kä cu Kuoth in la Kuoth Nhial, min cak pua̱a̱r kä cu jɛ riny, min cu piny ɣär kɛnɛ ti diaal tin bä raar thi̱n, mëë cu ji̱kɛ ŋök yiëë kä cu nɛy tin jäl thi̱n moc kɛ tëk wëë i̱,

⁶ “Ɛ ɣän Kuoth Nhial, ɣän cä yɛ cɔal rɛy cuŋni, ɣän cä yɛ käp ni tetdä kä cä yɛ tit, bi yɛn a nyuuth matdä ruac kɛ naath, bi yɛn a buay kä döör.

⁷ Kɛ ɣöö bi yɛn wäŋ tin ci cɔr lɛp, kä bi yɛn ji̱ yieenä lony ɛ lɔr, nɛy tin te nyuurä rɛy muɔ̱th duëël yieenä.

⁸ Ciötdä ɛ jɛn Kuoth Nhial, /cä buaydä bi thöp ram mi dɔ̱ŋ, kä /cä liakdä bi ka̱m kuth jiɛn.

⁹ Nɛnɛ, tëë wal cikɛ tuɔɔk, kä ɛn täämɛ latdä tin pay tuɔɔk, a /ken kɛ ni tuɔɔk ɣän la̱tdä kɛ yɛ.”

Dit puɔnyä Kuɔth Nhial

¹⁰ Këtdɛ Kuoth Nhial dit mi pay cak, kɛ̈tdɛ dit puɔnyä pekni ɣɔaa diaal! Yɛn nɛy diaal tin ger rɛy yiëër kɛnɛ tin diaal tin thia̱ŋkɛ jɛ, kɛ dhuɔ̱li kɛ nɛy diaal tin cieŋ thi̱n.

¹¹ Ɛ dɔr rɛ̈w kɛnɛ wi̱i̱kɛ kapkɛ jiööthkiɛn nhial, kä a nɛy tin cieŋ ciëëŋni Ke-dhar puanykɛ jɛ, ɛ ji̱ Thɛlɛ̈ liakɛ jɛ kɛ tɛ̈th lɔaac, akɛ puanykɛ jɛ ni biɛɛni päämni.

¹² Akɛ liakɛ Kuoth Nhial, akɛ puanykɛ jɛ ni wuɔ̱thni dhuɔ̱li.

¹³ Bi Kuoth Nhial ben raar ce̱tkɛ ram mi bum bum, bɛ ben ce̱tkɛ wääth köör mi ci rɔ rialikä kɛ ko̱r, cɛ wiee köör ko̱k kɛ jɔw mi di̱i̱t, cɛ rɔ nyoth ala ram mi bum kä ji̱ tɛ̈rɛ.

Lär Kuɔth kɛ luäk nɛɛnikɛ

¹⁴ Ɣän cä biɛt kɛ pek mi bäär, cä te bitdä kä cä rɔ rɔam jɔk, ɛn täämɛ bä wiee kɛ jɔw mi di̱i̱t ce̱tnikɛ ciek mi dap, ɣän bɛ ɣä kɔ̱p kä bɛ ɣä guäy.

¹⁵ Ɣän bä pääm thia̱a̱y, kä bä juaackiɛn diaal ko̱t, kä bä kiɛr loc ala dhuɔ̱li, kä bä puɔ̱l diaal ko̱t.

¹⁶ Kä bä ciöör buɔth kɛ duɔ̱ɔ̱p mi /kuec kɛn ɛ, bäkɛ bo̱th kɛ duɔ̱ɔ̱p mi /kueckɛ. Kä bä muth loc ni buay nhiamdiɛn, kä bä dhuɔ̱li jak kä car caar. Ti̱ti̱ kɛ kɛn ŋɔak tin bä la̱t, kä /cäkɛ bi pa̱l ruëëc.

¹⁷ Kä nɛy tin ba ŋäth ni kuth jiɛn, tin jiökɛ kuth ciikni i̱, “Kɛ yɛn kuthkɔ,” bikɛ loc jɔk kɛ pöc mi di̱i̱t.

Lo̱k I-thɛ-rɛl kɛ nyuuth

¹⁸ Li̱eŋɛ lö yɛn mi̱eŋ, kä guecɛ lö ciöör bia nën!

¹⁹ Ɛŋa la cɔrɔ mi /ci mɔ a ja̱ŋdä, kiɛ miŋ mi ce̱tkɛ ram in cä ja̱k? Ɛŋa mi la cɔr ce̱tkɛ ram in ci rɔ lëy ɣä, kiɛ mi cɔr ce̱tkɛ ja̱ŋ Kuɔth Nhial?

²⁰ Ji̱n ci ti ŋuan nɛn, duundɛ ɣöö /cikɛ tit, kä ji̱n te ji̱thku ɣo̱o̱ŋä, duundɛ ɣöö /ci li̱ŋ.

²¹ Tɛth lɔc Kuɔth Nhial, kɛ kui̱ cuŋnikɛ, kɛ ɣöö bɛ ŋuɔ̱tkɛ jak kä di̱t kä bumkɛ.

²² Duundɛ ɣöö kɛn nɛy ti̱ti̱ cakɛ mac kä ca kuakiɛn pɛc, ca kɛn diaal jak kä pɛn kɔ̱k, kä cakɛ tɔ̱w duëël yieenä, mackɛ nikɛ kä pɛ̈ckɛ kɛ a thilɛ ram mi deekɛ luäk, la cua̱ pɛ̈ckɛ nikɛ a thil ram mi wee i̱, “Luɔcɛ kɛ jɔk!”

²³ Ɛŋa kä yɛ bi nɛmɛ liŋ ɔ, mi bi ji̱thdɛ pa̱l piny kɛ gua̱a̱th ɔ bi ben ɔ?

²⁴ Ɛŋa ci Je-kɔb thöp ɔ ala pɛ̈c, mɔ ci I-thɛ-rɛl jak kä ba mac ɔ? /Ciɛ Kuoth Nhial jakɛ kä tuɔɔk ɔ, kɛ ɣöö canɛ jɛ duer duer, kɛ ɣöö /ka̱n guɔ̱ɔ̱r ni dupkɛ, kä /ka̱n ŋuɔ̱tkɛ luɔ̱th?

²⁵ Cɛ gakdɛ wuɔc wi̱i̱diɛn, ɛn kɛ̈c köör in di̱i̱t, cɛ kɛ go̱l kɛ mac, duundɛ ɣöö /cikɛ jɛ ŋäc, cɛ kɛ waŋ, kä /cikɛ luɔtdɛ ŋäc.