I-ca-yaa 41 - RUAC KUƆTH IN RƐL RƆ

Ŋäc ji̱ I-thɛ-rɛl kɛ luäk Kuɔth

¹ Liɛŋɛ ɣä bitdä lö yɛn ji̱ dhuɔ̱li, a naath jak rɔ̱ kä bum, akɛ bëë nhiam kä akɛ ruac, wanɛ röm kɛɛl guäth luɔ̱k.

² Ɛŋa mëë cu raan jiɛc kui̱ känyä ca̱ŋ, min jak juc kä te thi̱n gua̱thni diaal tin cɛ wä thi̱n? Cua döör diaal ka̱m jɛ, kɛ ɣöö bɛ kua̱r dɔany piny. Cuɛ kɛ jak kä ce̱tnikɛ tup kɛ mutdɛ, cuɛ kɛ jak kä ce̱tnikɛ nyon mi lɔk jiɔamɛ kɛ bäärɛ.

³ Cuɛ kɛ joc kä cuɛ kään. Cuɛ kɛ joc kɛ duɔ̱ɔ̱p mi /kenɛ met jäl.

⁴ Ɛŋa mi ci nɛmɛ cäp kä ci jɛ la̱t, mi cu ri̱c cɔl ni tukä? Ɛ ɣän Kuoth Nhial min la nhiam ɔ, kä ɛ ɣän la min jɔak ɔ.

⁵ Cu ji̱ dhuulä jɛ nɛn, kä cukɛ dual, kä ɛ pek ɣɔaa lathɛ, cukɛ rɔ̱ mat kä cukɛ ben.

⁶ Cu ram ɔ gua̱n thieekädɛ luäk, kä jio̱kɛ däman i̱, “Bumni!”

⁷ Cu ŋäät jiɛn tääth dääpä com, kä cu ram in la puɔ̱t thöt ram in la tääth yiëth com, cuɛ wee i̱, “La̱t ɛmɛ, cɛ gɔaa ɛlɔ̱ŋ”, kä cukɛ jɛ pua̱t piny kɛ thöt kɛ ɣöö /cɛ bilɛ tɛɛth.

⁸ Duundɛ ɣöö I-thɛ-rɛl ɛ ja̱ŋdä, kä Je-kɔb cä jɛ mɛk, yɛn gaat mäthdä ni A-bɛ-ram,

⁹ Yɛn nɛy tëë ka̱a̱nä ni peek ɣɔaa, tëë cɔalä ni guäth mi nɔ̱a̱n nɔ̱a̱n, tëë jiökä i̱, “Kɛ yɛn ja̱a̱ŋkä, ɣän cä yɛ mɛk /ka̱n yɛ yiäk.”

¹⁰ /Cuarɛ dual, ta̱a̱ kɛɛl kɛ yɛ, kä /cuarɛ diɛɛr, kɛ ɣöö ɛ ɣän Kuothdun. Ɣän bä yɛ moc buɔ̱m kä bä yɛ luäk, ɣän bä yɛ käp kɛ tet cuëëcdä min bum.

¹¹ Nɛnɛ nɛy diaal tin gak kɛ ji̱, kɛn bikɛ pöc kä bikɛ ga̱a̱c, kɛn nɛy tin gak kɛ ji̱, bikɛ thil luɔt kä bikɛ riaw.

¹² Bi nɛy tin la ji̱ tɛ̈ru go̱r, duundɛ ɣöö /cikɛ bi jek. Nɛy tin tërkɛ ji̱ ko̱r, bikɛ thil luɔt ɛlɔ̱ŋ.

¹³ Kɛ ɣöö ɣän Kuoth Nhial ni Kuoth, min ci tet cuëëcdu käp, ɛ ɣän ɛ nëë jio̱k ji̱ i̱, “/Cu dual, ɣän bä ji̱ luäk.”

¹⁴ /Cu dual lö kɔ̱m ni Je-kɔb, ji̱n duŋ tiit ni I-thɛ-rɛl! Ɣän puɔ̱nydä bä yɛ luäk, ruac ni ɣän Kuoth Nhial, Käändun ni Kuoth I-thɛ-rɛl.

¹⁵ Kä nɛnɛ ɣän bä ji̱ jak kä car caar, car caar mi pay la̱t mi moth kä tekɛ lɛc ti ŋuan, bi pääm ŋɛr kä bikɛ nor, kä bikɛ dup ce̱tnikɛ tup.

¹⁶ Kä bikɛ ciɛth kä bi jiɔam kɛ lɔk, bi thul kɛ riaw kä dɔɔr. Kä bi lɔcdu cu tɛɛth kɛ Kuoth Nhial, kä bi cu buɔ̱m rɛy Kuɔth I-thɛ-rɛl.

¹⁷ Cu can kɛnɛ nɛy tin thil ŋu pi̱ go̱r, duundɛ ɣöö /ka̱n pi̱ jek, cu lëëpkiɛn kööt kɛ rɛw, ɛ ɣän Kuoth Nhial bikɛ loc ɔ, ɛ ɣän Kuoth I-thɛ-rɛl /cikɛ bi pa̱l ruëëc ɔ.

¹⁸ Bä kiɛr jak kä lo̱ny wuɔ̱thni päämni ti ko̱o̱t, kä bä wa̱tni jak kä lo̱ny ni däär löli, ɣän bä därdɔaar jak kä pul pi̱i̱ni, bä mun mi kööt jak kä wa̱t pi̱i̱ni.

¹⁹ Ɣän bä thep la̱th däärdɔaar, kɛ ŋuër kɛnɛ gaar kɛ jiath Ɔ-lip, ɣän bä luiy la̱th ni däär dɔaar rɛ̈w, bi nyɔ̱a̱t do̱ny kɛɛl kɛ luɔ̱ɔ̱r,

²⁰ kɛ ɣöö bi naath ɛ nɛn kä ba jɛ ŋa̱c, bikɛ jɛ tit kɛɛl kä bikɛ jɛ ŋa̱c, ɛn ɣöö ɛ Kuoth Nhial lät jɛ mɔ, ɛ Kuoth I-thɛ-rɛl cak ɛ mɔ.

Thil lotdä kuthni jiɛn

²¹ Cu Kuoth Nhial wee i̱, “No̱o̱ŋni lukdu.” Cu Kuäär ji̱ Je-kɔb wee i̱, “Bër lätni ɣä ruacdu.”

²² No̱o̱ŋni kuth jiɛnku ba kɔn ben la̱r mɔ bi tuɔɔk ɔ. Akɛ la̱rkɛ kɔn tëë ci kɔŋ tuɔɔk, kɛ ɣöö dënɛ kɛ kulɛ car, banɛ min bi ben raar kulɛ ŋa̱c, kiɛ ba kɔn la̱r tin bi tuɔɔk.

²³ La̱rɛ kɔ mɔ bi tuɔɔk kɛ nhiam ɔ, kɛ ɣöö bakɔ jɛ kulɛ ŋa̱c mi kɛ yɛn kuth, kuth ti dëë mi gɔaa la̱t kiɛ mi jiääk, bakɔ ku pöc kä bakɔ dual.

²⁴ Kä nɛ̈nɛ jɛ thilɛ yɛ luɔt, kä la̱tdun ɛ baŋ, kä nɛy tɔ̱ ci yɛ mɛk tɔ̱ bakɛ lo̱k.

²⁵ Cä raan jak kä bëë kui̱c caam, ram mi bä kui̱ känyä ca̱ŋ mi bi ɣä cɔl kɛ ciötdä, bɛ ja̱l wi̱i̱ kua̱ri ce̱tkɛ mi jäälɛ ni tuäk, ce̱tkɛ min la tääth muɔ̱ɔ̱n mun a dɔny.

²⁶ Ɛŋa mi ci jɛ la̱rkɔ kɛ nhiam, kɛ ɣöö dëëkɔ jɛ kulɛ ŋa̱c, mɔ ci jɛ la̱rkɔ mɔ a ŋot gua̱a̱th kɛ ɣöö dëëkɔ kulɛ wee i̱, “Tëë kɛ cuɔ̱ŋ”? Thilɛ ram mi ci jɛ lat, thilɛ ram mi ci jɛ la̱tkɔ a /kenɛ ni tuɔɔk, thilɛ ram mi ci ruac liŋ kä yɛ.

²⁷ Ɛ ɣän Kuoth Nhial ɛn nëë ci jɛ la̱r Dha-yɔn kɛ nhiam ɛn ɣöö naath a bëëni, cä ji̱ Jɛ-ru-tha-lɛm jäk kä thuk ti gɔw.

²⁸ Kä mëë cä guic cuɛ thil ram mi nɛ̈ɛ̈nä, cuɛ thil ram mi dëë la̱t ruac rɛydiɛn, cuɛ thil ram mi dëë ruac loc mi cä kɛ thiec.

²⁹ Nɛnɛ, kɛn kuth jiɛn diaal ti̱ti̱ thilɛ kɛ luɔt, thilɛ mi dëë kɛn ɛ la̱t, kɛn pua̱nykiɛn tekɛ ni baaŋ ce̱tnikɛ jiɔam.