I-ca-yaa 40 - RUAC KUƆTH IN RƐL RƆ

Ba nɛɛ Kuɔth bum

¹ Cu Kuothdu wee, bum naath bum nɛɛkä.

² Ruacni a määth kɛ ji̱ Jɛ-ru-tha-lɛm, lät ni jɛ kɛ ɛn ɣöö, ci gua̱a̱th la̱tdiɛn thuɔ̱k, ɛn ɣöö ca dueerkiɛn päl, ci Kuoth Nhial kɛ duäc nikä rɛɛw kɛ kui̱ dueerikiɛn.

³ Tëëkɛ jɔw raam mi cio̱t i̱, “Rialɛ dup Kuɔth Nhial ikä rɛy dɔaar, la̱tdɛ dup ti di̱t ti cuŋ däärdɔaar kɛ kui̱ Kuɔthda.

⁴ Kä ba löli diaal di̱r, kä ba pääm diaal pa̱a̱r kɛ piny, kä ba tuɔ̱ny tuɔ̱ɔ̱ny diaal jak kä ti car caar, kä ba gua̱th tin ŋuany ŋuaany jak kä puɔth.

⁵ Kä bi buay Kuɔth Nhial cu jɔɔc, kä ba jɛ nɛn ɛ nɛy diaal kɛɛl, ruac ni ɣän Kuoth Nhial.”

⁶ Kä tëë kɛ jɔw mi wee i̱, “Lat ruac!” Kä cua̱ wee i̱, “Kä bä lat ni ŋu?” Lat ɣöö nɛy diaal bikɛ ce̱tnikɛ juaac, bi gɔɔydiɛn ce̱tnikɛ gaakni juaacni dɔaar.

⁷ Kɛn juaac cikɛ rɔɔl, kä ci gaakni pɛ̈ɛ̈n, kɛ ɣöö ci Kuoth Nhial kɛ ŋök yiëëdɛ, kɛ thuɔ̱k ci naath ce̱tnikɛ juaac.

⁸ Kɛn juaac cikɛ rɔɔl, kä ci gaakni pɛ̈ɛ̈n, duundɛ ɣöö bi ruac Kuɔthda te thi̱n amäni cäŋ kɛl.

⁹ Ji̱n ram in no̱o̱ŋ thuk ti gɔw kä Dha-yɔn, wër nhial ni wi̱i̱ pa̱a̱m in bäär. Kä ji̱n ram in naŋ thuk ti gɔw kä Jɛ-ru-tha-lɛm, kapni jɔwdu nhial ɛlɔ̱ŋ, kapni jɛ nhial, /cu dual, lätni jɛ wi̱c Juda i̱, “Kuothdun jɛn ɛn!”

¹⁰ Nɛnɛ Kuäär ni Kuoth cɛ ben kɛ buɔ̱m, ruaacɛ naath kɛ buɔ̱mdɛ, kä nɛnɛ jɛn bɛ nɛɛkɛ culikä, bɛ min bɛ cuɔ̱lkɛ rɔm kɛ rɔ kɛɛl.

¹¹ Bɛ detkɛ la̱a̱k ce̱tnikɛ yieen deet, kä bɛ rueeth deet ruɔl tetnikɛ, bɛ kɛ kap nikɛ bapdɛ, kä bɛ tin tekɛ dɛy bo̱th.

Kuoth I-thɛ-rɛl min thil päär

¹² Tëë kɛ ram mi dëë pi̱w bäpdiitni thɛm kɛ där tetädɛ, kiɛ mi dëë pua̱a̱r thɛm kɛ tetdɛ, ram mi dëë tup piɛny la̱th kä duɔ̱ɔ̱r, kä dëë pääm thɛm kɛ theem?

¹³ Kä ɛŋa mi ŋäc ca̱r Kuɔth Nhial, kiɛ mi dëë Kuoth a lueek?

¹⁴ Kä ɛŋa mi la thieecɛ kɛ luäk, min dëë jɛ nyuɔ̱th thuɔ̱k, ram in dëë jɛ ŋi̱eec kɛ ŋäc ŋɔaani, min dëë jɛ nyuɔ̱th duɔ̱ɔ̱p ŋäcä?

¹⁵ Nɛnɛ döör ce̱tkɛ nikɛ pi̱w ti kuaŋ puɔ̱ɔ̱ny dhar, ce̱tkɛ nikɛ tup mi te rɛy theemä, nɛnɛ la känɛ dhuɔ̱li ce̱tnikɛ tup.

¹⁶ Jiɛn Lɛ-ba-nɔn /cikɛ ro̱ŋ ala tɔŋ maac yi̱kä, kä /ci leykɛ ro̱ŋ ala muc tin waŋkɛ.

¹⁷ Ce̱t döör diaal kɛ baŋ nhiamdɛ, /cɛ kɛ cɔl ni duɔ̱ɔ̱r kä jɛ, kɛ ti thil luɔt ɛlɔ̱ŋ.

¹⁸ Kuɛ la ŋa mi päär kɛ Kuoth, kiɛ ɛŋu mi dëë kulɛ ca̱a̱t kɛ jɛ?

¹⁹ Derɛ la kuoth jiaath? Mi la̱tkɛ kɛ tet nath, kä ci tääth dääpä jɛ rɔth kɛ da̱a̱p, kä ca jɛ ta̱th kuat cikä min bo̱r.

²⁰ Kɛ kui̱ mucni la raan wa̱a̱ mɛɛk ni jiath, jiath mi /ci dëë met piɛɛr. Kä bɛ cu go̱r ni gueeŋ jiɛn mi gɔaa, mi bi puɔ̱ny mi /ci dëë tɛɛth la̱t.

²¹ Ɛ /keni jɛ ku ŋa̱c? Kä /keni jɛ ku liŋ? Ɛ /ka̱n jɛ ku la̱r ji̱ ni tukädɛ? Kä /keni jɛ ŋa̱c ni mëë kua piny tok?

²² Lätdɛ ram in nyuur wi̱i̱ kɔamdɛ, min te wi̱c muɔ̱ɔ̱n in ce̱t ji̱kɛ kɛ ra̱a̱kni, kä cuɛ pua̱a̱r ɣär ce̱tnikɛ bi̱i̱ wernyinä, cuɛ kɛ ɣär ce̱tnikɛ kɛmɛ mi cieŋ naath thi̱n.

²³ Cuɛ kua̱r nööŋ ni piny, kä cuɛ ruëëc ɣɔaa jak kä thil luɔt.

²⁴ Ce̱tkɛ nikɛ wal ti pay pith, kä pay do̱ny, ti pay yiath ni ciökiɛn piny, mi cu Kuoth kɛ jäk kä jiɔam, cukɛ cu rɔɔl, kä cu ruɔth kɛ cu lɔk ce̱tnikɛ nyon.

²⁵ Kä ɛŋa mi bia ɣän Kuoth ca̱a̱t kɛ jɛ, kiɛ ɛŋa mi la gua̱n päärädä? Ruac ni ɣän Kuoth in Rɛl rɔ.

²⁶ Kapni waŋdu nhial guic pua̱a̱r, Ɛŋa mi cak kɛn ti diaal ti̱ti̱? Ɛn ram in no̱o̱ŋkɛ raar kä ŋäc pekdiɛn, ram in cɔɔlkɛ ni ciöötnikiɛn. Kɛ kui̱ bumädɛ min di̱i̱t kɛnɛ lua̱ŋdɛ, thilɛ kɛl mi te jɔ̱ɔ̱r thi̱n.

²⁷ Ɛŋu ruaci mɔ lö Je-kɔb, mɔ go̱nyi mɔ lö I-thɛ-rɛl wi̱i̱ i̱, “Rikä /cakɛ ŋäc ɛ Kuoth Nhial, cuɔ̱ŋdä /ci Kuothdä jɛ cɔl duɔ̱ɔ̱r”?

²⁸ Ɛ /keni jɛ ku ŋa̱c? Kä /keni jɛ ku liŋ? Kuoth Nhial ɛ jɛn Kuoth mi thil pek, cɛ ɣɔw kɛɛliw cak. Jɛn /cɛ ŋɔa̱a̱ŋ kä /cɛ cuc, kä thilɛ ram mi dëë ŋäc ŋɔaanidɛ ŋa̱c.

²⁹ La mocɛ ram mi ci cuuc kɛ buɔ̱m, kä la reepɛ buɔ̱m raam mi thil lua̱ŋ.

³⁰ Amäni ŋuɛ̈tni bikɛ ŋɔa̱a̱ŋ kä bikɛ cuuc, kɛn ŋuɛ̈tni bikɛ tëth kɛ kui̱ cucä.

³¹ Duundɛ ɣöö nɛy tin ŋa̱thkɛ ni Kuoth Nhial, bikɛ buɔ̱m nyɔk kɛ jek, bikɛ rɔ̱ jiɛc kɛ gɔ̱k ce̱tnikɛ cor, bikɛ wur kä /cikɛ bi ŋɔa̱a̱ŋ, bikɛ ja̱l kä /cikɛ bi cuuc.