I-ca-yaa 39 - RUAC KUƆTH IN RƐL RƆ

Ja̱a̱k kä Bɛ̈-bi-lɔn

¹ Kɛ jɛn gua̱a̱th ɛmɔ cu kuäär Bɛ̈-bi-lɔn ni Mɛ-ro-dak-bɛ̈l-ä-dan gat Bɛ̈l-ä-dan naath jäk kä Ɣidh-ki-yaa a te tetkiɛn kɛ warɛgak kɛnɛ muc. Kɛ ɣöö cɛ liŋ ɛn ɣöö tëë kɛ juey kä cɛ pual.

² Kä cu Ɣidh-ki-yaa kɛ nyuɔ̱ɔ̱r, kä cuɛ kɛ nyuɔ̱th nyin dhɔaarɛ diaal, da̱a̱p ciɛk in bo̱r, liɛɛth in di̱t kökdɛ, kɛ wal tin ŋuäny, kɛ yio̱w köör rɛ̈mdɛ diaal, kɛ tin diaal tin te tɔ̱wä dhɔrɛ. Cuɛ thil kɛl mi /ken Ɣidh-ki-yaa jɛ nyuɔ̱thkɛ kä nyin dhɔaarɛ diaal.

³ Kä cu gök ni I-ca-yaa ben kä Kuäär ni Ɣidh-ki-yaa, cuɛ thiec i̱, “Ɛŋu mi lat nɛy ti̱ti̱ jɛ? Kä bäkɛ nikä?” Kä cuɛ loc i̱, “Bäkɛ kä ɣä wi̱c mi nɔ̱a̱n nɔ̱a̱n, bäkɛ kä Bɛ̈-bi-lɔn.”

⁴ Kä cu I-ca-yaa wee i̱, “Kä ɛŋu mi ca guic dhɔru?” Cu Ɣidh-ki-yaa jɛ loc i̱, “Cikɛ ti diaal tin te dhɔrä nɛn. Thilɛ kɛl kä tin diaal tin te tɔ̱wä dhɔrä mi /ka̱n nyuɔ̱thkɛ.”

⁵ Kä cu I-ca-yaa jɛ jiök i̱, “Liŋ ruac Kuɔth Nhial in la Ruey Ɣɔaa.

⁶ Nɛnɛ ci ni̱n thia̱k kɛ ɣöö ba tin diaal tin te dhɔru, kɛnɛ tin ci guuri kɛ tɔ̱w, amäni walɛ naŋ kä Bɛ̈-bi-lɔn. Thilɛ mi ba päl, ruac ni Kuoth Nhial.

⁷ Kä ba tha̱a̱ŋ ganku ti da̱pkɛ ji̱ naŋ, bikɛ wa̱a̱ jio̱wni dhɔaar kua̱r Bɛ̈-bi-lɔn.”

⁸ Kä cuɛ I-ca-yaa jiök i̱, “Ɛn ruac Kuɔth ɛ ci latdɛ gɔaaɛ.” Kɛ ɣöö caarɛ jɛ i̱, “Ŋumdä ŋu thi̱n, mi bi mal cak te thi̱n rɛy ni̱nikä.”