I-ca-yaa 38 - RUAC KUƆTH IN RƐL RƆ

Juey Ɣidh-ki-yaa

¹ Ɛn ni̱ni tɔ̱tɔ̱ cuɛ Ɣidh-ki-yaa moc kɛ juey mi guic ni näkdɛ. Kä cu gök ni I-ca-yaa gat A-modh ben kä jɛ, kä cuɛ jiök i̱, “Ci Kuoth Nhial wee i̱, ‘Riali dhɔru ikä kɛ ɣöö bi li̱w, /ci bi tëk.’ ”

² Kä cu Ɣidh-ki-yaa wi̱cdɛ riet puɔ̱ɔ̱ny duëël, kä cuɛ Kuoth Nhial pal,

³ cuɛ wee i̱, “Timɛ lö Kuoth Nhial, ɣän cä ji̱ guɔ̱r i̱di, kɛ lɔcdä kɛɛliw, kä cä la̱t ni gɔy waaŋdu.” Cu Ɣidh-ki-yaa wiee ɛlɔ̱ŋ.

⁴ Kä cu ruac Kuɔth Nhial ben kä I-ca-yaa wëë i̱,

⁵ “Wër läri jɛ Ɣidh-ki-yaa ɛn ɣöö ci Kuoth Nhial ni Kuoth guur ni Dee-bid palu liŋ, kä cä merku nɛn. Kä nɛnɛ ɣän bä ni̱n teekädu rep kɛ run wäl dhieec.

⁶ Kä bä ji̱ kän yɛnɛ wec ɛmɛ tetdä kua̱r A-thi-ri-ya, kä bä gaŋ ɛn wec ɛmɛ.

⁷ “Kä cu I-ca-yaa jɛ loc i̱, ‘Bi nɛmɛ a nyuuthdu kä Kuoth Nhial, ɛn ɣöö bɛ min cɛ lar la̱t.

⁸ Kä nɛnɛ ɣän bä ti̱eep in ci cäŋdɛ wä piny kä theem ca̱ŋ A-ɣadh jak kä loc jɔk kɛ ka̱a̱th wäl.’ ” Inɔ cu cäŋ loc jɔk kɛ ka̱a̱th da̱ŋ wäl kä gua̱a̱th in cɛ wä thi̱n.

⁹ Kä cu min ca gɔ̱r ɛ Ɣidh-ki-yaa kuäär Juda kɛ kɔr kä mëë tëë kɛ juey kä ci jueydɛ gɔaa ɛn,

¹⁰ Cuɛ wee i̱, “Kɛ rɛy teekädä, bä yi̱k wä li̱eth, ɣän bä yi̱k wä ro̱o̱l jɔɔkni a bä tha̱a̱ŋ runikä ba̱ny piny.

¹¹ Kä cua̱ wee /cä Kuoth Nhial bi nɛn muun nɛɛni tin tëk, kä thilɛ ram mi bä nyɔk kɛ nën, kä nɛy tin cieŋ rɛy ɣɔaa.

¹² Ca duelä cu woc kä ɣä, ce̱tnikɛ kɛmɛ yiën deet, cua̱ tëkdä riy ce̱tnikɛ bi̱i̱ mi ca tɛm guäth in kɔackɛ jɛ thi̱n, cua̱ ŋa̱c ni ɣöö ci Kuoth tëkdä moc pek.

¹³ Cua̱ wiee göörä luäk amäni runwaŋ, cuɛ cɔ̱wkä nor ce̱tnikɛ lony, mi noor cɔ̱w, cua̱ ŋa̱c ni ɣöö ci Kuoth tëkdä moc pek.

¹⁴ “Ɣän cua wiee ce̱tnikɛ dit, cua̱ pa̱r ce̱tnikɛ guuk, cu wäŋkä cuuc kɛ guec puɔ̱rä. Lö Kuoth Nhial luäkä rɛy rikni ti̱ti̱.

¹⁵ Duundɛ ɣöö ɛŋu mi bä lar? Kä jɛn cɛ ruac kɛ ɣä, kä cɛ jɛ la̱t nikɛ puɔ̱nydɛ. Ɣän bä runkä diaal thuk ɛ määth, kɛ kui̱ cucä yieekädä.”

¹⁶ Lö Kuäär kɛn ti̱ti̱ kɛ kɛn tin tëk kɛ naath, kä kɛ kɛn tin diaal tin tëk kɛ ɣä. Luc ni ɣä pual pua̱a̱ny, kä jak ni ɣä kä tëk!

¹⁷ Kɛ thuɔ̱k gɔaaɛ kɛ kui̱dä kɛ ɣöö cä cuuc ɛlɔ̱ŋ, kɛ nhökdu ci ɣä kän rɛy puɔ̱ɔ̱l däkä, kä ci dueerkä diaal ba̱ny jɔk.

¹⁸ Kɛ ɣöö /ci kɔ̱a̱a̱k ji̱ dëë liak, /ci lia̱a̱ ji̱ dëë puany kɛ dit, nɛy tin wä rɛy kɔ̱kä, thilɛ kɛ ŋa̱th kɛ kui̱ gɔɔyädu.

¹⁹ Nɛy tin tëk kɛ kɛn dëë ji̱ puany tɔ̱, ce̱tkɛ mi la̱tdä mi ɛn walɛ, lät gua̱ni gan gɔɔydu gaatkiɛn.

²⁰ Bi Kuoth Nhial ɣä kän, bakɔ ji̱ kët diit kɛ thom, kɛ ni̱n teekäda diaal, rɛy luaak Kuɔth Nhial.

²¹ Kä cu I-ca-yaa wee i̱, “Akɛ ka̱nkɛ pampam ŋɔ̱a̱p, a jɛ la̱thkɛ butdä, bɛ cu gɔaa.”

²² Kä cu Ɣidh-ki-yaa wee i̱, “Ɛŋu bia̱ nyuuth ɔ kɛ ɣöö bä wä luaak Kuɔth Nhial?”