I-ca-yaa 37 - RUAC KUƆTH IN RƐL RƆ

Thiec kua̱r kɛ luek kä I-ca-yaa

¹ Kä min ci kuäär ni Ɣidh-ki-yaa jɛ liŋ, cuɛ bieynikɛ rɛ̈t kɛ jiath lɔaac, kä cuɛ la̱th ni bieyni cuali, kä cuɛ wä rɛy luaak Kuɔth Nhial.

² Kä cuɛ Ɛl-ya-kim ti̱i̱t dhɔaar kua̱r kɛnɛ Cɛb-na in la raan wec luɔ̱k, kɛ bööth palä tin di̱t ti ca rɔ̱ kum kɛ bieyni cuali jäk kä gök ni I-ca-yaa gat A-modh.

³ Kä cukɛ jɛ jiök i̱, “Ci Ɣidh-ki-yaa nɛmɛ lar, ni̱n ti̱ti̱ kɛ ni̱n ti jiäk, kɛ ni̱n bɛɛlä ti thil gɔy. Ce̱tkɛ kɛ ni̱n tin daapkɛ ni gaat, kä thilɛ buɔ̱m mi dapkɛ nikɛ.

⁴ Kä dɔ̱ŋ bi Kuoth Nhial ni Kuothdu rieet Rɛ̈b-ca-kee diaal liŋ, min ci kuäär A-thi-ri-ya jɛ ja̱k kɛ ɣöö bɛ Kuoth in tëk ben kuëth, kä ci Kuoth Nhial ni Kuothdu kuëth ti̱ti̱ mal liŋ, kä bɛ nɛy tin latkɛ kɛ duäc. Kɛ kui̱c ɛmɔ pali kɛ kui̱ nɛɛni tin ci duɔth.”

⁵ Kä min ci la̱a̱t kua̱r ni Ɣidh-ki-yaa ben kä I-ca-yaa,

⁶ cu I-ca-yaa kɛ jiök i̱, “La̱rɛ jɛ kuäärun ɛn ɣöö ci Kuoth Nhial wee i̱, ‘/Cu dual kɛ ruac in ci liŋ, min ci raan kɔar kua̱r A-thi-ri-ya jɛ lat kɛ kui̱dä.

⁷ Nɛnɛ, ɣän bä moc yiëë, bɛ thuk li̱eeŋ kä bɛ loc wi̱i̱dɛ. Kä bä jɛ jak kä li̱w kɛ ko̱r ni wi̱i̱dɛ.’ ”

⁸ Kä cu Rɛ̈b-ca-kee rɔ ri̱t, kä cuɛ kuäär A-thi-ri-ya jek ko̱o̱r kɛ Lib-na, kɛ ɣöö cɛ liŋ ɛn ɣöö ci kuäär jiɛɛn kä La-kic.

⁹ Kä mëë ci kuäär ruac liŋ kɛ kui̱ Tir-ɣa-kaa kuäär Kuc i̱, “Cɛ naath ti bi ben nyiëëny kɛ jɛ ja̱k.” Mëë cɛ jɛ liŋ, cuɛ naath jäk kä Ɣidh-ki-yaa wëë i̱,

¹⁰ “La̱tdɛ nɛmɛ Ɣidh-ki-yaa kuäär Juda i̱, ‘Ɛ Kuothdu /ci ji̱ kaŋ ɛn ɣöö /cɛ Jɛ-ru-tha-lɛm bi ka̱m kuäär A-thi-ri-ya.

¹¹ Nɛnɛ, ci mëë ci kua̱r A-thi-ri-ya jɛ lät kä mun kɛɛliw liŋ, ca jɛ da̱k ni piny. Kä ji̱n bi kään?

¹² Ci kuth dööri kɛ met kän, döör tëë ci gua̱a̱ri kɛ däk, Go-dhan, kɛnɛ Ɣa-ran. Kɛ Rɛ-dhɛp, kɛ ji̱ E-dɛn tëë cieŋ kä Tɛ-lɛ̈-thar?

¹³ Kä kuäär Ä-math kɛnɛ kuäär Ar-pad, kɛ kuäär wec Thɛ-par-wa-yim, kɛ kuäär Ɣenɛ̈ kiɛ kuäär Iwaa a nikä?’ ”

Pal Ɣidh-ki-yaa kɛ Kuoth

¹⁴ Kä cu Ɣidh-ki-yaa warɛgak ka̱n tetni ja̱a̱kni, kä cuɛ jɛ kuɛn. Kä cuɛ wä rɛy luaak Kuɔth Nhial, kä cuɛ jɛ wä ɣär nhiam Kuɔth Nhial.

¹⁵ Kä cu Ɣidh-ki-yaa pal nhiam Kuɔth Nhial wëë i̱,

¹⁶ “Aɣ, Kuoth Nhial in la Ruey Ɣɔaa ni Kuoth I-thɛ-rɛl, min te kɔm kuäärädɛ nhial wi̱i̱ pua̱nyni jaakni, ɛ ji̱n Kuoth ni kärɔa min ruaac kuäär wec muɔ̱ɔ̱n kɛɛliw. Kä ci nhial cak kɛnɛ piny.

¹⁷ Päli ji̱thku piny lö Kuoth Nhial, kä li̱ŋni. Kä lɛp wäŋku lö Kuoth Nhial, kä gui̱cni. Kä liŋ ruac Thɛ̈n-ke-rib, min kuethɛ ni Kuoth in tëk.

¹⁸ Ɛ thuɔ̱k lö Kuoth Nhial, kɛn kua̱r A-thi-ri-ya ca döör ti ŋuan däk kɛnɛ wi̱i̱kiɛn,

¹⁹ kä cikɛ kuthkiɛn yuɔr maac. Kɛ ɣöö thilɛ kɛ kuth, kɛ kuth ti la̱tkɛ kɛ tet nath, kɛ jiɛn kɛnɛ pääm. Kɛ kui̱c ɛmɔ cakɛ däk.

²⁰ Kä täämɛ lö Kuoth Nhial ni Kuothda, kän nɛy tetkädɛ, kä ba cu ŋa̱c ɛ wi̱c muɔ̱ɔ̱n kɛɛliw ɛn ɣöö ɛ ji̱n ni kärɔa la Kuoth Nhial ɔ.”

Jäkni I-ca-yaa kɛ ruac kä Kuäär

²¹ Kä cu I-ca-yaa gat A-modh Ɣidh-ki-yaa jäk kä raan wëë i̱, “Ci Kuoth Nhial ni Kuoth I-thɛ-rɛl ruac, ɛn ɣöö cɛ palu liŋ kɛ kui̱ kua̱r A-thi-ri-ya ni Thɛ̈n-ke-rib.

²² Nɛmɛ ɛ ruac in ci Kuoth Nhial ɛ lat kɛ kui̱dɛ, wëë i̱, ‘Ci nya Dha-yɔn ji̱ yɔŋ kä cɛ ji̱ dhɔt, kä ci nya Jɛ-ru-tha-lɛm wi̱cdɛ tɛ̈ŋ kɔɔru min bari rɔ.

²³ Kä ɛŋa kuethi mɔ kä yɔŋi? Kä ɛŋa kapi jɔwdu nhial kɛ jɛ mɔ, kä ɛŋa ɣäri nyinku kä nhial kɛ jɛ mɔ? Ɛ jɛn Kuoth I-thɛ-rɛl!

²⁴ Ci Kuoth Nhial kuëth kɛ kuaanyku, kä curi ruac ɛn ɣöö, kɛ thurbiɛɛlikä tin ŋuan, ɣän cä wä kɔt ni wuɔ̱thni päämni, ni nhial päämni Lɛ-ba-nɔn. Kä cä luɔ̱ɔ̱rkɛ tin ba̱r ba̱a̱r jɔap piny, kɛnɛ mɛ̈ɛ̈k thepnikɛ. Kä cä cop ni däärɛ, ni ruupdɛ min thi̱ŋ.

²⁵ Ɣän cä jier tɛt, kä cä maath kɛ pi̱ thi̱n, kä cä wäŋ diaal ko̱t kɛ pät cio̱kädä kä I-jëp.’

²⁶ “Kä /keni jɛ ku liŋ ni wal, ɛn ɣöö cä lat ni wal? Ɛn mi kua̱ lɛ jak kä tuɔɔk ɛ, ɛn ɣöö bi wi̱i̱ ti buɔ̱m buɔ̱ɔ̱m jak kä di̱r mi jiääk,

²⁷ kä bi ji̱kɛ thil buɔ̱m, bikɛ ga̱a̱r kä bikɛ pöc, bikɛ ce̱tnikɛ juaac dɔaar, bikɛ ce̱tnikɛ jol mi dek dek, bikɛ ce̱tnikɛ jol wi̱i̱ ti̱ec mi ci jiɔam ɛ lɔk a ŋot /kenɛ ni piith.

²⁸ “Ɣän ŋa̱cä jiëcdu kɛ rɔ kɛnɛ nyuuru, kɛ wädu raar kɛnɛ bendu rɛc, kɛ gakdu kɛ ɣä.

²⁹ Ɛ ɣöö ci gaak kɛ ɣä kɛnɛ liakdu cä kɛ liŋ, ɣän bä cibatdä la̱th wuumdu, kä bä ciɛkdä la̱th thokdu, kä bä ji̱ luɔc jɔk kɛ jɛn duɔ̱ɔ̱p ëë bä kɛ ji̱.

³⁰ “Kä nɛmɛ ba nyuuth kä ji̱. Ɛn waalɛ bi cam ni min ciɛk kä rɔa, kä kɛ ruɔ̱n in rɛwdɛ bi cam ni min ci duɔth thi̱n. Kä kɛ ruɔ̱n in diɔ̱ɔ̱kdiɛn bi pi̱eth, kä bi ŋɛɛr, kä pith ka̱a̱k wal kɛ kui̱ kɔaŋ kä cam dɛykiɛn.

³¹ Kä bi duɔth ji̱ dhɔaar Juda rɔ̱ yiath piny, kä bikɛ tekɛ kuay,

³² kɛ ɣöö kä Jɛ-ru-tha-lɛm bɛ te duɔth ti bä thi̱n, kä bi buɔ̱n ben Pääm Dha-yɔn. Bi tiɛɛl nho̱kä Kuɔth Nhial in la Ruey Ɣɔaa ɛ la̱t.”

³³ Kɛ kui̱c ɛmɔ ci Kuoth Nhial nɛmɛ lar kɛ kui̱ kua̱r A-thi-ri-ya i̱, “/Cɛ bi ben ɛn wi̱c ɛmɛ, kiɛ /cɛ bäär bi yuɔr ɛn wa̱nɛ, kä /cɛ bi rët kɛ nhiamdɛ kɛ ko̱t, kä /cɛ bi go̱l.

³⁴ Kɛ duɔ̱ɔ̱p ëë bäkɛ jɛ, ɛ jɛn bi loc kɛ jɛ jɔk ɔ, kä /cɛ bi ben ɛn wi̱c ɛmɛ, ruac ni Kuoth Nhial inɔ.

³⁵ Kä kɛ ɣöö ɣän bä wec ɛmɛ gaŋ, kä bä jɛ kän kɛ kui̱dä kɛnɛ kui̱ jäŋädä ni Dee-bid.”

³⁶ Kä cu jääk Kuɔth Nhial wä nhiam, cuɛ nɛy ti bathdɔɔri ti kuɔ̱r wi̱cdɛ jiɛn bädäk wi̱cdɛ dhieec näk rɛy wec ji̱ A-thi-ri-ya. Kä min ci naath keer kɛ runwaŋ, cua nɛy tɔ̱tɔ̱ jek ala ti ci li̱w kɛn diaal.

³⁷ Kä cu kuäär A-thi-ri-ya ni Thɛ̈n-ke-rib loc cieŋ, kä cuɛ wä cieŋ kä Ni-nɛ-be.

³⁸ Kä min wëë kuothdɛ ni Nith-rok pal, cu gaatkɛ Ɛ̈d-rɛ̈m-mɛ-lɛk kɛnɛ Thar-ɛ-dhɛr jɛ näk kɛ mut, kä cukɛ rɔ̱ bar ro̱o̱l Ä-ra-rat. Kä cu gatdɛ ni E-thar-ɣɛ̈-don ruëc kɛ gua̱thdɛ.