I-ca-yaa 36 - RUAC KUƆTH IN RƐL RƆ

Dhiät Thɛ̈n-ke-rib kɛ Jɛ-ru-tha-lɛm

¹ Kɛ wäl ŋuaan runi Kua̱r ni Ɣidh-ki-yaa, cu Kuäär A-thi-ri-ya ni Thɛ̈n-ke-rib ben cuɛ wi̱i̱ Juda diaal tin buɔ̱m buɔ̱ɔ̱m ben ka̱n.

² Kä cu kuäär A-thi-ri-ya Rɛ̈b-ca-kee ja̱k kä La-kic jäkɛ jɛ kä kuäär ni Ɣidh-ki-yaa kä Jɛ-ru-tha-lɛm kɛɛl kɛ rɛm mi di̱i̱t. Kä cuɛ cuɔ̱ŋ wi̱i̱ puɔ̱ɔ̱l in di̱i̱t dup kakä raam in gui̱c.

³ Ɛn wa̱nɔ cu Ɛl-ya-kim gat Ɣil-ki-yaa gui̱i̱c dhɔaar kua̱r kɛnɛ Cɛb-na min la raan wec luɔ̱k, kɛ bulkamiin ni Yowa gat A-thap ben kä jɛ.

⁴ Kä cu Rɛ̈b-ca-kee kɛ jiök i̱, “La̱rɛ jɛ Ɣidh-ki-yaa i̱ ci kuäär in di̱i̱t kuäär A-thi-ri-ya nɛmɛ lar. Ɛŋu mi ŋääthi?

⁵ Caari jɛ kɛn rieet ti̱ti̱ dëë ko̱r tɛr? Ɛŋa ŋääthi ɔ, mɔ curi gaak kɛ ɣä mɔ?

⁶ Kä nɛnɛ ji̱n ŋääthi ni I-jëp min ce̱tkɛ kɛɛt wääthä, min la ri̱el tet raam mi ci rɔ nhiɛt kɛ jɛ. Ɛ jɛn ce̱tkɛ min la kuäär I-jëp ni Pɛro jɛ a lät kä nɛy tin ci rɔ nɔ̱a̱k jɛ.

⁷ Duundɛ ɣöö mi wi̱i̱ ɣä jiök i̱, ‘Cakɔ rɔ̱ nɔ̱a̱k Kuoth Nhial ni Kuothda,’ /ciɛ jɛn ɛn nëë ci Ɣidh-ki-yaa gua̱th palikɛ kɛnɛ yi̱knikɛ däk, mëë jio̱k Juda kɛnɛ Jɛ-ru-tha-lɛm i̱, ‘Bia pal nhiam yi̱kä nɛmɛ’?

⁸ Bër latdɛ mat yɛnɛ kuäärä ni kuäär A-thi-ri-ya. Ɣän bä ji̱ ka̱m jiöŋkööri ti bathdɔɔri rɛw, mi bi nɛy ti bakɛ kɔt luäŋ kɛ jek.

⁹ Kä deri raan kɔar kua̱rä kulɛ loc i̱di kä ji̱ kɔar kua̱r A-thi-ri-ya tin tiɛni, a bi wä ŋäth ni I-jëp kɛ kui̱ thurbiɛɛli kɛnɛ ji̱ jio̱ŋko̱o̱ri?

¹⁰ Kä min dɔ̱ŋ /ciɛ ɣän ɛn nëë mäk ɛn gua̱a̱th ɛmɛ kä däk jɛ, kä thilɛ riet kä Kuoth Nhial? Kä cu Kuoth Nhial ɣä jiök i̱, ‘Wër däkɛ ɛn wec ɛmɔ.’ ”

¹¹ Kä cu Ɛl-ya-kim kɛnɛ Cɛb-na kɛ Yowa Rɛ̈b-ca-kee jiök i̱, “Ruacni kɛ kuaanyku kɛ thok A-ra-mik, kɛ ɣöö liŋ nɛy ɛ. /Cu ruac kɛ kɔ kɛ thok ji̱ Juda, ba liŋ ɛ nɛy tɔ̱ te pa̱a̱ny tɔ̱.”

¹² Duundɛ ɣöö cu Rɛ̈b-ca-kee kɛ jiök i̱, “Jäk kuäärä ɣä i̱ bä rieet ti̱ti̱ la̱t yɛ kɛ kuäärun, /cɛ ɣä jäk kä nɛy ti te nyuurä wi̱i̱ pa̱a̱ny ti, ti ba cam ni wawdiɛn kä ba math ni cowkiɛn ce̱tkɛ yɛ ti?”

¹³ Kä cu Rɛ̈b-ca-kee lööŋ kɛ jɔw mi di̱i̱t kɛ thok ji̱ Juda i̱, “Liɛŋɛ ruac kua̱r in di̱i̱t kuäär A-thi-ri-ya!

¹⁴ Ci kuäär wee i̱, ‘A yɛ /ca kaŋ ɛ Ɣidh-ki-yaa kɛ ɣöö /cɛ yɛ bi luäŋ kɛ ka̱n.

¹⁵ Kä a yɛ /cɛ jak kä ŋa̱thɛ ni Kuoth Nhial, kɛ ɣöö jio̱kɛ yɛ i̱ bi Kuoth Nhial kɔn dhil kän, kä /cɛ wec ɛmɛ bi ka̱m kuäär A-thi-ri-ya.’

¹⁶ Kä yɛn /cuarɛ ruac Ɣidh-ki-yaa liŋ. Kɛ ɣöö ci kuäär A-thi-ri-ya jɛ lar i̱, ‘Bia kä ɣä banɛ mal ben lat. Kä bi ramɔ bɛl kakädɛ cu cam, kä bi ramɔ cu maath rɛy jiɛwdɛ.

¹⁷ Amäni mi cä yɛ ben naŋ muun mi ce̱tkɛ mundun, mun bɛɛl mun ka̱a̱kni wal kɛ kui̱ kɔaŋ.

¹⁸ Ɛ Ɣidh-ki-yaa /ci yɛ mɛt kɛ ɣöö bathɛ yɛ i̱ bi Kuoth Nhial kɔn luäk. Tëë kɛ döör ti ci kuthkiɛn kɛ kɔŋ kän tetdä kua̱r A-thi-ri-ya?

¹⁹ Kuth ji̱ Ä-math kɛnɛ ji̱ Ar-pad a nikä? Kä kuth ji̱ Thɛ-par-wa-yim a nikä? Cikɛ Tha-mɛ-ria kän tetkädä?

²⁰ Ɛ kuoth indiɛn kä kuth döör mɔ ci wecdiɛn kän ɔ tetkädä, mɔ dëë Kuoth Nhial Jɛ-ru-tha-lɛm kän tetkädä mɔ?’ ”

²¹ Duundɛ ɣöö cukɛ biɛt /ka̱n jɛ loc kɛ riet, kɛ ɣöö ci kuäär kɛ jiök i̱, “/Cuarɛ jɛ loc.”

²² Kä cu Ɛl-ya-kim gat Ɣil-ki-yaa gui̱i̱c dhɔaar kua̱r kɛnɛ Cɛb-na in la raan wec luɔ̱k Yowa, kɛ gat A-thap min la bulkamiin ben kä Ɣidh-ki-yaa kɛ bieyni ti ci rɛ̈t kɛ jiath lɔaac, kä cukɛ jɛ la̱t ruac Rɛ̈b-ca-kee.