I-ca-yaa 35 - RUAC KUƆTH IN RƐL RƆ

Luny lueekä kä Dha-yɔn

¹ Bi därdɔaar kɛnɛ mun in kööt lo̱ckiɛn tɛɛth, bi dɔr rɛ̈w lɔcdɛ tɛɛth, kä bi juaackɛ gaakni kuir, ce̱tnikɛ gaakni waŋrial,

² bikɛ kuer ɛlɔ̱ŋ. Kä bi lo̱ckiɛn tɛɛth bikɛ ki̱et. Kä ba Lɛ-ba-nɔn ka̱m liakdɛ, amäni liak Kar-mɛl kɛnɛ Ca-ron. Kɛn bikɛ buay Kuɔth Nhial nɛn, ɛn buɔ̱m Kuɔthda.

³ Bum tet raam mi kɔ̱c, kä luäk ram mi kɔ̱c mua̱a̱lkɛ.

⁴ Kä jio̱kni nɛy tin dual lo̱ckiɛn i̱, “Buɔ̱mɛ, kä /cuarɛ dual! Kä nɛnɛ, Kuothdun bɛ ben, jɛn bɛ ben kɛ cut, bɛ ben bɛ ji̱ tɛ̈run duäc. Bɛ ben bɛ yɛ ben kän.”

⁵ Inɔ bi wäŋ ciööri lɛ̈p, kä bi ji̱th mi̱eŋni liɛŋ.

⁶ Kä bi ŋɔl rɔ yuɔ̱ɔ̱r ce̱tnikɛ kɛ̈w, kä bi ram mi gi̱i̱k ki̱et kɛ tɛ̈th lɔaac. Kä bi pi̱w ben därdɔaar, bi wäŋ pi̱i̱ni lo̱o̱ny rɛy däärdɔaar rɛ̈w.

⁷ Kä bi därdɔaar a pul pi̱i̱ni, kä bi mun in kööt a lil pi̱i̱ni, kä bi gua̱th ciɛŋä guɔɔri a dhiac, bi do̱ny ni guɔ̱t kɛnɛ juaac thi̱n.

⁸ Kä bi duɔ̱p tin di̱t te thi̱n, kä bakɛ cɔli Duɔ̱p tin Gɔw, kä /ci nɛy tin jiäk bi ja̱l kɛ jɛ, /ci ji̱ dueeri bi rët kɛ jɛ. Bi ja̱l ni nɛɛ Kuɔth kɛ jɛ, kä /ci dɔ̱a̱a̱r bi ja̱l kɛ jɛ.

⁹ Kä bɛ thil lony mi te thi̱n, kä thilɛ mi̱eeth leeyni, tin kɔ̱ŋ ti bi ben thi̱n. Thilɛ mi ba jek ɛn wi̱ni kä kɛ, duundɛ ɣöö bi ja̱l ni nɛy tin ca luɛl thi̱n.

¹⁰ Kä bi nɛɛ Kuɔth Nhial tin cɛ luɛl luny jɔk, bikɛ ben kä Dha-yɔn ɛ kɛ̈tkɛ diit, bikɛ tekɛ tɛ̈th lɔaac mi thil pek, bikɛ tekɛ tɛ̈th lɔaac kɛnɛ gɔɔy lɔaac, bi jiath lɔaac kɛnɛ lul rɔ̱ bar kä kɛ.