I-ca-yaa 34 - RUAC KUƆTH IN RƐL RƆ

Bi Kuoth ji̱ tɛ̈rɛ luk

¹ Bia thiekä lö döör, bia li̱eŋɛ, kä pa̱lɛ ji̱thkun piny lö naath! Ɛ wi̱c muɔ̱ɔ̱n liŋ jɛ kɛnɛ tin diaal tin cieŋ thi̱n, ɛ ɣɔw kɛɛliw liŋ jɛ kɛnɛ tin diaal tin bä raar thi̱n.

² Kuoth Nhial gakɛ kɛ döör diaal, te ŋɛ̈ɛ̈nydɛ kɛ rɛmkiɛn diaal, bɛ kɛ näk, bɛ kɛ jak kä na̱kɛ kɛ.

³ Ba nɛɛkiɛn tin ci li̱w yuɔr raar, kä bi pua̱nykiɛn ŋuäny, kä bi pääm diaal lo̱o̱ny kɛ riɛm.

⁴ Bi nyin puɔ̱ɔ̱rä diaal thia̱y, kä bi pua̱a̱r rɔ riy ce̱tnikɛ bok. Kä bi nyinkɛ diaal pɛ̈ɛ̈n, ce̱tnikɛ min la ji̱th buɔ̱cä a pɛn, kɛnɛ min la ji̱th jiaath ŋɔ̱a̱p a pɛn.

⁵ Ci Kuoth Nhial thɛpdɛ rialikä ni puɔ̱ɔ̱rä, bɛ wä däk ni Ɛ-dɔm, nɛy tin ca da̱k ni piny.

⁶ Thɛp Kuɔth Nhial cɛ bony rɛy riɛm, ca jɛ kum ɛ thiɔl, ɛ riɛm deet rɔɔmni kɛnɛ böwni, kɛ thiɔl rokni rueethni deet rɔɔmni. Kɛ ɣöö te Kuoth Nhial kɛ muc kä Bɔ-dhɛ-ra, kä di̱t näkdɛ ikä muun Ɛ-dɔm.

⁷ Bi naath tëth ce̱tnikɛ mok, kɛnɛ rueeth thääkni kɛ thääk tin di̱t. Bi mundiɛn maath kɛ riɛm, kä bi tup maath kɛ thiɔl.

⁸ Te Kuoth Nhial kɛ cäŋ cutdä, tëë kɛ ruɔ̱n mi bɛ luk ni ji̱ tɛ̈r Dha-yɔn.

⁹ Kä bi kiɛr Ɛ-dɔm pɛ̈t kɛ mac, kä bi mundɛ waaŋ, kä bi mun kɛɛliw pɛ̈t ce̱tnikɛ ja̱th.

¹⁰ Bɛ pɛ̈t kɛ wäär kɛnɛ cäŋdäär a thil mi yieny jɛ, kä bi tolɛ wä ni puɔ̱ɔ̱rä a thil pek. Bɛ te ni baaŋ ri̱c kɛ ri̱c, kä thilɛ ram mi bi rët kɛ jɛ amäni cäŋ kɛl.

¹¹ Ba jɛ ka̱n ɛ muɔ̱lguɔ̱ɔ̱c, bi cieŋ ni manliɛɛthni kɛnɛ jakɔa̱a̱k thi̱n. Bi Kuoth theem däkä nööŋ kä Ɛ-dɔm, bɛ theem däkä nööŋ thi̱n.

¹² Kä bikɛ jɛ cɔli thilɛ Kuäär ɛn wi̱ni, kä bi ruëëckɛ diaal cu thil.

¹³ Bi do̱ny ni kuiy wi̱i̱nikɛ tin di̱t, kä bi do̱ny ni juaac puɔ̱ɔ̱ny kal wec. Bɛ la ni gua̱a̱th ka̱k guɔɔri, kä bɛ la ni dhɔr wuɔ̱tni.

¹⁴ Kä bɛ la gua̱a̱th ro̱mä nyaawni dɔaar kɛnɛ ya̱a̱k, bɛ la gua̱a̱th mi ro̱m jɔɔk thi̱n, kä bi yiey thuɔ̱ɔ̱mni, gua̱a̱th lɔ̱ŋä go̱r thi̱n.

¹⁵ Bi manliɛɛthni duëlkiɛn la̱t thi̱n, kä ba toŋkiɛn kuɛm ɛn wi̱ni, kä ba nyin tiɛtnikiɛn kul kɛ gɔ̱kiɛn, bi ka̱t dɛykiɛn ruɔ̱ɔ̱l ɛn wi̱ni, mɔ kɛnɛ rɛwdɛ.

¹⁶ Guicɛ rɛy buɔk Kuoth Nhial kä kuɛnɛ. Thilɛ kɛl kä ti̱ti̱ mi bi te jɔ̱ɔ̱r, thil mi bi rɛwdɛ te jɔ̱ɔ̱r. Kɛ ɣöö ɛ Kuoth Nhial laar jɛ mɔ, bi yiëë kɛ ruɔl guäth kɛl.

¹⁷ Ci Kuoth kɛ dääk kä mun kɛ yor gaakni, cɛ ram ɔ ka̱m kui̱dɛ, bikɛ jɛ ka̱n amäni cäŋ kɛl, bikɛ cieŋ thi̱n ri̱c ɔ nikɛ ri̱c ɔ.