I-ca-yaa 33 - RUAC KUƆTH IN RƐL RƆ

Pal kɛ kui̱ luäkä

¹ Riɛk akɛ ji̱ lö dääk, ji̱n ram mi /ka̱n met däk, riɛk akɛ ji̱ lö gua̱n luɔm, ji̱n ram mi /ka̱n met luɔm! Mi wi̱i̱ däk nath wä päl, ba ji̱ däk, kä mi wi̱i̱ lom nath wä päl, ba ji̱ cu luɔm bä.

² Lö Kuoth Nhial gɔaani kɛ kɔ, kɔn liɛpkɔ ni ji̱. Jakni rɔ kä buɔ̱mda kɛ runwaŋni diaal, kä jakni rɔ kä käända kɛ gua̱a̱th rikä.

³ Kɛ ma̱r jɔawdu la naath rɔ̱ a bar, kɛ jiëcdu kɛ rɔ la döör rɔ̱ a riaw piny.

⁴ Ba kuakun pɛc lö döör, ce̱tnikɛ min la kɔaryɔamni rɔ̱ a määt, ce̱tkɛ min la ra̱a̱kni rɔ̱ a yuur, bi naath rɔ̱ yuɔ̱ɔ̱r thi̱n.

⁵ Kuoth Nhial di̱tdɛ, kä cieŋɛ ni nhial, jɛn bɛ Dha-yɔn thiäŋ kɛ thuɔ̱k kɛnɛ cuŋ.

⁶ Kä ɛ jɛn bia̱ päl piny kä yɛ mɔ, tëë kɛ ka̱n mi di̱i̱t kɛnɛ pɛl kɛ ŋäc ŋɔaani, kä luth Kuɔth Nhial ɛ jɛn la ria̱ŋdɛ mɔ.

⁷ Kä nɛnɛ wutni tin buɔ̱m buɔ̱ɔ̱m wieekɛ rɛy duɔ̱pni, kɛn ji̱ malä cikɛ wiee ɛlɔ̱ŋ.

⁸ Ca duɔ̱p tin di̱t päl baaŋ, ci ja̱a̱l duɔ̱pni ja̱l päl. Ca mat ruaacni däk, kä ca ɣöö bi kɛn a nëën lo̱k, thilɛ ram mi lɛ̈n lɛ luɔ̱th.

⁹ Mun pärɛ kä cɛ kööt, ci Lɛ-ba-nɔn pöc a cɛ rɔɔl, ci Ca-ron ce̱tnikɛ därdɔaar, kä ci ji̱th jiɛn Ba-can kɛnɛ Päm Kar-mɛl pɛ̈ɛ̈n.

Luek Kuɔth kɛ ji̱ tɛ̈rɛ

¹⁰ Kä cu Kuoth Nhial wee i̱, “Ɣän bä rɔ jiɛc ɛn täämɛ, ɣän bä rɔ jiac nhial, ɣän bä buɔ̱mdä nyoth täämɛ.

¹¹ Yɛn la̱tdɛ ca̱a̱p ti jiäk, kä tin la̱tdɛ kɛ jiäk, kä yiëëdun ɛ mac mi bi yɛ waŋ.

¹² Kä bi naath waaŋ ce̱tnikɛ mim, bikɛ waaŋ ce̱tnikɛ kuiy ti waŋ kɛ mac.”

¹³ Kä yɛn tin te nɔ̱nä, liɛŋɛ min cä la̱t, kä yɛn nɛy tin te thiekä ŋa̱cɛ buɔ̱mdä.

¹⁴ Ji̱ dueeri Dha-yɔn dualkɛ, lathɛ nɛy tin thil Kuoth, wäkɛ i̱, “Ɛŋa rɛydan dëë cieŋ rɛy maac ɛ pɛt naath ɛ? Ɛŋa kä kɔn dëë cieŋ rɛy maac in thil pek ɔ?”

¹⁵ Kä nɛy tin lät ni cuŋ, kä latkɛ ni ruac mi cuɔ̱ɔ̱ŋ, kä lökɛ ɣöö ba ŋɔak jek kɛ mac nath, kä /ca mi kɔakɛ kɛ kän, kä /ca ruac luɔ̱c nath liŋ, kä lökɛ ɣöö ba mi jiääk guic,

¹⁶ kɛ kɛn nɛy tin bi cieŋ malä, bi gua̱a̱th ga̱ŋdiɛn a päm mi bum, bikɛ tekɛ mi̱eth mi ro̱ŋ, kä bi pi̱i̱kiɛn te thi̱n.

Ŋa̱th kɛ kui̱ gɔɔyä mi bi ben

¹⁷ Bi wäŋkun kuäär nɛn rɛy gɔɔyädɛ, bia mun in räth ni nɔ̱nä nɛn.

¹⁸ Kä bi car ni rik tëë wal wi̱i̱ i̱, “Jɛn a nikä ɛn bo̱o̱th rɛ̈m ëëdan? Jɛn a nikɛ ɛn ram ëë la tho̱lbo̱k ɛ thol? Jɛn a nikä ɛn ram ëë la bo̱o̱th biɛɛni?”

¹⁹ /Cikɛ bi nyɔk kɛ nën kɛn ji̱ liakä, kɛn nɛy tin kueckɛ ruacdiɛn, nɛy tin /ca thokdiɛn dëë met ŋa̱c.

²⁰ Guic Dha-yɔn wec in canɛ mɛk kɛ ɣöö banɛ la ti̱emnɛ thi̱n! Bi wäŋkun Jɛ-ru-tha-lɛm nɛn, ɛn wec malä, kɛmɛ mi /ca bi wany, ca lo̱cdɛ bi met do̱th, kä thilɛ depdɛ mi bi met puɔ̱t.

²¹ Ɛn wi̱ni Kuoth Nhial ba buɔ̱mdan, bɛ ce̱tnikɛ mun kiɛri mi di̱i̱t kɛnɛ löli, ti thilɛ riäy mi ba gɛr kɛ law thi̱n, kä thilɛ babuur mi bi rët kɛ kɛ.

²² Kɛ ɣöö Kuoth Nhial ɛ luukda, Kuoth Nhial ɛ rueecda, ɛn Kuoth Nhial ɛ kuäär, jɛn bɛ kɔ kän.

²³ Dep babuurädu lɔrkɛ, kä /ca bi̱i̱dɛ dëë luäŋ kɛ rɔm guäthdɛ, kä /ci bieynikɛ rɔ̱ luäŋ kɛ ɣär. Kä ba kuak ti ŋuan ti ca pɛc da̱a̱k, amäni ŋöt bikɛ pɛɛc.

²⁴ Kä bɛ thil ram mi cieŋ kä Dha-yɔn mi bi wee i̱, “Ta̱a̱ kɛ juey”, kä ba dueer nɛɛni tin cieŋ ɛn wi̱ni päl.