I-ca-yaa 32 - RUAC KUƆTH IN RƐL RƆ

Kuäär mi gɔaa mi bi ben

¹ Nɛnɛ bi kuäär kuɔ̱m kɛ cuŋ, kä bi bööth ruëc kɛ thuɔ̱ɔ̱k.

² Bi ram ɔ ce̱tnikɛ duel rɛy jiɔam, bɛ ce̱tnikɛ ko̱t rɛy thuɔ̱ɔ̱l, bɛ ce̱tnikɛ lo̱o̱l pi̱i̱ni guäth mi kööt, ce̱tdɛ nikɛ ti̱eep pa̱a̱m mi di̱i̱t rɛy rɛ̈w.

³ Ɛn wa̱nɔ bi wäŋ nɛɛni tin gui̱c cu guic, kä bi nɛy tin li̱ŋ cu liɛŋ.

⁴ Bi nɛy tin la diɛr tekɛ ŋäc ŋɔaani, kä bi nɛy tin la gi̱k ruac ɛ jɔc.

⁵ Kä /ca dɔ̱a̱r bi cɔli ram mi tekɛ ŋäc, kä /ca ram mi yɔŋ naath bi luɔ̱th.

⁶ Kɛ ɣöö dɔ̱a̱r bɛ la̱t ni nyin dɔ̱ɔ̱rä, kä la caarɛ ni ti jiäk, la lätdɛ ni dueer, kä caarɛ ni ti jiäk kɛ kui̱ Kuɔth Nhial, kä bänyɛ gua̱th buath piny ɛ thil mi̱eth, kä penɛ gua̱th rɛ̈w pi̱w.

⁷ Ram mi dɔ̱a̱r la lätdɛ ni ti jiäk, la cääpɛ ni nyin jiäkni, kä la däkɛ can kɛ ruac mɛɛtdä, ɛ cäŋ thiec ɛ cuɔ̱ɔ̱ŋ.

⁸ Duundɛ ɣöö ram mi gɔaa la caarɛ ni ti gɔw, kä la cuŋɛ ni rɛy lätni ti gɔw.

Luek mään ti ci ria̱ŋ

⁹ Jiacɛ rɔ̱ lö yɛn män tin thil riɛk, kä liɛŋɛ ruacdä, liɛŋɛ min latdä lö nyier tin ci ria̱ŋ.

¹⁰ Kɛ gua̱a̱th mi ce̱tkɛ ruɔ̱n, bia dual lö män tin ci ria̱ŋ, kɛ ɣöö bɛ thil buɔ̱cni ti ba ŋɛr, kä thilɛ dɛy jiɛn ti ba pon.

¹¹ A yɛ lathɛ lö män tin ci ria̱ŋ, yɛn nɛy tin cieŋ a thil riɛk, luɔnyɛ bieynikun ta̱yɛ juutdä, riɛthɛ ni lɛtkun kɛ cuali.

¹² Pa̱tdɛ ni lo̱ckun kɛ ɣöö /ken ka̱a̱k tin gɔw ciɛk, kä ci kak wal kɛ kui̱ kɔaŋ thil dɛy,

¹³ kɛ ɣöö ci do̱ny ni kuiy kɛnɛ wa̱th muun nɛɛnikä, kɛ thuɔ̱k parɛ dho̱r diaal tin tɛth lo̱c nath thi̱n kɛnɛ wec in thieŋ kɛ tɛ̈th lɔaac.

¹⁴ Ba dho̱r tin bum pa̱l ruëëc, kä ba wi̱i̱ tin ciaŋkɛ ɛlɔ̱ŋ päl, dho̱r kɛnɛ biɛɛni ga̱ŋ bi kɛn a duël leeyni amäni cäŋ kɛl, ba nhɔk ni jɛ ɛ muɔ̱li, kä ba gua̱a̱th la̱k deet,

¹⁵ amäni mi ca kɔn wuɔ̱c yiëë ni nhial, a bi därdɔaar a mun ciɛkä bɛɛl, kä bi mun ciɛkä bɛɛl a rup.

Ruec Kuɔth malä

¹⁶ Ni därdɔaar ba thuɔ̱k jek thi̱n, kä bi cuŋ te muun ciɛkä bɛɛl.

¹⁷ Kä bi dɛy cuŋni a mal, bi luɔt cuŋni a päl piny kɛnɛ ŋa̱th amäni cäŋ kɛl.

¹⁸ Bi nɛɛkä cieŋ guäth malä, bikɛ cieŋ guäth malä mi tekɛ päl piny.

¹⁹ Cäŋ bi nhiaal guiiyni rup däk, kä bi wec da̱k kɛɛliw.

²⁰ Tɛ̈th lɔaac akɛ yɛn nɛy tin ci pi̱eth gëëkni pi̱i̱ni diaal, tin ca thääk kɛnɛ muɔ̱li lony ɛ lɔr.