I-ca-yaa 31 - RUAC KUƆTH IN RƐL RƆ

Thil lotdä matdä kɛ I-jëp

¹ Riɛk akɛ nɛy tin wa luäk go̱r kä I-jëp, nɛy tin ŋa̱thkɛ ni jiöŋkööri, nɛy tin ŋa̱thkɛ ni thurbiɛɛli kɛ ɣöö ŋuankɛ, kä ŋa̱thkɛ ni ji̱ jiöŋkööri kɛ ɣöö bumkɛ, tin /ca guic ni Kuoth I-thɛ-rɛl in rɛl gɔɔydɛ rɔ, kä /ca luäk go̱r kä Kuoth Nhial!

² Kä Kuoth pɛlɛ, la no̱o̱ŋɛ da̱k, kɛ rieetkɛ la no̱o̱ŋɛ da̱k, duundɛ ɣöö bɛ rɔ jiɛc kui̱ dhɔaar ram in lät jiäk, kɛnɛ nɛy tin la lua̱kɛ ji̱ la̱a̱t jiääkni.

³ Ji̱ I-jëp kɛ naath /cikɛ Kuoth, kä jiöŋkööri köör kɛ ri̱ŋ /cikɛ yiey. Mi wä Kuoth Nhial tetdɛ wä riny, bɛ luääk lath, kä bi ram in lua̱kɛ cu pɛ̈ɛ̈n, bikɛ cu li̱w kɛɛl.

⁴ Kä nɛmɛ ɛ min ci Kuoth Nhial ɛ la̱r ɣä wëë i̱, “Ce̱tkɛ min la lony kiɛ dɔw luɔny a bur kä ley mi cɛ cam, a cäŋ ci yiëën deet rɔal kɛ jɛ, /cɛ la dualɛ kɛ jɔwdiɛn, kiɛ /cɛ diɛɛr kɛ rɔaliɛn. Inɔ bi Kuoth Nhial in la Ruey Ɣɔaa ben piny, bɛ ko̱r ben tɛr wi̱i̱ Pa̱a̱m Dha-yɔn kɛnɛ päämkɛ.

⁵ Kuoth Nhial in la Ruey Ɣɔaa bɛ Jɛ-ru-tha-lɛm gaŋ ce̱tnikɛ diit ti räp ti gaŋkɛ dɛykiɛn, bɛ jɛ gaŋ kä bɛ jɛ kän, bɛ jɛ nhɔk kä bɛ jɛ luäk.”

⁶ Luɔ̱nyɛ kä Kuoth yɛn ji̱ I-thɛ-rɛl tin ca jɛ gak.

⁷ Kɛ ɣöö ɛn cäŋ ɛmɔ bi ram ɔ kuthkɛ tin cɛ la̱t kɛ ciɛk in bo̱r kɛnɛ kuth tin cɛ la̱t kɛ da̱a̱p yäk, tëë ci yɛn duer kɛ lätnidiɛn.

⁸ “Ji̱ A-thi-ri-ya bikɛ li̱w ko̱o̱r mi /ci mɔ a ko̱r nath, ba jɛ thuk ɛ ko̱r mi /ci mɔ a ko̱r ran, kä bɛ rɔ bar kɛ ko̱r, kä ba ŋuɛ̈tnikɛ kuɔ̱k lät kuaanyä.

⁹ Kä bi ti̱eckɛ tin bum da̱k, kä bi bööth rɛ̈mdɛ dual,” ruac ni ɣän Kuoth Nhial min te macdɛ kä Dha-yɔn, min palkɛ kä Jɛ-ru-tha-lɛm.