I-ca-yaa 30 - RUAC KUƆTH IN RƐL RƆ

Thi̱ŋ nath kɛ rɔ kä I-jëp thilɛ luɔt

¹ Cu Kuoth Nhial wee i̱, “Riɛk akɛ gaat tin ci kac raar, tin la̱tkɛ cär ti /ci tɔ̱ a cärkä, tin la̱tkɛ mat ruac mi /ka̱n car, matkɛ ni duer wi̱i̱ dui̱rä.

² Nɛy tin wä kä I-jëp, a /ci kɛn ruac thiec kä ɣä, wa ga̱ŋ go̱r ni kä Pɛro, kä wa rɔ lua̱k rɛy ti̱pä I-jëp!

³ Kɛ kui̱c ɛmɔ, bi ga̱ŋ Pɛro rɔ loc ala pöcdun, kä bi luäkdun kɛ rɔ̱ rɛy ti̱pä I-jëp, rɔ loc ni ciaŋ jiääk kä yɛ.

⁴ Ɛ cäŋ te ji̱ kɔaarun nikä Dho-an, kä ci nɛy tin ci ja̱k cop nikä Ɣa-neth,

⁵ ba kɛn diaal jak kä po̱c, kɛ kui̱ nɛɛni ti thilɛ mi dëë lät kä kɛ, nɛy ti thil mi dëë luäk nikɛ kiɛ mi dëë jek kä kɛ, a ni pöc kɛnɛ buar.”

⁶ Nɛmɛ ɛ nyuuth kɛ kui̱ leeyni Nɛ-gɛb. Mun Nɛ-gɛb ɛ gua̱a̱th rikä kɛnɛ cuɔ̱c, ɛ gua̱a̱th mi thi̱eŋ kɛ lony, ɛ mun thɔ̱ɔ̱li ti na̱kɛ naath, la ja̱a̱lkɛ kuakiɛn a kapkɛ kɛ ɛ muɔ̱li, kä kapkɛ yio̱o̱kiɛn ɛ thɔ̱a̱rɔa̱a̱li, nöŋkɛ kɛ nɛy ti /cikɛ dëë luäk.

⁷ Kɛ ɣöö luäk I-jëp thilɛ jɛ luɔt kä ɛ baŋ, kɛ kui̱c ɛmɔ cɔalä jɛ i̱, “Ra-ɣab mi thil la̱t.”

Nɛy ti thil luth

⁸ Täämɛ wër gɔ̱ri jɛ piny rɛy warɛgakä nhiamdiɛn, latdɛ rɛy buɔk, kɛ ni̱n tɔ̱ bi ben tɔ̱ bɛ la neen amäni cäŋ kɛl.

⁹ Kɛ ɣöö kɛ nɛy ti ca rɔ̱ ri̱t, kɛ gaat ti ji̱ mɛɛtdä, kɛ gaat ti /ca luek Kuɔth Nhial liŋ,

¹⁰ nɛy ti jiökɛ ti̱t i̱, “/Cuarɛ nyuuthni nɛn”, kä jiökɛ go̱o̱k i̱, “/Cuarɛ kɔ lät thuɔ̱k, la̱tdɛ ni kɔ ruaacni ti gɔw, la̱tdɛ kɔ ni ruaacni baaŋ.

¹¹ Kä pa̱lɛ duɔ̱ɔ̱p wiaa gekä, a thil mi liɛŋkɛ kɛ kui̱ Kuɔth I-thɛ-rɛl.”

¹² Kɛ kui̱c ɛmɔ cu Kuoth I-thɛ-rɛl wee i̱, “Kɛ ɣöö ci yɛn ruac ɛmɛ lo̱k, cia nhɔk ni ciaŋ jiääk, kä ŋa̱thɛ ni kac,

¹³ kɛ kui̱c ɛmɔ bi duer ɛmɛ ce̱tnikɛ päny mi bäär mi baak rɔ mi go̱o̱r tëth, mi pär naath ikä kɛ ria̱p.

¹⁴ Bɛ tiath ce̱tnikɛ dhaar muɔ̱ɔ̱n, mi ci tiath a ci nuɔɔr, mi thilɛ ŋɛt mi dëë jek thi̱n mi dëë kuany ni ruɛ̈l maac, kiɛ mi dëë jɔm ni pi̱w rɛy waŋ.”

¹⁵ Kä cu Kuäär ni Kuoth, Kɛl I-thɛ-rɛl in Rɛl Gɔɔydɛ rɔ wee i̱, “Luɔ̱nyɛ kä ɣä kä ŋa̱thɛ ni ɣä bia kään, kä ciaŋ bitdä kɛnɛ ŋa̱th ba buɔ̱mdun.” Kä /ci yɛn ɛ go̱r i̱ bia la̱t,

¹⁶ duundɛ ɣöö bia wee i̱, “Eey! Bakɔ rɔ̱ bar kɛ jiöŋkööri,” kɛ kui̱c ɛmɔ bi rɔ bar, kä bi wee i̱, “Bakɔ kɔt kɛ jiöŋkööri ti pual puaal,” kɛ kui̱c ɛmɔ bi nɛy tin guɔ̱ɔ̱rkɛ ji̱ pual.

¹⁷ Bi nɛy ti bathdɔɔr rɔ̱ bar kɛ ram kɛl, kä bia rɔ̱ bar kɛ nɛy da̱ŋ dhieec, amäni mi cia duɔth kä rɔ̱ ce̱tkɛ taŋ bɛ̈r mi te wi̱i̱ pa̱a̱m, ce̱tnikɛ bɛɛr wi̱i̱ pa̱a̱m.

Puɔ̱th Kuɔth kɛ Dha-yɔn

¹⁸ Kä ŋotdɛ go̱o̱r Kuoth ɣöö bɛ gɔaa kɛ yɛ, kɛ kui̱c ɛmɔ cɛ rɔ jiɛc kɛ ɣöö bɛ yɛ nyuɔ̱th kɔ̱a̱c lɔaac. Kɛ ɣöö Kuoth Nhial ɛ Kuoth mi gua̱n cuŋni, puɔ̱th akɛ nɛy diaal tin liɛpkɛ ni jɛ.

¹⁹ Yɛn nɛy tin cieŋ kä Jɛ-ru-tha-lɛm, /cia rɔ̱ bi nyɔk kɛ wiee. Kuoth Nhial bɛ tekɛ kɔ̱a̱c lɔaac mi di̱i̱t kɛ yɛ mi wä yɛn ɛ thiec kɛ luäk. Mi wëë jɛ liŋ bɛ yɛ loc.

²⁰ Cäŋ ni min ci Kuäär yɛ moc ciaŋ mi bɛc, /ci ram in ŋi̱i̱c yɛ rɔ bi nyɔk kɛ tëë, bi yɛn ɛ nɛn nikɛ wäŋkun.

²¹ Mi wä yɛn rɔ̱ riet cuëëc kiɛ caam, bia jɔw liŋ jɔk kɛ ji̱thkun mi wee i̱, “Nɛmɛ ɛ jɛn duɔ̱ɔ̱p, ja̱lɛ kɛ jɛ.”

²² Kä bia kuth tin cia la̱t kɛ yiëth in bo̱r kɛnɛ kuth tin cia la̱t kɛ da̱a̱p cu yäk. Kä bia kɛ yiäk ce̱tkɛ ti jiäk, kä biakɛ jiök i̱, “Wuɔcɛ rɔ̱!”

²³ Kä bɛ kuay tin ci piɛth piny moc kɛ nhiaal, bi cu tekɛ bɛl ti ŋuan. Ɛn cäŋ ɛmɔ bi ɣɔ̱ɔ̱ku tekɛ wal ti ŋuan.

²⁴ Kä bi thääku kɛnɛ muɔ̱liku tin puɔ̱rkɛ mun cam ni wal ti görkɛ, bikɛ ka̱m kɛ rɛy diënyni mi̱ethdiɛn.

²⁵ Kɛ cäŋ na̱k nath in di̱i̱t, mi wä biɛɛni wä tɛɛth, bi pääm diaal tin bär lo̱o̱ny kɛ pi̱w.

²⁶ Kä bi pay buay ce̱tnikɛ cäŋ, kä bi buay ca̱ŋ rɔ loc nikä bärɔw, bɛ ce̱tnikɛ buay ni̱ni da̱ŋ bärɔw, kɛ cäŋ in wä Kuoth Nhial buɔ̱ɔ̱t nɛɛnikɛ yiɛn kä bɛ jiööri tin cɛ ka̱m kɛ jak kä gɔaa.

Luk A-thi-ri-ya

²⁷ Nɛnɛ ciöt Kuɔth Nhial bëë ni nɔ̱nä, ce̱t ŋɛ̈ɛ̈nydɛ ni kɛ mac, kɛnɛ rɛy tuɔɔl mi lɔw, ci lɔcdɛ thia̱a̱ŋ kɛ ŋɛ̈ɛ̈ny, kä ce̱t lɛpdɛ nikɛ mac mi pɛt.

²⁸ Kä ce̱t yiëëdɛ kɛ kir mi muak, mi cup pi̱kɛ naath ni ŋuääk. Cuɛ döör lɔk kɛ lo̱o̱k däkä, kä cuɛ jio̱m nath moc kɛ ciɛk mi buɔthkɛ raar.

²⁹ Bia diit tɛthä lɔaac kit ce̱tkɛ min la la̱tdɛ kɛ wäär kɛ cäŋ ti̱mä, kä bi lo̱ckun tɛɛth ce̱tkɛ nɛy ti jäl kɛ bul tin wä wi̱i̱ pa̱a̱m Kuɔth Nhial, nɛy ti wä Pääm I-thɛ-rɛl.

³⁰ Ɛn Kuoth Nhial bɛ naath jak kä liɛŋkɛ jɔwdɛ min bum, kä bikɛ rɛmdɛ nɛn bëë piny kɛ ŋɛ̈ɛ̈ny mi di̱i̱t kɛnɛ mac mi waaŋ ŋɔak, kɛ wuɔ̱n mi ma̱a̱r kä tëë kɛ nhiaal guiiyni.

³¹ Bi ji̱ A-thi-ri-ya dual mi wa jɔw Kuɔth Nhial liŋ, mi wëëkɛ wä duäc kɛ kɛɛtdɛ.

³² Mi wä Kuoth Nhial kɛ wä duäc kɛ kɛɛt tɔ̱ɔ̱ŋädɛ, bɛ kɛ duäc kɛ yikyikni kɛnɛ thuɔmni, bɛ nyieenykɛ kɛ kɛ rɛmdɛ min bum.

³³ Ca gua̱a̱th maac rialikä nikɛ gua̱a̱th ëë ci wä. Ca rialikä kɛ kui̱ kua̱ri, ɛn pul maacdɛ ca rialikä lueŋɛ kä ɛ ɣäp ɣäp, kɛ mac mi di̱i̱t kɛ jiɛn ti ŋuan. Kä yiëë Kuɔth Nhial in ce̱tnikɛ lo̱o̱l maac, bɛ jɛ cua̱th.