I-ca-yaa 3 - RUAC KUƆTH IN RƐL RƆ

Luk kɛ kui̱ Juda kɛnɛ Jɛ-ru-tha-lɛm

¹ Nɛnɛ täämɛ Kuäär ni Kuoth in la Ruey Ɣɔaa, woocɛ ti diaal tin go̱o̱r Juda kɛnɛ Jɛ-ru-tha-lɛm kɛ, woocɛ mi̱eth kɛnɛ pi̱w,

² woocɛ wääth köör kɛnɛ wääth rɛ̈m, woocɛ kuäär luɔ̱k kɛnɛ gök, woocɛ ti̱t kɛnɛ nɛy tin di̱t,

³ kä woocɛ bo̱o̱th jiɛn dhi̱eec, kä woocɛ bööth tin ruec, kä jɛn woocɛ luëëk kɛnɛ ti̱t, kɛ nɛy tin latkɛ tin bi tuɔɔk kɛ nhiam.

⁴ Kä ɣän Kuoth Nhial bäkɛ jak kä ruackɛ ɛ dhɔɔl, kä bi gaat a bööthkiɛn.

⁵ Kä bi naath rɔ̱ yak kärɔ̱, ba ram ɔ yak ɛ ram ɔ kä ba ram ɔ yak ɛ gua̱n thieekädɛ. Kä bi ŋuɛ̈t ram mi di̱i̱t yak, kä /ci ram mi duɛk ram mi tekɛ luth bi luɔ̱th.

⁶ Mi wä raan däman wä käp dhɔr gua̱n kä bɛ jɛ jiök i̱, “Ji̱n ti̱i̱ kɛ bi̱i̱, bi ji̱n a bo̱o̱thda, ruac ɛn di̱r jiäkni nɛmɛ.”

⁷ Duundɛ ɣöö ɛn cäŋ ɛmɔ bɛ wiee wëë i̱, “/Ci ɣän bia̱ bo̱o̱th, kɛ ɣöö thilɛ mi̱eth dhɔrä kiɛ bi̱i̱, /ci yɛn ɣä bi jak kä bo̱o̱th nath.”

⁸ Cɛ Jɛ-ru-tha-lɛm lath kä ci Juda pɛ̈ɛ̈n, kɛ ɣöö min latkɛn ɛ kɛnɛ, min lätkɛn ɛ kuëthkɛ ni Kuoth Nhial, kuëthkɛ ni Kuoth puɔ̱nydɛ.

⁹ Kɛ guec nhiamdiɛn nyoothɛ jɛ ɛn ɣöö tekɛ kɛ duer, liakɛ rɔ̱ kɛ dueerkiɛn ce̱tkɛ ji̱ Thɔ-dɔm, ɛ /ci kɛn jɛ tëë. Riɛk akɛ kɛ! Kɛ ɣöö cikɛ rɔ̱ nöŋ riɛk.

¹⁰ Lätni jɛ nɛy tin la̱tkɛ cuŋ bɛ gɔaa kɛ kɛ, kɛ ɣöö bikɛ min ci kɛnɛ la̱t cam.

¹¹ Riɛk akɛ ji̱ dueeri! Da̱k akɛ kɛ! Kɛ ɣöö bakɛ lät kä min cikɛn ɛ la̱t kɛ tetkiɛn.

¹² Kä nɛɛkä bakɛ yak ɛ dho̱li, kä bakɛ ruac ɛ män. Kä lö nɛɛkä, ca yɛ bath ɛ bööthkun, ca yɛ woc dup.

¹³ Ci Kuoth Nhial luk ka̱n, cɛ rɔ jiɛc lukɛ naath.

¹⁴ Jɛn cɛ wä rɛy luɔ̱k lukɛ ruëëc kɛnɛ bööth nɛɛnikɛ wëë i̱, “Kɛ yɛn kɛn tëë däk kak walkä, kä tin cia pɛc kä can kɛn a duëlikun.

¹⁵ Ɛŋu lotdi mɔ kɛ däk nɛɛnikä kɛnɛ nuɔ̱r nɛɛni tin can?” Ruac ni ɣä Kuoth Nhial in la Ruey Ɣɔaa.

¹⁶ Cu Kuoth Nhial wee i̱, “Kɛ ɣöö liak nyier Dha-yɔn rɔ̱, ɛ jälkɛ kapkɛ ni wuɔ̱thkiɛn nhial, kä görkɛ ni naath kɛ wäŋkiɛn, kä cikɛ ka̱a̱thkiɛn jak kä ciek, kä duääc kɛn piny kɛ ciökiɛn.

¹⁷ Kɛ kui̱c ɛmɔ bi Kuäär ni Kuoth kɛ duäc, bɛ wuɔ̱th nyieet Dha-yɔn mut, bi Kuoth Nhial kɛ moc wok.”

¹⁸ Ɛn cäŋ ɛmɔ bi Kuäär ni Kuoth nyin liakädiɛn diaal woc, la̱ŋ ciöknikiɛn kɛ tiɛk wuɔ̱thnikiɛn kɛ kuatni ŋua̱knikiɛn,

¹⁹ kɛ tiil ji̱thnikiɛn kɛnɛ dɔ̱a̱kni ŋua̱a̱k, kɛ tiɛk lɛtdä,

²⁰ kɛ bi̱i̱ wec, kɛ kuatni mua̱a̱li kɛ bieyni tin la kuɛrkɛ kɛ diari wa̱l yi̱i̱rä in kɔp kɛ jɔɔkiɛn,

²¹ kɛ katimni yiɛtni kɛ ciik wuɔ̱m,

²² kɛ bieyni tin gɔw, kɛ kuɔ̱mni kɛ kötni kɛ bɛ̈gni tetni,

²³ kɛ neeni kɛ ruɔɔny bieyni tin gɔw kɛ kuɔ̱mni wec kɛ bieyni tin kuɔ̱mkɛ nhiam ɛ män.

²⁴ Kä kɛ gua̱a̱th wal tin kɔp bi te ni ŋuäny mi jiääk thi̱n, kä kɛ gua̱a̱th lääkä bi te ni rɔk thi̱n, kä kɛ gua̱a̱th takni mieem tin gɔw bi te ni kɛn kɛ wok, kä kɛ gua̱a̱th bieyni tin gɔw ba ciɛŋ ni bieyni cuali, kä kɛ gua̱a̱th gɔɔyä bi te ni pöc thi̱n.

²⁵ Ɛn cäŋ ɛmɔ ba nɛɛku näk, ba ji̱ kööru tin bum näk ko̱o̱r.

²⁶ Bi thiekni Jɛ-ru-tha-lɛm pa̱r, ɛn wec bɛ nyuur ce̱tnikɛ ciek mi ci nyuur piny gääcä.