I-ca-yaa 29 - RUAC KUƆTH IN RƐL RƆ

Da̱k Jɛ-ru-tha-lɛm

¹ Riɛk akɛ Ä-ri-yel, Ä-ri-yel, wec ëë ci Dee-bid pua̱t thi̱n! Matni ruɔ̱n kä ruɔ̱n, kä ɛ mi̱th ti̱mä te thi̱n.

² Kä ŋotdɛ bä Ä-ri-yel go̱l, ɛ bi te ni pa̱r kɛnɛ jiath lɔaac thi̱n, bɛ ce̱tnikɛ yi̱k wäŋä mucni kä ɣä.

³ Ɣän bä ji̱ mak kɛ rɛm mi go̱l ji̱, kä bä ji̱ go̱l kɛ biɛɛni, bä ji̱ göl piny kɛ lätkä.

⁴ Kä bi ruac ni piny muɔ̱ɔ̱n ce̱tnikɛ jɔak, bi ruacdu ben ni rɛy tuɔ̱ɔ̱r, bi jɔwdu päl ni piny muɔ̱ɔ̱n ce̱tnikɛ jɔw jɔkä, ni rɛy tuɔ̱ɔ̱r bi ruacdu ben thi̱n.

⁵ Duundɛ ɣöö bi ji̱ tɛ̈ru diaal ce̱tnikɛ tur, kä bɛ nɛy tin thil pälikä lɔk ce̱tnikɛ ko̱m. Ɛ kueckɛ bɛ kɛ pärikä,

⁶ bi Kuoth Nhial in la Ruey Ɣɔaa yɛ gui̱l, bɛ yɛ gui̱l kɛ ma̱a̱r kɛnɛ lath piɛny kɛ rɔal mi di̱i̱t, bɛ yɛ gui̱l kɛ ruɔth kɛnɛ thul, kɛ mac mi pɛt ŋɔak.

⁷ Kä döör diaal tëë nyiëëny kɛ Ä-ri-yel, kɛn döör diaal tëë nyiëëny kɛ jɛ, kɛ ti̱eckɛ tin bum tëë gölkɛ jɛ, bikɛ ce̱tnikɛ läk kɛnɛ nyuuth wa̱r.

⁸ Ce̱tnikɛ min la ram mi näk buɔthɛ, läk a läkikä i̱ mi̱thɛ, kä bi buɔthdɛ ŋot ni thi̱n mi cɛ keer, kiɛ min la ram mi näk rɛw ɛ läk a läkikä ce̱tkɛ mi cɛ maath kɛ pi̱w, kä bɛ keer ɛ ŋotdɛ näk rɛw ɛ, ɛ jɛn ta̱a̱ in bi tekɛ döör diaal, tin nyiëëny kɛ Päm Dha-yɔn.

⁹ Jakni rɔ kä dɔ̱a̱r bi cua̱ dɔ̱a̱r, kä jakni rɔ kä cɔr bi cu cɔr! Lätni ce̱tkɛ yɔ̱ŋ kɔŋä kä /ciɛ kɔaŋ, jakni rɔ kä yɔ̱ŋ mi /ci mɔ a yɔ̱ŋ kɔŋä!

¹⁰ Kɛ ɣöö ci Kuoth Nhial yɛ wuɔ̱c yiëë ni̱en mi di̱i̱t, kä cɛ wäŋ göökni kum, kä cɛ cär ti̱tni kum.

¹¹ Nyuuth kä ti̱ti̱ diaal kä yɛ ce̱tkɛ nikɛ rieet buɔk mi ca riy kä ca gäk. Mi ca ka̱m ram mi dëë jɛ kuɛn, mi ca jiök i̱, “Kuɛn nɛmɛ,” derɛ wee i̱, “/Cä jɛ bi luäŋ kɛ kuën, kɛ ɣöö tëë gääkä.”

¹² Kä mi ca bok ka̱m ram mi /ci jɛ dëë kuɛn, mi ca jɛ jiök i̱, “Kuɛn nɛmɛ,” la wëë i̱, “/Cä jɛ bi luäŋ kɛ kuën.”

¹³ Cu Kuoth Nhial wee i̱, “Nɛy ɛ ti thia̱kɛ kɛ ɣä kɛ thukiɛn, kä luɔ̱thkɛ ɣä kɛ lëëpkiɛn, kä nɔ̱a̱n lo̱ckiɛn ɛlɔ̱ŋ kɛ ɣä, kä paliɛn kɛ ɣä ɛ nyuuth nath ti ŋi̱eeckɛ kɛ kɛɛt,

¹⁴ Kɛ kui̱c ɛmɔ bä kɛn nɛy ti̱ti̱ moc kɛ rik ti kɔ̱ŋ, bäkɛ moc kɛ lät ti ga̱ykɛ naath, kä bi pɛl nɛɛnikiɛn tin pɛl thuɔ̱k, kä bi ŋäc ŋɔaani nɛɛni tin ŋa̱ckɛ ŋɔak thil.”

¹⁵ Riɛk akɛ nɛy tin tɛ̱̈ɛ̱̈kɛ cärkiɛn kɛ Kuoth Nhial, nɛy tin la̱tkɛ lätkiɛn rɛy muɔ̱th, tin la wee i̱, “Ɛŋa mi nɛɛn kɔn? Kä ɛŋa mi ŋäc kɔn?”

¹⁶ Yɛn luɔ̱ŋɛ wuɔ̱th ŋɔaani piny, ce̱tdɛ kɛ mi tääth dha̱a̱ri derɛ mun ta̱th, dëë tin ta̱thkɛ ruac kɛ kui̱ raam in tääthkɛ i̱, “/Kenɛ ɣä täth”, kiɛ dëë tin ca täth ruac kɛ kui̱ raam in tääthkɛ i̱, “Thilɛ mi ŋäcɛ”?

Ŋa̱th kɛ nhiam

¹⁷ Kä /ciɛ gua̱a̱th mi tɔt ɛ nëë cu Lɛ-ba-nɔn a mun ciɛkä bɛɛl mi gɔaa, ɛ bi muɔ̱n ciɛkä bɛɛl ce̱tnikɛ rup?

¹⁸ Ɛn cäŋ ɛmɔ bi mi̱eŋ rieet buɔk liŋ, kä bi ciöör guic rɛy muɔ̱th mi col.

¹⁹ Bi nɛy tin kɔ̱a̱c kɔ̱a̱a̱c tɛ̈th lɔaac jek kä Kuoth Nhial, kä bi can liak jek kä Kuoth I-thɛ-rɛl.

²⁰ Kɛ ɣöö bi nɛy tin thil pälikä thil, kä bi yaak cu cuɔ̱ŋ, kä nɛy diaal tin la̱tkɛ jiäk bakɛ woc,

²¹ nɛy tin ba raan jak kä dui̱r, nɛy tin lua̱kɛ nɛy tin mackɛ luɔ̱ɔ̱kni, kɛ nɛy tin pënkɛ naath cuŋkiɛn.

²² Kɛ kui̱c ɛmɔ ci Kuoth Nhial ëë kään A-bɛ-ram, mëë ruac kɛ dhɔr Je-kɔb wee i̱, “/Ci Je-kɔb bi lɛ ŋot kɛ pöc, kä /ci buariɛn bi lɛ ŋot thi̱n.

²³ Kɛ ɣöö mi wa gaatkiɛn nɛn rɛydiɛn, ɛn la̱t tetädä, bikɛ ciötdä tit ala mi rɛl rɔ, bikɛ Kuoth Je-kɔb liak, bikɛ Kuoth I-thɛ-rɛl luɔ̱th.

²⁴ Kä nɛy tin ci duer rɛy yieekä, bikɛ ŋäc ŋɔaani jek, kä nɛy tin kuɔm bikɛ luek nhɔk.”