I-ca-yaa 28 - RUAC KUƆTH IN RƐL RƆ

Luek Kuäärä kuec caam

¹ Riɛk akɛ kuäär I-thɛ-rɛl. Gɔɔydɛ thukɛ ce̱tkɛ gɔɔy kumä gaakni juaacni ti te wi̱i̱ bööthnikɛ tin yɔ̱a̱ŋ kɔaaŋni. Kä ca kuɔ̱mni gaakni juaacni la̱th ni liakä, kä cikɛ cuath kɛ mi̱th ti gɔw, a tekɛ ni tɔ̱ɔ̱cä kɛ yɔ̱ŋ kɔŋä.

² Kä nɛnɛ, Kuäär tëë kɛ ram mi bum, ce̱tdɛ nikɛ ruɔth kɛnɛ jiɔam mi bum, ce̱tdɛ nikɛ nyɔc mi cään, bɛ wec ɛmɔ kuɛr ni piny.

³ Ɛ kum kuäärä yɔ̱a̱ŋ kɔaaŋni ji̱ Ɛ-pa-rim, ba jɛ dɔany nikɛ cio̱o̱k.

⁴ Bi gɔɔy liakä bööthni ti̱ti̱ thuɔ̱k, bɛ jiɛn ce̱tnikɛ dɛy ŋɔ̱a̱p tin nhiam, tin la camkɛ mɔ cikɛ ciɛkɔ.

⁵ Ɛn cäŋ ɛmɔ, bi Kuoth Nhial in la Ruey Ɣɔaa a wuɔ̱t kumä kuäärä, bɛ la tik wutdä mi gɔaa, kä duɔth nɛɛnikɛ.

⁶ Kä bɛ la yiëë thukä kä ram mi lat thuɔ̱k, kä bɛ la buɔ̱m kä nɛy tin ba ko̱r ben loc ni puɔ̱ɔ̱ny wec.

Luek kɛnɛ läär kɛ kui̱ Jɛ-ru-tha-lɛm

⁷ Kä nɛy ti̱ti̱ bä ria̱th kɛn kɛ yɔ̱ŋ kɔaŋ, kɛn cikɛ yɔ̱ŋ kɛ kɔaŋ in ca̱r, bo̱o̱th palä kɛnɛ gök ria̱thkɛ kɛ yɔ̱ŋ kɔaŋ, cɛ wuɔ̱thkiɛn yi̱c kɛ kɔaŋ, cikɛ yɔ̱ŋ kɛ kɔaŋ in ca̱r, la gök a lat ni nyuuth mi duer, kä lat bo̱o̱th palä ni ŋuk ruac mi duer.

⁸ Thiäŋ ni wuɔ̱th tharbëtni diaal kɛ ŋök, thilɛ gua̱a̱th mi thil ŋök.

⁹ “Ɛŋa mi bɛ nyuɔ̱th kɛ ŋäc ŋɔaani, kä ɛŋa mi bɛ la̱t ruac? Bɛ ŋi̱eec ni gaat tin dööth, gaat tin pay woc thiin?

¹⁰ Kɛ ɣöö bɛ kɛ ŋi̱eec riet kɛnɛ riet, kɛ ber kɛnɛ ber, kɛ ŋi̱i̱c kɛnɛ ŋi̱i̱c.”

¹¹ Mi go̱o̱ri ɣöö bi ɣä liŋ, kɛ thuk juri kɛnɛ lëëpkiɛn, bi Kuoth Nhial ruac kɛ kɛn nɛy ti̱ti̱,

¹² nɛy tëë cɛ jiök i̱, “Gua̱a̱th ɛmɛ ɛ gua̱a̱th lɔ̱ŋä, jakni ram mi cuc kä lɔ̱ŋ, kɛ ɣöö ɛ gua̱a̱th päl pinydä”, duundɛ ɣöö /ken kɛ jɛ liŋ.

¹³ Kɛ kui̱c ɛmɔ bi ŋi̱i̱c Kuɔth Nhial kɛ kɛ a ɣöö, bɛ kɛ ŋi̱eec riet kɛ riet, ber kɛ ber, ŋi̱i̱c kɛ ŋi̱i̱c, dɔ̱ŋ ɛ jɛn bikɛ wä a bikɛ tɛth jɔk ɔ, a bikɛ rɔ moc kɛ buɔ̱t a bakɛ käp.

¹⁴ Kɛ kui̱c ɛmɔ liɛŋɛ ruac Kuɔth Nhial yɛn ji̱ liakä tin ruacɛ nɛy ti̱ti̱ kä Jɛ-ru-tha-lɛm!

¹⁵ Kɛ ɣöö ci yɛn wee i̱, “Cakɔ ruac kɛ lia̱a̱, cakɔ ruac lat kɛ kɔ̱a̱k kunyä, mi wä nyɔc mi däk naath wä ben, /cɛ kɔ bi met guëër, kɛ ɣöö cakɔ kac jak kä gääŋda, kä mɛ̈ɛ̈t ɛ jɛn duela.”

¹⁶ Kɛ kui̱c ɛmɔ cu Kuäär ni Kuoth wee i̱, “Nɛnɛ, ɣän la̱thä päm kä Dha-yɔn ala tuk, päm mi ca ɣɔ̱ɔ̱nä, ɛ päm gɔŋtɔtdä mi gɔaa mi la duŋ tukä mi lɛy lɛy. ‘Kä ram ɔ bi jɛ ŋäth ɔ /cɛ bi ga̱a̱c.’

¹⁷ Ɣän bä thuɔ̱k jak kä ce̱tkɛ dep thëm, kä bä cuɔ̱ɔ̱ŋ jak kä cuŋ ce̱tkɛ theem ta̱th duëli, kä bi nhiaal guiiyni duel kacädu lɔk, kä bi pi̱w duel ciɛŋädu muɔy.”

¹⁸ Bi mat ruacdu kɛ lia̱a̱ cu thil, kä ci mat ruacdu yɛnɛ kɔ̱a̱k kunyä bi lɛ te thi̱n, mi wä da̱k wä ben, bɛ ji̱ cu dua̱c ni piny.

¹⁹ Ce̱tnikɛ ben in la bäkɛ jɛ bɛ ji̱ naŋ, bɛ la bëë kɛ runwaŋ kɛnɛ runwaŋ, kɛ cäŋdäär kɛnɛ wäär ba bëëkɛ, bɛ la riɛk mi di̱i̱t kɛ ŋäc ruac ɛmɛ.

²⁰ Dhaŋ bɛ kuɛ̈ɛ̈ ɛlɔ̱ŋ kɛ ɣöö bi raan tɔ̱ɔ̱c thi̱n, kä bi pa̱ta̱n ciɛw ɛlɔ̱ŋ kɛ ɣöö bi raan rɔ kum kɛ jɛ.

²¹ Kɛ ɣöö bi Kuoth Nhial rɔ jiɛc ce̱tkɛ mëë cɛ rɔ jiɛc wi̱i̱ Pa̱a̱m Pɛ-ra-dhim, bɛ rɔ kap nhial ce̱tkɛ mëë cɛ la̱t lo̱o̱lä Gib-yon, kɛ ɣöö bɛ lätkɛ tin ga̱ykɛ naath la̱t! Kä bɛ lätkɛ tin kueckɛ la̱t!

²² Ku ya̱kdu kɛ naath päl, kiɛ bi yieendu buɔ̱m, ɣän cä ruac däkä liŋ kä Kuäär ni Kuoth in la Ruey Ɣɔaa, kɛ kui̱ wec muɔ̱ɔ̱n kɛɛliw.

Pɛl Kuɔth Nhial

²³ Li̱ŋni, liŋ rietkä, päli rɔ piny liŋ ruacdä.

²⁴ Mɔ pur raan ɔ la cua̱ pur ni jɛn? La cua̱ kuec ni jɛn a bɛ cu to̱k ni piny?

²⁵ Mɔ cɛ jɛ ku thuk kɛ kuëc ɔ, cɛ jɛ kua̱ piithɛ kɛ nanaa kɛnɛ nyuɔ̱m, kä bɛ dɛɛr pith kɛ bëër, kä bɛ bɛl piɛth go̱lä, kä bɛ kɛ cu moc kɛ key?

²⁶ Ci Kuothdɛ jɛ ŋi̱eec, kä cɛ jɛ nyuɔ̱ɔ̱th kɛ duɔ̱ɔ̱p in gɔaa.

²⁷ /Ca nanaa kɔ̱m kɛ kɔ̱ɔ̱m bɛɛl, kä /ci thurbil dëë ja̱l kɛ rɛy nyuɔ̱mä, duundɛ ɣöö kuɛ̈mkɛ nanaa, kä kɔ̱a̱mkɛ nyuɔ̱m kɛ kɛɛt.

²⁸ La gua̱rkɛ riɔw kɛ ɣöö ba kuän, /ca cua̱ gua̱rkɛ ni jɛ a thil pek, cäŋ bɛ thurbilɛ jak kä dɔanykɛ jɛ, kä jäl jiöŋköörikɛ kɛ rɛydɛ, /cikɛ jɛ dëë guär.

²⁹ Kɛn ti̱ti̱ diaal bäkɛ kä Kuoth Nhial in la Ruey Ɣɔaa, tëëkɛ luek mi gääy naath, kä tëëkɛ pɛl mi gɔaa.