I-ca-yaa 27 - RUAC KUƆTH IN RƐL RƆ

Ka̱n I-thɛ-rɛl

¹ Ɛn cäŋ ɛmɔ bi Kuoth Nhial Lɔw Yiëër in di̱i̱t in dual naath kɛ jɛ näk kɛ thɛpdɛ min bumbum in di̱i̱t, ɛn Lɔw in thac ni rɔ, kä bɛ Nyaŋ Yiëër in di̱i̱t näk bä.

² Ɛn cäŋ ɛmɔ, bi Kuoth Nhial dit kɛt kɛ kui̱ kakä wal kɛ kui̱ kɔaŋ wëë i̱,

³ “Ɣän Kuoth Nhial guɛcä jɛ, kä la wacä jɛ gua̱thni diaal. Kä la yiënä jɛ kɛ cäŋdäär kɛnɛ wäär kɛ ɣöö thilɛ ram mi bi jɛ ya̱r.

⁴ Ɣän /cä gak kɛ jɛ. Mi cɛ nöŋ ni ɣä kuiy kɛnɛ wäth, ɣän bä jɛ wä tër ko̱r ɣän bä jɛ waŋ.

⁵ Kiɛ bikɛ rɔ̱ ben lua̱k ɣä, akɛ la̱tkɛ mal kɛ ɣä, akɛ la̱tkɛ mal kɛ ɣä.”

⁶ Kɛ ni̱n tɔ̱ bi ben tɔ̱ bi Je-kɔb rɔ yiath piny, kä bi I-thɛ-rɛl tunh kɛ gaakni, kä bɛ wi̱c muɔ̱ɔ̱n thiäŋ kɛ dɛy.

⁷ Ɛ ci Kuoth Nhial kɛ ku däk ce̱tnikɛ däk ëë däkɛ nɛy tëë cikɛ däk? Kiɛ cɛ kɛ näk kɛ näk ëë na̱kɛ nɛy tëë na̱kɛ kɛ?

⁸ Cɛ nɛɛkɛ duäc kɛ naŋdiɛn pec, cɛ kɛ dhiac raar mundiɛn kɛ jiɔamdɛ min leth leth in bëë kui̱ känyä ca̱ŋ.

⁹ Kɛ ɣöö cɛ nɔmɔ la̱t, bɛ duer I-thɛ-rɛl woc. Kä nɛmɛ ɛ jɛn min ba ŋäc ni jɛ, mi wä ti̱ti̱ wä tuɔɔk, mi wëë pääm yi̱kni diaal wä tiath kä cɛ thil riäk Ä-ce-rim kɛnɛ yi̱k in la wal ɛ waŋkɛ thi̱n mi bi ŋot cuŋä.

¹⁰ Kä bi wec in bum bum te baaŋ, ba gua̱th ti ŋuan pa̱l ruëëc, bikɛ ce̱tnikɛ därdɔaar, bi laak ni dɛy ɣɔ̱ɔ̱k thi̱n, kä bikɛ tɔ̱ɔ̱c ɛn wi̱ni, bikɛ karkiɛn cam.

¹¹ Kä bi ciɛw ciɛɛwkiɛn kööt kä bikɛ töl, kä bi män kɛ ben jak kä tɔŋ maac. Kɛn nɛy ti̱ti̱ kueckɛ ŋɔak, kɛ kui̱c ɛmɔ bi cääkdiɛn thil nhök kɛ kɛ, ɛn ram in cakɛ /cɛ bi gɔaa kɛ kɛ.

¹² Ɛn cäŋ ɛmɔ bi Kuoth Nhial ji̱ I-thɛ-rɛl ma̱a̱t kɛ̈l kɛ̈ɛ̈li ni Kiir Yu-pɛ-ree-tidh amäni rɛy Tuɔɔc I-jëp ce̱tnikɛ min la bɛl a kɔ̱a̱mkɛ.

¹³ Kä ɛn cäŋ ɛmɔ ba kaaŋ mi di̱i̱t koth, kɛ ɣöö bi nɛy tin ci bath muun A-thi-ri-ya kɛnɛ tin ca naŋ muun I-jëp ben, ba Kuoth Nhial ben pal pääm in rɛl gɔɔydɛ rɔ kä Jɛ-ru-tha-lɛm.