I-ca-yaa 25 - RUAC KUƆTH IN RƐL RƆ

Dit puɔnyä

¹ Lö Kuoth Nhial ɛ ji̱n Kuothdä, ɣän bä ji̱ liak, kä bä ciötdu puany, kɛ ɣöö ci ti ga̱ykɛ naath la̱t, ti ci car ni wal ɛgɔaa kɛ ŋa̱th.

² Ci wec jak kä di̱r jiäkni, ɛn wec in bum cɛ da̱k, wec in ca la̱t ɛ jur cɛ thil, kä /ca jɛ bi nyɔk kɛ lätni.

³ Kɛ kui̱c ɛmɔ ba ji̱ liak ɛ nɛy ti buɔ̱m buɔ̱m, kä bi wi̱i̱ nɛɛni ti thil pälikä dual kɛ ji̱.

⁴ Ɛ ji̱n gua̱a̱th lua̱k kä can, ɛ ji̱n gua̱a̱th lua̱k kä ram mi thil lua̱ŋ kɛ rikɛ, ɛ ji̱n duel rɛy jiɔam kä ɛ ji̱n ti̱eep rɛy lëth, kɛ ɣöö yiëë raam mi thil pälikä, ce̱tdɛ nikɛ thul kɛ päny,

⁵ ce̱tdɛ nikɛ leth muun rɛ̈w. Kä curi jur jak kä bit, ce̱tkɛ min la leth a jäk kä kɔ̱c ɛ ti̱k, kä cu tuaari raam mi rɛŋ cu biɛt.

Mi̱eth Kuɔth Nhial

⁶ Ɛn wi̱i̱ pa̱a̱m ɛmɛ, bi Kuoth Nhial in la Ruey Ɣɔaa nɛy diaal lät kä mi̱eth thi̱n, mi̱eth mi tekɛ thiɔl mi di̱i̱t, mi̱eth mi tekɛ kɔaŋ mi gɔaa, ɛ mi̱eth mi tekɛ ri̱ŋ kɛnɛ kɔaŋ mi ca dhim ɛ puɔth.

⁷ Ɛn wi̱i̱ pa̱a̱m ɛmɛ, bi Kuoth bi̱i̱ in bur nɛy diaal piny däk thi̱n, ɛn bi̱i̱ in kum döör diaal piny, bɛ lia̱a̱ cu roc amäni cäŋ kɛl.

⁸ Bi Kuäär ni Kuoth mer cu poc wäŋni diaal, kä bɛ buar nɛɛnikɛ cu woc, wi̱i̱ muɔ̱ɔ̱n kɛɛliw. Ruac ni ɣän Kuoth Nhial.

⁹ Ɛn cäŋ ɛmɔ bikɛ wee i̱, “Kɛ thuɔ̱k jɛn ɛ Kuothdan, canɛ ŋäth ni jɛ kä cɛ kɔn kän. Nɛmɛ ɛ jɛn Kuoth Nhial in canɛ ŋäth, a lo̱ckɔn tɛth rɛy känädɛ.”

Bi Kuoth Mo-ab duäc

¹⁰ Bi Kuoth Nhial päm ɛmɛ gaŋ, kä bɛ Mo-ab däk, ce̱tnikɛ min la jil a yuɔrkɛ rɛy puɔ̱l.

¹¹ Bɛ tetkɛ ɣär ce̱tkɛ min la ram mi ket tetkɛ a ɣär mi ketdɛ, bi Kuoth liakdɛ jak kä thil, bɛ jɛ nööŋ piny kɛɛl kɛ tetkɛ.

¹² Kä bɛ pa̱nyniku tin ba̱r ba̱r kä bum nööŋ piny, bɛ kɛnööŋ ni piny a bɛ kɛ nööŋ ni rɛy tupä.