I-ca-yaa 23 - RUAC KUƆTH IN RƐL RƆ

Ruac go̱o̱kä mi jiääk kɛ kui̱ Dhor

¹ Nɛmɛ ɛ ruac go̱o̱kä kɛ kui̱ Dhor. Wieeɛ lö ji̱ babuuri Tar-cic, kɛ ɣöö ci Dhor te ni baaŋ, ci ti̱eckɛ kɛnɛ thok waathdɛ da̱k! Liɛŋkɛ ruac ɛmɔ a tekɛ muun ji̱ Ko-rɛc.

² Biɛtdɛ lö yɛn ji̱ dhuulä, kɛ yɛn köök ji̱ Dhi-don, tin ja̱kɛ nɛɛkun kɛ rɛy yiëër.

³ Kɛ rɛy yiëër, la yɛn bɛl a no̱o̱ŋ kä Ci-ɣor, kɛn bɛl tin piɛthkɛ jɔk Kiɛɛr, Dhor ɛ gua̱a̱th ko̱kä dööri.

⁴ Po̱cni lö Dhi-don, kɛ ɣöö ci yier ruac, ci bäpdiit in di̱i̱t ruac i̱, “Ɣän /ka̱n met dap kɛ gaat, kä /ka̱n gaat met rɔm, kä /ka̱n nyier met nööŋ nhial.”

⁵ Mi wä thok ben kä I-jëp, bikɛ ga̱a̱c mi wa da̱k Dhor liŋ.

⁶ Wiaa kui̱c kä Tar-cic, yɛn nɛy tin cieŋ dhuulä.

⁷ Ɛn nɛmɛ ɛ jɛn wecdun in gɔaa, ɛ jɛn wecdun ëë wal, min ci rɔ jak kä bi wä cieŋ ni guäth mi nɔ̱a̱n nɔ̱a̱n?

⁸ Ɛŋa mi caar nɛmɛ kɛ kui̱ Dhor, wec in gɔaa, min ji̱kɛ tin köök kɛ kua̱r, min la̱a̱tkɛ nɛy ti tekɛ luth?

⁹ Ɛ Kuoth Nhial in la Ruey Ɣɔaa cäp ɛmɔ, kɛ ɣöö bɛ liak gɔyni diaal woc, kä bɛ ji̱ luthä diaal jak kä thil luth wi̱i̱ muɔ̱ɔ̱n.

¹⁰ Wiaa piɛthɛ mundun amäni jɔk kiɛɛr, lö nɛy tin cieŋ kä Tar-cic, thilɛ ram mi bi ji̱ nyɔk kɛ luäk.

¹¹ Ci Kuoth Nhial tetdɛ riɛny wi̱i̱ yiëër, cɛ kuääri moc riɛk, cɛ ruac lat kɛ kui̱ Kɛ-naan, kɛ ɣöö bɛ jɛ däk.

¹² Kä cuɛ wee i̱, “/Ca ji̱ bi nyɔk kɛ liëk, lö tutjuɔ̱ɔ̱t Dhi-don, jiɛc rɔ, wër kui̱c kä Ko-rɛc, ɛn wi̱ni bi thil lɔ̱a̱ŋ bä.”

¹³ Guic mun ji̱ Kɛ̈l-da-ya! Kɛn nɛy tɔ̱tɔ̱ /cikɛ thil. Ci ji̱ A-thi-ri-ya ɛ jak kä gua̱a̱th leeyni dɔaar. Cikɛ jɛ lät kä biɛɛni ti gölkɛ ni jɛ, kä cikɛ buɔ̱mdɛ da̱k piny, ca jɛ jak kä mi ci da̱k.

¹⁴ Wieeɛ lö babuuri Tar-cic, kɛ ɣöö ci buɔ̱mdu däk piny.

¹⁵ Ɛn guäth ɛmɔ ba Dhor pa̱l ruëëc kɛ run ti jiɛn bärɔw, ce̱tnikɛ run teekä kua̱r. Kä kɛ thuɔ̱k runi ti jiɛn bärɔw, ɛn Dhor bɛ ce̱tnikɛ riär mi kɛ̈tkɛ kɛ dit i̱,

¹⁶ “Käni thom, kä jäl rɛy wec, lö riär mi ca pa̱l ruëëc! Puɔ̱t thom ɛgɔaa, kä kɛt diit ti nyin ŋuan, kä dɔ̱ŋ ba ji̱ tim.”

¹⁷ Kɛ thuɔ̱k runi ti jiɛn bärɔw, bi Kuoth Nhial Dhor gui̱l, kä bɛ loc ko̱kädɛ ce̱tnikɛ riär, kä bɛ kök la̱t kɛ kuääri wec muɔ̱ɔ̱n diaal rɛy ɣɔaa.

¹⁸ Kä ba tin cɛ jek ko̱kä kɛnɛ nyinkɛ lëy Kuoth Nhial, /cakɛ bi tɔ̱w kiɛ dol, duundɛ ɣöö bi nɛy tin palkɛ Kuoth Nhial tin cɛ jek kɔk ni mi̱eth mi di̱i̱t kɛnɛ bieyni tin gɔw.