I-ca-yaa 22 - RUAC KUƆTH IN RƐL RƆ

Ruac go̱o̱kä mi jiääk kɛ kui̱ Jɛ-ru-tha-lɛm

¹ Nɛmɛ ɛ ruac go̱o̱kä kɛ kui̱ lo̱o̱lä nyuuthä. Ɛŋu mi luɔtdɛ kɛ wädun nhial, min wäkɛ yɛ ni wuɔ̱thni duëli,

² lö yɛn nɛy ti ji̱ rɔlä lö wec rɔlä mi ci riɛɛr? Nɛɛku tin ci li̱w, /cikɛ li̱w ko̱o̱r.

³ Ci bööthku diaal rɔ̱ bar kɛɛl, cakɛ käp a /kenkɛ ko̱r tɛr. Kä yɛn nɛy diaal tin ca jek, ca yɛ naŋ ala pɛ̈ɛ̈c kɛɛl, kɛ ɣöö cia rɔ̱ bar a ŋot ji̱ tɛ̈r kɛ nɔ̱a̱n.

⁴ Kɛ kui̱c ɛmɔ cua̱ wee i̱, “/Cu ɣä guic, ɛ ɣä rötdä ɛlɔ̱ŋ, /cu ɣä bum kɛ kui̱ däkä nɛɛnikɛ.”

⁵ Kɛ ɣöö te Kuäär ni Kuoth in la Ruey Ɣɔaa kɛ cäŋ, cäŋ rikä kɛnɛ bɛ̈c kɛ dual rɛy lo̱o̱lä nyuuthä, ɛ cäŋ mi bi pa̱nyni wuɔ̱p piny, kä ba luäk go̱r kä pääm.

⁶ Ci ji̱ Ee-lam bäärikiɛn ka̱n, kɛ thurbiɛɛlikɛ kɛ ji̱ jiöŋköörikɛ, kä ji̱ Kir cikɛ köötnikiɛn rialikä.

⁷ Bi löliku tin gɔw thia̱ŋ kɛ thurbiɛɛli, kä ca ji̱ jiöŋkööri la̱th thiekni wec.

⁸ Kä ca tin gaŋkɛ Juda woc. Ɛn cäŋ ɛmɔ bi yio̱w köör go̱r Duëël Ruɔ̱ɔ̱p.

⁹ Kä ci gua̱th tin ŋuan tin ci tiath däär wec Dee-bid nɛn. Tɔ̱a̱wɛ pi̱ rɛy puɔ̱ɔ̱l in te rɛy mätdä.

¹⁰ Kä ci duël Jɛ-ru-tha-lɛm kuɛn, kä curi duël da̱k piny kɛ ɣöö bi päny jak kä bum.

¹¹ Kä ci pul la̱t, kam pa̱nyni da̱ŋ rɛw, kɛ ɣöö bi pi̱ Puɔ̱ɔ̱l ëë wal gaŋ. Duundɛ ɣöö /keni Kuoth ëë lät jɛ ŋäth, /keni jɛ tit ɛn Ram ëë caar jɛ ni wal.

¹² Ɛn cäŋ ɛmɔ cu Kuoth Nhial in la ruey Ɣɔaa ji̱ cɔl kɛ ɣöö bi wiee kä bi pa̱r, kä bi wi̱cdu mut a bi ciɛŋ ni bieyni cuali.

¹³ Kä nɛnɛ, tɛth ni lo̱ckiɛn, näk kɛn ni ɣɔ̱k kɛnɛ dët, cam kɛn ni ri̱ŋ kä mathkɛ ni kɔaaŋ. Kä wä kɛn i̱, “Mi̱ethnɛ kä ma̱thnɛ, kɛ ɣöö banɛ li̱w iruun.”

¹⁴ Ci Kuoth Nhial in la Ruey Ɣɔaa nɛmɛ lat a liɛŋä i̱, “Kɛ thuɔ̱k yɛn bia li̱w, ɛ /ka̱n duer ɛmɔ ni pälikä,” ruac ni ɣän Kuoth Nhial in la Ruey Ɣɔaa.

Ruac Kuɔth kɛ kui̱ Cɛb-na

¹⁵ Nɛmɛ min ci Kuoth Nhial in la Ruey Ɣɔaa ɛ lar wëë i̱, “Wër kä Cɛb-na min la ti̱i̱t duel kuäärä, jio̱kni jɛ i̱,

¹⁶ ‘Ɛŋu lätdi ɛn wa̱nɛ mɛ ɔ? Kä ɛŋa ci ji̱ jiök ɔ gueŋ ni rɔ kɔ̱a̱k kunyä ɛn wan ɛ mɔ? Kä ɛŋu gueŋi rɔ kɔ̱a̱a̱k guäth mi locloc ɔ? Ɛŋu guaŋi kɔ̱a̱a̱kdu mɔ rɛy pa̱a̱m?

¹⁷ Kuoth Nhial cɛ thia̱k kɛ yiäkdu, lö ji̱n ram mi bum bum.

¹⁸ Bɛ ji̱ dol ce̱tnikɛ kurɛ, kä bɛ ji̱ yuɔ̱r ni ro̱o̱l dɔ̱diɛn. Kä bi wä li̱w ɛn thɔ̱ŋ ɔ, ɛ bi thurbiɛɛliku tin gɔw duɔth ɛn wi̱ni, ci la buar dhɔr kua̱ru.

¹⁹ Ɣän bä ji̱ woc guäth la̱tdu, kä ba ji̱ yuɔr raar guäthdu.’

²⁰ “Ɛn cäŋ ɛmɔ ɣän bä ja̱ŋdä ni Ɛl-ya-kim gat Ɣil-ki-yaa cɔl,

²¹ kä bä ji̱ kum kɛ bi̱i̱du, kä bä jɛ ka̱m la̱a̱k lɛdädu, kä bä jɛ ka̱m lätku. Kä ba gua̱n ji̱ Jɛ-ru-tha-lɛm kɛnɛ dhɔr Juda.

²² Kä bä jɛ ka̱m leepni dhɔaar Dee-bid, mi cɛ gäk thilɛ ram mi bi jɛ lɛp, kä mi cɛ lɛp thilɛ ram mi bi jɛ gäk.

²³ Kä bä jɛ pua̱t piny ce̱tnikɛ lo̱c, kä ba dhɔr gua̱n luɔ̱th kɛ jɛ.”

²⁴ “Kä bi gɔy dhɔaar gua̱n diaal te wi̱i̱dɛ, gaat diaal amäni nɛy tin di̱t bikɛ guic ni jɛ, bikɛ ce̱tnikɛ kuak li̱eeri kɛnɛ dha̱a̱ri.

²⁵ Ɛn cäŋ ɛmɔ, cu Kuoth Nhial in la Ruey Ɣɔaa wee, ɛn lo̱c in ca pua̱t piny ɛ bumɛ bɛ luɛ̈k. Jɛn ba jɛ jɔap piny a bɛ tɛɛth, kä bi kuak tin kapɛ pɛ̈ɛ̈n a bikɛ tiath,” ruac ni ɣän Kuoth Nhial.