I-ca-yaa 21 - RUAC KUƆTH IN RƐL RƆ

Ruac go̱o̱kä mi jiääk kɛ kui̱ Bɛ̈-bi-lɔn

¹ Nɛmɛ ɛ ruac go̱o̱kä, kɛ kui̱ da̱rdɔaar in thieek kɛ bar. Da̱k a bëëni rɛy dɔaar ce̱tdɛ nikɛ ruɔth mi put kä Nɛ-gɛb, bëëkɛ muun mi dual naath kɛ jɛ.

² Ca ɣä nyuɔ̱th nyuuth mi bɛc bɛc, ci pëëc wä pɛɛc, kä ci da̱a̱k wä däk. Ee-lam makni naath, kä Ma-day go̱l wec, bi Kuoth riɛk ɛmɛ moc kɛ pek, riɛk ɛ ci Bɛ̈-bi-lɔn ɛ la̱tdɛ.

³ Kɛ kui̱ kä ti̱ti̱ tin cä nɛn, cu puɔ̱nydä bɛ̈c ce̱tnikɛ bɛ̈c ciëk mi tekɛ mäc dapä, cua̱ dual kɛ min cä liŋ, kä cuɛ ɣä lath kɛ min cä nɛn.

⁴ Ɣän diɛɛrä, kä lathɛ ɣä kɛ dual, kä thiaŋ in liɛɛpä, cua wäär rikä kä ɣä.

⁵ Rɛy nyuuthä cua mi̱eth rialikä, kä cu kɛn yi̱i̱k pap, cukɛ mi̱th kä mäthkɛ. Kä cua ruac lat ɛn ɣöö, bööth rɛ̈m jiacɛ rɔ̱, kä yierɛ köötni!

⁶ Kä cu Kuäär ni Kuoth ɣä jiök i̱, “Wër mockɛ ram mi guickɛ, kä a jɛ bä min cɛ nɛn ben lat.

⁷ Mi wëë thurbiɛɛli wä nɛn, kɛ ji̱ jio̱ŋko̱o̱ri ti jäl rɛw kɛɛl, kɛ nɛy ti ko̱t kɛ muɔ̱li, kɛ nɛy ti ko̱t kɛ thɔ̱a̱rɔa̱a̱li, a jɛ tiitdɛ agɔaa, a jɛ di̱lɛ guec ni gɔaa.”

⁸ Kä cu ram in guic wec ciöt i̱, “Kuäärä, ni ciaŋ la guecä wi̱i̱ luaak yiën ɛ ta̱a̱ cuŋä, la ta̱a̱ yien kɛ cäŋ däär kɛnɛ wäär.

⁹ Kä nɛnɛ tëë kɛ ram mia̱a̱ bëëni kɛ thurbil, bëë kɛɛl kɛ ji̱ jiöŋkööri, ti jäl rɛw kɛɛl!” Kä cuɛ jɛ loc i̱, “Ci Bɛ̈-bi-lɔn pɛ̈ɛ̈n, cɛ pɛ̈ɛ̈n, kä pua̱ny kuthnikɛ diaal cikɛ to̱l ni piny.”

¹⁰ Lö nɛɛkä ca yɛ kɔ̱m ce̱tnikɛ bɛl, ɣän cä yɛ la̱r mëë cä liŋ kä Kuoth Nhial in la Ruey Ɣɔaa, mëë cä liŋ kä Kuoth I-thɛ-rɛl.

Ruac go̱o̱kä mi jiääk kɛ kui̱ Ɛ-dɔm

¹¹ Nɛmɛ ɛ ruac go̱o̱kä kɛ kui̱ Ɛ-dɔm. Kä cu raan ɣä cɔl kä Ɛ-dɔm wëë i̱, “Gui̱i̱c, ɛ pek mi ni̱ndi ci duɔth kä wäär ɔ? Gui̱i̱c, ɛ pek mi ni̱ndi ci duɔth kä wäär ɔ?”

¹² Kä cu gui̱i̱c ɛ loc i̱, “Runwaŋ a bëëni, kä bi wäär ben bä. Mi go̱o̱ri ɣöö bi thiec, lunyni jɔk bi rɔ ben nyɔk kɛ thiec.”

Ruac go̱o̱kä mi jiääk kɛ kui̱ Ä-rab-ya

¹³ Mɛmɛ ɛ ruac go̱o̱kä kɛ kui̱ Ä-rab-ya. Lö yɛn ɣöth ji̱ Dɛ-dan, tin ci ɣöthdun pua̱t dɛ̈ɛ̈ni Ä-rab-ya.

¹⁴ Muɔcɛ ji̱ rɛ̈w kɛ pi̱w, kä luɔrɛ ji̱ däkä kɛ mi̱eth, lö yɛn ji̱ muɔ̱ɔ̱n Teemɔ.

¹⁵ Kɛ ɣöö barkɛ rɔ̱ kɛ ko̱r, barkɛ rɔ̱ kɛ ko̱r mi ci tuɔɔk, bar kɛn rɔ̱ kɛ bääri ti ca guath, ca rɔ̱ bar kɛ lëth köör.

¹⁶ Kä cu Kuäär ni Kuoth ruac kɛ ɣä wëë i̱, “Kɛ ruɔ̱n kɛl mi ce̱tkɛ ruɔ̱n mi ca jur ni läät, ɣän bä ria̱ŋ ji̱ Ke-dhar in di̱i̱t moc kɛ pek,

¹⁷ bi ji̱ köör tin bi duɔth kɛ tëk kä gaat Ke-dhar kuɛ̈ɛ̈. Ruac ni ɣän Kuoth Nhial ni Kuoth I-thɛ-rɛl.”