I-ca-yaa 20 - RUAC KUƆTH IN RƐL RƆ

Nyuɔ̱th I-ca-yaa kɛ da̱k I-jëp kɛnɛ Kuc

¹ Kɛ ruɔ̱n ëë jäk kuäär A-thi-ri-ya ni Thar-gon ɛ ni bo̱o̱th rɛ̈m in di̱i̱t mëë bi Ac-dod wä mak kä cuɛ jɛ ka̱n.

² Kɛ jɛn ruɔ̱n ɛmɔ, cu Kuoth Nhial ruac kɛ thok I-ca-yaa gat A-modh wëë i̱, “Wër woc bi̱i̱ cuaalä puɔ̱ɔ̱nydu, kä woc wa̱a̱ri ciökniku.” Kä cuɛ jɛ la̱t a jälɛ ni juutdä kä jälɛ kɛ pa̱a̱tkɛ.

³ Kä cu Kuoth Nhial wee i̱, “Ce̱tnikɛ mɔ jäl ja̱ŋdä ni I-ca-yaa mɔ juutdä, kä jälɛ kɛ pa̱a̱tkɛ kɛ run diɔ̱k, bɛ la nyuuth kɛ kui̱ I-jëp kɛnɛ Kuc,

⁴ inɔ bi kuäär A-thi-ri-ya ji̱ I-jëp kɛnɛ ji̱ Kuc naŋ ala pɛ̈ɛ̈c. Bikɛ wä juutdä nikɛ pa̱a̱tkiɛn, ŋuɛ̈tni kɛ dɔŋ bikɛ ja̱l ni baaŋ a thil bieyni kɛ kui̱ po̱cä ji̱ I-jëp.

⁵ Kä nɛy tin ŋa̱thkɛ ni ji̱ Kuc kä liakɛ rɔ̱ kɛ ji̱ I-jëp bikɛ ga̱a̱c kä bikɛ yi̱c kɛ tin ci tuɔɔk kä kɛ.

⁶ Ɛ ni̱ni tɔ̱tɔ̱ bi nɛy tin cieŋ jɔk yiëër wee i̱, ‘Nɛ̈nɛ min ci tuɔɔk kä nɛy tin ŋa̱thnɛ, nɛy tin la kɔn rɔ̱ a wä lua̱k kɛ, kä ba kɔn kän kä kuäär A-thi-ri-ya! Kä banɛ rɔ̱ kulɛ leny i̱di?’ ”