I-ca-yaa 2 - RUAC KUƆTH IN RƐL RƆ

Ruac malä Kuɔth kɛ wi̱c muɔ̱ɔ̱n

¹ Nɛmɛ ɛ nyuuth ëë ci I-ca-yaa gat A-modh ɛ nɛn kɛ kui̱ Juda kɛnɛ Jɛ-ru-tha-lɛm.

² Kä kɛ ni̱n tia̱ bi beni, bi päm in ca luak Kuɔth Nhial täth thi̱n, bi bär ni jɛn kä pääm diaal, kä bi döör diaal rɔ̱ dol thi̱n.

³ Kä bi nɛy ti ŋuan ben, kä bikɛ wee i̱, “Bia wanɛ wi̱i̱ pa̱a̱m Kuɔth Nhial, wanɛ luaak Kuɔth ji̱ I-thɛ-rɛl. Dɔ̱ŋ bɛ kɔn nyuɔ̱ɔ̱th kɛ duɔ̱pkɛ ɛ banɛ ja̱l thi̱n.” Kɛ ɣöö bi ŋuɔ̱t ben kä Dha-yɔn, kä ba ruacdɛ lat kä Jɛ-ru-tha-lɛm.

⁴ Kä bɛ kam dööri ti ŋuan luk, kä bɛ kam nɛɛni ti ŋuan lat. Bikɛ thɛpnikiɛn täth ala puɔ̱ri, kä bikɛ mutnikiɛn täth ni car caari. Kä bɛ thil do̱r mi nyiëëny kɛ do̱r in dɔ̱ŋ, kä bikɛ ko̱r cu kui̱c.

Luk Kuɔth kɛ ji̱ liakä

⁵ Lö dhɔr Je-kɔb, bër wanɛ ja̱l rɛy buɔyä Kuɔth Nhial!

⁶ Ci nɛɛku lo̱k lö Kuoth Nhial, ni ji̱ dhɔaar Je-kɔb. Cikɛ thia̱a̱ŋ kɛ cär ti̱tni ji̱ kuec känyä ca̱ŋ, a latkɛ tin bi tuɔɔk ce̱tnikɛ ji̱ Pi-li-thɛt, kä cukɛ cär juri tɔ̱tɔ̱ nhɔk.

⁷ Ci mundiɛn thia̱a̱ŋ kɛ ciɛk in bo̱r kɛnɛ da̱a̱p, a thilɛ ria̱ŋdiɛn pek. Kä ci mundiɛn thia̱a̱ŋ kɛ jiöŋkööri, a thilɛ thurbiɛɛlikiɛn pek.

⁸ Ci mundiɛn thia̱a̱ŋ kɛ kuth jiɛn, a pal kɛn ni kuth tin ci kɛn kɛ la̱t kɛ tetkiɛn, tin ci yiɛt tetnikiɛn kɛ la̱t.

⁹ Kɛ kui̱c ɛmɔ ba naath luɔ̱c piny a bi ram ɔ kɔ̱a̱c, duundɛ ɣöö cukɛ pälikä lö Kuoth!

¹⁰ Wër rɛy kɔ̱kä pa̱a̱m, teeyni rɔ rɛy puɔ̱li piɛny kɛ kui̱ gaak Kuɔth Nhial, kɛnɛ buay bumädɛ.

¹¹ Ba ji̱ liakä jak kä kɔ̱c, kä ba liak kacädiɛn luɔ̱c piny, ɛ ni Kuoth Nhial kä rɔa ba liak ɔ ɛn cäŋ ɛmɔ.

¹² Te Kuoth Nhial in la Ruey Ɣɔaa kɛ cäŋ mi cɛ rialikä, kɛ kui̱ nɛɛni diaal tin ji̱ liakä, kɛnɛ nɛy diaal tin kapkɛ rɔ̱ nhial, bakɛ luɔ̱ɔ̱c ni piny.

¹³ Bɛ luɔ̱ɔ̱r Lɛ-ba-nɔn tin ba̱r ba̱a̱r kä bum nööŋ piny, kɛnɛ jiɛn thëëp Ba-can tin bum,

¹⁴ kɛ pääm diaal tin ba̱r ba̱a̱r, kɛn pääm diaal tin te ni nhial,

¹⁵ kɛnɛ ti̱ec diaal tin bär, kɛ pa̱nyni diaal tin buɔ̱m buɔ̱ɔ̱m,

¹⁶ kɛ babuuri Tar-cic diaal, kɛnɛ babuuri diaal tin gɔw.

¹⁷ Ba liak nath nööŋ ni piny, kä ba liak raamɔ kɛ rɔ ka̱p ni piny, ɛ ni Kuoth Nhial kä rɔa ba liak ɔ ɛn cäŋ ɛmɔ.

¹⁸ Kä bɛ thil kuth jiɛn.

¹⁹ Wiaa tɛ̱̈ɛ̱̈ rɔ̱ rɛy kɔ̱a̱kni pa̱a̱m kɛnɛ rɛy kɔ̱a̱kni piɛny, kɛ kui̱ gaak Kuɔth Nhial, kɛnɛ buay ruëcdɛ mi wëë rɔ wä jiɛc kɛ ɣöö bɛ wi̱c muɔ̱ɔ̱n jakä dual.

²⁰ Ɛn cäŋ ɛmɔ bi naath kuthkiɛn tin ca täth kɛ ciɛk in bo̱r kɛnɛ da̱a̱p tin palkɛn kɛ. Bikɛ kɛ yuɔ̱r li̱kli̱kni kɛnɛ ŋaprɔ̱kɛdhɔ̱tni.

²¹ Mi wä Kuoth wi̱c muɔ̱ɔ̱n jakä dual bi naath rɔ̱ wä tɛ̱̈ɛ̱̈ rɛy kɔ̱a̱kni kɛnɛ rɛy puɔ̱li piɛny, kɛ gak Kuɔth Nhial kɛnɛ buay ruëcdɛ.

²² /Cu lɛ ŋäth ni naath, tin yiëë nikɛ ce̱tkɛ ji̱. Kɛ ɣöö ɛŋu dëë kɛn ɛ la̱tdɔ?