I-ca-yaa 19 - RUAC KUƆTH IN RƐL RƆ

Ruac go̱o̱kä mi jiääk kɛ kui̱ I-jëp

¹ Mɛmɛ ɛ ruac go̱o̱kä kɛ kui̱ I-jëp. Nɛnɛ, Kuoth Nhial bëë kä I-jëp kɛ pua̱r mi pɛ̈th ɛlɔ̱ŋ, kä bɛ kuth jiɛn I-jëp lath nhiamdɛ, kä bi ji̱ I-jëp lo̱ckiɛn baath ɛlɔ̱ŋ.

² Kä cu Kuoth Nhial wee ɣän, bä ji̱ I-jëp jak kä nyiëëny kä rɔ̱, kä bi ram ɔ nyiëëny kɛ däman, kä bi ram ɔ nyiëëny kɛ gua̱n thieekädɛ, kä bi wec ɔ nyiëëny kɛ wec ɔ, kä bi kuäär ɔ nyiëëny kɛ kuäär ɔ.

³ Bi lo̱c ji̱ I-jëp baath ɛlɔ̱ŋ, kä bä cärkiɛn jakä thil luɔt, bikɛ luäk thiec nikä kuth jiɛnkiɛn kɛnɛ walkiɛn, kɛ ti̱tkiɛn kɛnɛ ji̱ kolaaŋnikiɛn.

⁴ Ɣän bä ji̱ I-jëp la̱th tetni raam mi tekɛ ciaaŋ jiääk, kä bakɛ ruac ɛ kuäär mi bum bum, ruac ni ɣän Kuoth Nhial in la Ruey Ɣɔaa.

⁵ Kä bi pi̱ Kiɛɛr kööt, kɛn pi̱w kiɛɛr bikɛ do̱n.

⁶ Kä bi lölikɛ ŋuäny, bi kar kiɛɛr I-jëp kööt, bi guɔ̱t kɛnɛ ruɔ̱ɔ̱r rɔɔl.

⁷ Bi juaac diaal tin te jɔk Kiɛɛr li̱w, kä bi ka̱a̱k diaal tin ca pith jɔk kiɛɛr rɔɔl, bi jiɔam kɛ lɔk kä bikɛ cu thil.

⁸ Bi dëëp rɛc pa̱r, kä bikɛ wiee, kɛn nɛy diaal tin yuɔrkɛ yiethni Kiir, kä bi nɛy diaal tin dep kɛ cambakni lo̱ckiɛn jiääk.

⁹ Bi nɛy tin la̱t kɛ bieyni kɛ thi̱et, bi lo̱ckiɛn jiääk, kä bi nɛy tin la̱tkɛ bieyni kɛ lath, bikɛ thil ŋa̱th.

¹⁰ Nɛy tin la̱tkɛ bieyni bakɛ däk, kä la̱a̱t diaal bi lo̱ckiɛn jiath.

¹¹ Ruëëc Dho-an kɛ dɔ̱a̱a̱r, kä luëëk Pɛro thöpkɛ ni ruac dɔ̱ɔ̱rä. Kä deri Pɛro kulɛ jiök i̱di i̱, “Ɛ ɣän gat raam mi pɛl, ɛ ɣän gat kua̱ri tëë wal”?

¹² Kä nɛɛku tin pɛl a nikä? Akɛ la̱rkɛ ji̱ mɔ ŋa̱ckɛ mɔ min caar Kuoth Nhial in la Ruey Ɣɔaa kɛ kui̱ ji̱ I-jëp.

¹³ Ruëëc Dho-an kɛ dɔ̱a̱a̱r, kä bööth Mɛm-pith cakɛ mɛt, ci ji̱kɛ tin bööth I-jëp buath raar.

¹⁴ Ci Kuoth Nhial kɛ jak kä yi̱c, cikɛ I-jëp jak kä yi̱c lätnikɛ diaal, ce̱tnikɛ yɔ̱a̱ŋ kɔaaŋni ti yi̱c rɛy ŋöknikiɛn.

¹⁵ Kä thilɛ raan kä ji̱ I-jëp, ram mi riäŋ kiɛ can kiɛ ram mi luɔ̱thkɛ mi dëë kɛ luäk.

¹⁶ Ɛn cäŋ ɛmɔ bi ji̱ I-jëp ce̱tnikɛ män, bikɛ dual kɛ duäc in nöŋkɛ kɛ ɛ Kuoth Nhial in la Ruey Ɣɔaa.

¹⁷ Kä mun Juda bɛ ji̱ I-jëp jakä dual, kä ram ɔ ba la̱r ciöt Juda mɔ bɛ dual ɛlɔ̱ŋ kɛ kui̱ kä min caar Kuoth Nhial in la Ruey Ɣɔaa ɛ kɛ kui̱diɛn.

Bi I-jëp kɛnɛ A-thi-ri-ya Kuoth Nhial pal

¹⁸ Ɛn cäŋ ɛmɔ bi wi̱i̱ da̱ŋ dhieec kä I-jëp ruac kɛ thok ji̱ Kɛ-naan, kä bikɛ rɔ̱ yac kɛ ciöt Kuɔth Nhial in la Ruey Ɣɔaa. Kä ba wec kɛl thi̱n cɔli Wec Ca̱ŋ.

¹⁹ Ɛn cäŋ ɛmɔ bi Kuoth Nhial tekɛ yi̱k ni däär muɔ̱ɔ̱n I-jëp, kä bɛ tekɛ riäk këthdɛ.

²⁰ Kä bɛ la nyuuth kɛ kui̱ Kuɔth Nhial in la Ruey Ɣɔaa muun I-jëp. Mi wäkɛ Kuoth Nhial thiec kɛ luäk kɛ kui̱ gua̱n tɛ̈riɛn, bɛ kɛ jäkä kään mi bikɛ gaŋ kä bikɛ luäk.

²¹ Bi Kuoth Nhial rɔ jak kä ŋa̱ckɛ ɛ ji̱ I-jëp, kä bikɛ Kuoth Nhial ŋa̱c ɛn cäŋ ɛmɔ. Bikɛ Kuoth Nhial thöp luuri kɛ muc tin waŋkɛ, kä bikɛ rɔ̱ yac kɛ ti ba thöp Kuoth Nhial ti ba la̱t.

²² Kä bi Kuoth Nhial ji̱ I-jëp moc kɛ juey, bɛ kɛ duäc kä bɛ kɛ jak kä gɔw, bikɛ luny kä Kuoth Nhial, kä bɛ paliɛn liŋ, kä bɛ kɛ jak kä gɔw.

²³ Ɛn cäŋ ɛmɔ bɛ tekɛ duɔ̱ɔ̱p mi di̱i̱t mi jiɛy kä I-jëp wëë kä A-thi-ri-ya, bi ji̱ A-thi-ri-ya wä kä I-jëp, kä bi ji̱ I-jëp wä kä A-thi-ri-ya, kä bi ji̱ I-jëp kɛnɛ ji̱ A-thi-ri-ya Kuoth pal kɛɛl.

²⁴ Ɛn cäŋ ɛmɔ I-thɛ-rɛl bɛ la diɔ̱ɔ̱k I-jëp kɛnɛ A-thi-ri-ya ɛla puɔ̱th wi̱i̱ muɔ̱ɔ̱n,

²⁵ min bi Kuoth Nhial in la Ruey Ɣɔaa ɛ pothnikɛ wëë i̱, “Ɛ puɔ̱th tekɛ nɛɛkä ni ji̱ I-jëp kɛnɛ ji̱ A-thi-ri-ya la̱t tetkädä kɛ ji̱ I-thɛ-rɛl duŋdä.”