I-ca-yaa 18 - RUAC KUƆTH IN RƐL RƆ

Ruac go̱o̱kä mi jiääk kɛ kui̱ Kuc

¹ Riɛk akɛ, mun mi liɛŋkɛ jɔw gɔ̱ɔ̱k thi̱n, min te kui̱ kiɛr Kuc,

² mun in jäk naath kɛ rɛy yiëër, tin jäl kɛ ria̱th ɣo̱ri! Wiaa kɛ lö ja̱a̱k tin pual puaal, wiaa kä do̱r mi bär ji̱kɛ kä puɔth pua̱nykiɛn, nɛy tin dual naath kɛ kɛ wi̱i̱ muɔ̱ɔ̱n, nɛy ti bum kä ruackɛ wi̱i̱, nɛy tin ca mundiɛn da̱a̱k ɛ kiɛr.

³ Kä yɛn ji̱ ɣɔaa diaal, yɛn tin cieŋ wi̱i̱ muɔ̱ɔ̱n, mi wa bɛɛr wä nyuɔ̱ɔ̱th wuɔ̱thni päämni, bia jɛ nɛn! Kä mi wa kaaŋ wä koth, bia jɛ liŋ!

⁴ Ci Kuoth Nhial ɣä jiök i̱, “Ɣän bä guic guäth cieŋädä bitdä, ce̱tnikɛ rɛw ca̱ŋ mi lɛp, ce̱tnikɛ thäc rɛy lëth ŋër bɛɛl.”

⁵ Kɛ ɣöö mɔ ŋot gua̱a̱th ŋër ɔ, guäth in ci gaakni jiɛn ku pɛ̈ɛ̈n, kä ci dɛykiɛn ku thuŋ ciɛk, bi ji̱ tɛ̈r ji̱ Kuc tɛ̈m raar, ce̱tkɛ min la yuan, a tɛ̈mkɛ raar puɔ̱ɔ̱ny jiaath.

⁶ Kä ba ri̱ŋkiɛn diaal ba̱ny piny, bakɛ ba̱ny diit päämni kɛnɛ ley dɔaar. Bi diit kɛ cam kɛ mäy kɛɛliw, kä bi ley dɔaar kɛ cam kɛ jiɔam.

⁷ Ɛn guäth ɛmɔ ba muc nöŋ Kuoth Nhial in la Ruey Ɣɔaa ɛ nɛy ti ba̱r ba̱a̱r kä puɔth pua̱nykiɛn, nɛy ti dual wi̱c muɔ̱ɔ̱n kɛ kɛ, do̱r mi bum kä ruackɛ wi̱i̱, ti ca muundiɛn da̱a̱k ɛ kiɛr, ba nööŋ wi̱i̱ Pa̱a̱m Dha-yɔn, guäth in palkɛ Kuoth Nhial in la Ruey Ɣɔaa thi̱n.