I-ca-yaa 17 - RUAC KUƆTH IN RƐL RƆ

Ruac go̱o̱kä mi jiääk kɛ kui̱ Da-math-kɛth

¹ Nɛmɛ ɛ ruac go̱o̱kä, kɛ kui̱ Da-math-kɛth i̱, “Nɛnɛ Da-math-kɛth, /cɛ bi ŋot ala wec, jɛn bɛ la ni di̱r jiäkni.

² Ba ti̱ec Ä-ro-er ba̱ny piny, bɛ la gua̱a̱th tɔ̱ɔ̱cä deet, kä thilɛ ram mi bikɛ yiɛl.

³ Ba ti̱ec Ɛ-pa-rim tin bum däk, kä bi kuäär thuɔ̱k kä Da-math-kɛth, bi nɛy tin ŋot ɛ tëk kä ji̱ Thi-ri-ya cuuc ce̱tnikɛ ji̱ I-thɛ-rɛl,” ruac ni ɣän Kuoth Nhial in la Ruey Ɣɔaa.

⁴ “Ɛn cäŋ ɛmɔ bi gɔɔy Je-kɔb thil, kä bi thiɔl pua̱a̱nydɛ thuɔ̱k.

⁵ Bɛ ce̱tnikɛ min la ŋeer bɛɛl, bɛl ti te cuŋä a määt, kä bɛ wuɔ̱thkiɛn tëm, ce̱tkɛ ram mi ŋuk wuɔ̱th bɛɛl rɛy lo̱o̱lä ji̱ Rɛ-pa.

⁶ Bɛ tekɛ bɛl ti doth thi̱n, ce̱tnikɛ min la tɛ̈ŋkɛ dɛy jiaath Ɔ-lip, min la wäŋ rɛw kiɛ diɔ̱k a doth yuanä, kä bi ŋuaan kiɛ dhieec duɔth, kä kaar jiaath mi tekɛ dɛy,” ruac ni ɣän Kuoth Nhial ni Kuoth I-thɛ-rɛl.

⁷ Ɛn cäŋ ɛmɔ bi naath guic ni Cääkdiɛn, bikɛ guic ni Kuoth I-thɛ-rɛl.

⁸ /Ca bi guic ni yi̱kni, tin lät kɛn kɛ kɛ tetkiɛn, kä /ca mi ca la̱t kɛ tetkiɛn ce̱tkɛ Ä-ce-rim kiɛ yi̱kni tin waŋkɛ wal tin kuɔ̱r kuɔ̱ɔ̱r thi̱n bi guic.

⁹ Ɛn cäŋ ɛmɔ bi wi̱i̱kiɛn tin buɔ̱m buɔ̱ɔ̱m ce̱tnikɛ gua̱th ti ca päl ɛ ji̱ Iwi kɛnɛ ji̱ Ɛ-mor, tëë ci kɛn kɛ ba̱ny piny kɛ kui̱ ji̱ I-thɛ-rɛl, bi kɛn diaal te ni baaŋ.

¹⁰ Ci yɛn Kuoth ëë kään yɛ pa̱l ruëëc, kä /ken yɛn Päm lua̱kdun tim. Kɛ kui̱ ɛmɔ cäŋ ci yɛn bɛl ti gɔw pith, kä bia pal ni Kuoth mi dɔ̱ŋ,

¹¹ a cäŋ bikɛ jak kä do̱ny, kɛ jɛn cäŋ ɔ kɛl ɔ, kä bikɛ jak kä ɣär kɛ kɛ cäŋ in dɔ̱ŋ, ŋotdɛ thil mi bi ŋɛr kɛ cäŋ ŋër, ba cäŋ jiɛthä lɔaac kɛnɛ bɛ̈c lɔaac mi ci thuk.

¹² Liɛŋɛ jɔw dööri, wuɔ̱ɔ̱kɛ ce̱tnikɛ muaŋ yiëër! Liŋɛ ɛn rɔal nath, ce̱tdɛ nikɛ wuɔ̱w muɔŋä mi di̱i̱t!

¹³ Rɔal nath ce̱tdɛ nikɛ wuɔ̱w pi̱i̱ni ti ŋuan, duundɛ ɣöö mi wä Kuoth ruac kɛ kɛ, bikɛ rɔ̱ bar ni nɔ̱nä, bɛ kɛ lɔk ce̱tnikɛ tur mi lɔk ruɔth ɛ wi̱i̱ pa̱a̱m, kiɛ ce̱tnikɛ nuɔ̱ɔ̱r mi lɔk thulɛ.

¹⁴ Kä kɛ thiaŋ bi naath dual ɛlɔ̱ŋ! Kä kɛ runwaŋ thilɛ ram mi bi te wa̱nɔ! Nɔmɔ ba jɛn kui̱c nɛɛni tin cakɔ mac, ba jɛn min bi pɛn kä nɛy tin cakɔ pɛc.