I-ca-yaa 16 - RUAC KUƆTH IN RƐL RƆ

¹ Ja̱kɛ kuäär wec kä dët ala tho̱lbo̱k, ja̱kɛ kɛ kä Thɛlɛ̈ kɛ duɔ̱ɔ̱p rɛ̈ydɔaar, naŋɛ kɛ pääm nya Dha-yɔn.

² Ce̱t män Mo-ab nikɛ dɛy kɛcni, ti räp ti ca dueliɛn däk, min ŋok kɛn kir Ar-non.

³ Ti wee i̱, “Lua̱kɛ kɔ, la̱rɛ kɔ min dëëkɔ la̱t, gaŋkɔ ce̱tkɛ jiath in la ti̱eepdɛ naath ɛ gaŋ kɛ cäŋ ca̱ŋ da̱a̱r. Kɛ kɔn ji̱ däkä, teynikɔ guäth mi, /cakɔ bi jek thi̱n.

⁴ Jakɛ nɛy tin ca juɔc raar kä Mo-ab kä cieŋ rɛydun, gaŋɛ kɛ kä nɛy tin görkɛ däkdiɛn.” Mi wä ji̱ ciaŋ jiääkä wä thuɔ̱k, a bi da̱k rɔ ka̱p cuɔ̱ŋ, bi ciaaŋ jiääk cu thuɔ̱k ɛn muun.

⁵ Kɛ nhök ba kɔm kuäärä yiath piny, kɛ ŋa̱th bi raan nyuur thi̱n, raan dhɔaar Dee-bid, ram mi bi luk kɛ thuɔ̱k, kä bɛ pɛ̈th kɛ lätni cuŋni.

⁶ Cakɔ liak Mo-ab liŋ, liak in tekɛ jɛ, kacdɛ min di̱i̱t kɛnɛ gakdɛ, duundɛ ɣöö liakdɛ ɛ baŋ.

⁷ Kɛ kui̱c ɛmɔ ɛ Mo-ab wiee, kä ɛ nɛy diaal wiee kɛ kui̱ Mo-ab. Pa̱rɛ ɛlɔ̱ŋ kɛ jiath lɔaac, parɛ mi̱eth ëë cia cam kä Kir-ɣä-ra-thɛth

⁸ Ci ka̱a̱k Ɛc-bon rɔɔl, kä ci ka̱a̱k wal kɛ kui̱ kɔaŋ Thi-bɛ-ma rɔɔl bä. Ci ruëëc dööri karkɛ dup, karkɛ tëë ci räth nikä Ya-dhɛr kä wä pɛn ni däärdɔaar. Ci karkɛ tɛth ni raar, cikɛ räth ni baar.

⁹ Inɔ cua̱ wiee nikɛ wiee Ya-dhɛr, kɛ kui̱ buɔ̱cni Thi-bɛ-ma. Ci merkä lo̱o̱ny kɛ kui̱ Ɛc-bon kɛnɛ Ɛl-a-le, kɛ ɣöö tuaari ŋër kɛnɛ ŋëër buɔ̱cniku cikɛ thil.

¹⁰ Tɛ̈th lɔaac kɛnɛ gɔɔy lɔaac cikɛ thil rɛy kakä min la ciɛk, rɛy ka̱a̱kni wal kɛ kui̱ kɔaŋ thilɛ tuaari kɛnɛ diit ti lɛ̈n kɛt thi̱n, kä thilɛ ram mi lɛ kɔaŋ nhiac guäth nhiäcä kɔaaŋni, kɛ ɣöö cä jiööth tɛthä lɔaac moc kɛ pek.

¹¹ Kɛ kui̱c ɛmɔ cua̱ wiee ce̱tkɛ thom paarä ji̱ Mo-ab, kä cu lɔcdä jiath kɛ kui̱ Kir-a̱-rɛth.

¹² Kä mi wä ji̱ Mo-ab wä nhial guäth palä, bikɛ cuc ni rɔ̱diɛn, mi wäkɛ wä pal rɛy luaakdiɛn, thilɛ mi bi rɔ luɔ̱tkɛ.

¹³ Nɛmɛ ɛ jɛn min ci Kuoth Nhial ɛ lat kɛ kui̱ Mo-ab mëëdan.

¹⁴ Duundɛ ɣöö ɛn täämɛ ci Kuoth Nhial wee i̱, “Kɛ run da̱ŋ diɔ̱k ti ce̱tkɛ run raam mi juɔ̱rkɛ ni jɛ, ba kuak Mo-ab kɛnɛ ji̱kɛ tin ŋuan lo̱k, bi nɛy tin ci kään thi̱n a nɛy ti tɔt ti thil lua̱ŋ.”