I-ca-yaa 15 - RUAC KUƆTH IN RƐL RƆ

Ruac go̱o̱kä mi jiääk kɛ kui̱ Mo-ab

¹ Nɛmɛ ɛ ruac go̱o̱kä kɛ kui̱ Mo-ab. Kɛ wäär kɛl cua Ar däk, Mo-ab cɛ duɔ̱p, Kir ca jɛ däk kɛ wäär kɛl, Mo-ab cɛ duɔ̱p.

² Ci ji̱ Di-bon wä wiee guäth palä, cu ji̱ Mo-ab wiee kɛ kui̱ Nɛbo kɛnɛ Me-dɛ-ba. Cua wuɔ̱th diaal lɛny, kä cua ti̱k diaal mut.

³ Kä ciɛŋ kɛn ni bieyni cuali rɛy duɔ̱pni, wuɔ̱thni duëli kɛnɛ ɣɔɔri, nɛy diaal cikɛ lua̱a̱ny kɛ mer.

⁴ Nɛy tin te kä Ɛc-bon kɛnɛ Ɛl-a-le wiee kɛ kɛ jɔw mi di̱i̱t, wa jɔwdiɛn liŋ nikä Yaadh. Kɛ kui̱c ɛmɔ cu rɛm ji̱ Mo-ab wiee kɛ jɔw mi di̱i̱t, cu lo̱ckiɛn jiath.

⁵ Cua̱ wiee kɛ jiath lɔaac kɛ kui̱ Mo-ab, cu ji̱kɛ riŋ nikä Dho-ar, cukɛ rɔ̱ bar nikä Ɛg-lat-cɛ-li-ci-yaa. Kä cukɛ wä dup Lu-ɣit kɛ wiee, cukɛ wä nikɛ duɔ̱ɔ̱p Ɣo-ro-na-yim wieekɛ parkɛ da̱kdiɛn.

⁶ Kä ci pi̱w Nim-rim kööt, kä ci juaac rɔɔl, kä ci wal diaal kööt, thilɛ juac mi tɔ̱c mi ci duɔth.

⁷ Kɛ kui̱c ɛmɔ cukɛ tin ca tɔ̱w naŋ ni rɛy lo̱o̱lä thepni.

⁸ Cua jɔw wi̱i̱kä liŋ gua̱thni diaal kä Mo-ab, cua wieediɛn liŋ nikä Ɛg-la-yim, ci jɔwdiɛn cop nikä Ber-e-lim.

⁹ Ci pi̱w Di-bon thia̱a̱ŋ kɛ riɛm, duundɛ ɣöö ŋotdɛ bä ti ŋuan nöŋ Di-bon, bä ji̱ Mo-ab tin ci rɔ̱ bar nöŋ lony, kɛnɛ nɛy tin ci duɔth rɛy wec.