I-ca-yaa 13 - RUAC KUƆTH IN RƐL RƆ

Ruac go̱o̱kä mi jiääk kɛ kui̱ Bɛ̈-bi-lɔn

¹ Nɛmɛ ɛ ruac ëë ci ben kä I-ca-yaa gat A-modh kɛ kui̱ Bɛ̈-bi-lɔn.

² Yiathɛ bɛɛr piny ni bi̱i̱kä pa̱a̱m mi car car, cɔalɛ kɛ kɛ jɔw mi di̱i̱t, wɛ̈tdɛ kɛ kɛ tetkun kɛ ɣöö bikɛ ben rɛc kɛ thuk tin la wä kɛ ji̱ luthä rɛc.

³ Ɣän cä raandä min rɛl rɔ la̱r lär, cä nɛɛkä tin bum cɔl kɛ ɣöö ba ŋɛ̈ɛ̈nydä wä la̱t, nɛy tin tɛth lo̱ckiɛn kɛ ɣöö ba la̱tdä la̱t.

⁴ Liɛŋɛ rɔal wi̱i̱ päämni, min ce̱tkɛ jɔw nɛɛni ti ŋuan! Liɛŋɛ rɔal rɛy kuääri, ce̱tdɛ nikɛ rɔal dööri ti te guäth kɛl! Kuoth Nhial in la Ruey Ɣɔaa rialɛ rɛmdɛ ikä kɛ ko̱r.

⁵ Bäkɛ ni muun mi nɔ̱a̱n, bäkɛ ni peek ɣɔaa, ɛn Kuoth Nhial kɛnɛ yio̱w gaakdɛ, kɛ ɣöö bɛ wi̱c muɔ̱ɔ̱n däk kɛɛliw.

⁶ Wieeɛ, kɛ ɣöö ci cäŋ luɔ̱k Kuɔth Nhial thia̱k, da̱k Kuɔth I-thɛ-rɛl bɛ ben!

⁷ Kɛ kui̱c ɛmɔ bi tet diaal töl, kä bi lo̱c nɛɛni diaal baath,

⁸ kä bikɛ dual kɛn diaal. Bi bɛ̈c kɛnɛ cuɔ̱c kɛ käp, bikɛ te rikä ce̱tnikɛ ciek mi dap. Bikɛ rɔ̱ guic ni dualä, kɛ wäŋ ti tith ce̱tnikɛ mac.

⁹ Nɛnɛ, cäŋ luɔ̱k Kuɔth Nhial a bëëni, ɛ cäŋ mi bɛc bɛc, cäŋ gaak mi leth, ɛn cäŋ ɛmɔ bɛ wi̱c muɔ̱ɔ̱n jak kä day, kä bɛ ji̱ dueeri tin cieŋ thi̱n näk.

¹⁰ Ci ciɛr nhial kɛ kuɛl bi buay, kä bi cäŋ a muth nikɛ känydɛ, kä /ci pay bi buay.

¹¹ Kä ɣän Kuoth Nhial bä wi̱c muɔ̱ɔ̱n däk kɛ kui̱ jiäknikɛ, kä bä ji̱ nyuɔɔni duäc kɛ dueerkiɛn, kä bä kac ji̱ liakä moc kɛ pek, kä bä nɛy tin rɛ̈ŋ jak kä muɔ̱l.

¹² Bä naath jak kä dak ce̱tnikɛ da̱a̱p mi lɛy lɛy, bikɛ kuɛ̈ɛ̈ ce̱tnikɛ da̱a̱p A-pir-ka.

¹³ Kɛ kui̱c ɛmɔ bä pua̱a̱r jak kä lathɛ jɛ, kä bä piny woc guäthdɛ, ɛn cäŋ ɛmɔ mi wa̱a̱ gakdä nyoth ɣän Kuoth Nhial in la Ruey Ɣɔaa.

¹⁴ Kɛn naath bikɛ wur ce̱tnikɛ kɛɛw ti kakɛ, kɛnɛ dët ti thil ram mi rolkɛ, bi ram ɔ loc nikä nɛɛkiɛn, bi ram ɔ rɔ bar dhɔriɛn.

¹⁵ Kä ram mi wa jek ba jɛ yiɛth, kä ram ɔ wa käp ɔ ba jɛ näk.

¹⁶ Kä ba gaatkiɛn näk ni waaŋdiɛn, kä ba kuak dho̱rikiɛn pɛc, kä ba mänkiɛn ka̱n kɛ buɔ̱m.

¹⁷ Nɛnɛ, ɣän bä ji̱ Ma-day jak kä makɛ kɛ, tin /ci riɛk kɛ ciɛk in bo̱r kiɛ da̱a̱p.

¹⁸ Kä bi bäärikiɛn ŋuɛ̈tni ba̱r, kä /cikɛ bi tekɛ kɔ̱a̱c lɔaac kɛ gaat, /cikɛ nyintiɛtni bi pälikä.

¹⁹ Bɛ̈-bi-lɔn gɔaa ni jɛn kä kuääri diaal, min la liak ji̱ Bɛ̈-bi-lɔn, bɛ ce̱tnikɛ Thɔ-dɔm kɛnɛ Go-mo-ra, tëë däk Kuoth kɛ.

²⁰ Kä thilɛ ram mi bi cieŋ ɛn wi̱ni, kiɛ mi bi cieŋ thi̱n ri̱cni diaal, kä thilɛ Ä-rab mi bi kɛmɛdɛ yiath piny thi̱n, kä thilɛ yieen deet mi bi detkɛ jak kä tɔ̱ɔ̱c ɛn wi̱ni.

²¹ Bi cieŋ ni ley dɔaar ɛn wi̱ni, kä bi cieŋ ni guɔɔr duëlikɛ, ɛn wi̱ni bi cieŋ ni wuɔ̱t thi̱n, bi tuk ni rɔɔm dɔaar thi̱n.

²² Bi wiee ni ya̱a̱k rɛy ti̱ecnikɛ tin buɔ̱m buɔ̱ɔ̱m, kä bi guɔɔr ciɛŋ ni duël tin gɔw, ci gua̱a̱thdɛ cop, /ci ni̱nikɛ ŋot kɛ ŋuan.