I-ca-yaa 10 - RUAC KUƆTH IN RƐL RƆ

¹ Riɛk akɛ nɛy tin la̱tkɛ ŋuɔ̱t ti /ci tɔ̱ a thuɔ̱ɔ̱k, kɛnɛ nɛy tin gɔ̱a̱rkɛ rieet ti jiäk,

² nɛy tin pënkɛ can cuŋkiɛn, nɛy tin mackɛ cuŋ nɛɛnikä tin can, nɛy tin pɛ̈ckɛ ni män jɔɔkni, kä mackɛ ni gaat tin thil gua̱ni.

³ Ɛŋu bi la̱t ɔ kɛ cäŋ in ba duäc ni ji̱, mi wä da̱k wä ben nänä? Kä ɛŋa bi rɔ wä lua̱k jɛ mɔ? Kä bi ria̱ŋdu ba̱ny nikä?

⁴ Thilɛ mi ci duɔth ɛ ni ɣöö bi te rɛy nɛɛni tin ba pɛc, kiɛ bi te rɛy nɛɛni tin ba näk. Kɛ kɛn ti̱ti̱ ŋot gak Kuɔth /kenɛ ni thuɔ̱k, ŋotdɛ duääcɛ naath kɛ buɔ̱mdɛ.

Duäc Kuɔth Nhial kɛ A-thi-ri-ya

⁵ Riɛk akɛ A-thi-ri-ya, kɛɛt gaakdä, jɛn min la kɛɛt köörä!

⁶ La jɛ a ja̱kä kä do̱r mi thil kuoth, kä ja̱kä jɛ kä nɛy ti cä gaak kɛ kɛ, kɛ ɣöö bikɛ kɛ wä pɛc, kä bikɛ kɛ wä dɔny kä piny ce̱tnikɛ tuäk duɔ̱pni.

⁷ Duundɛ ɣöö /cɛ lot niɛ nɔ, /ciɛ jɛn min te cärädɛ, jɛn caarɛ ni ɣöö bɛ kɛ däk, lotdɛ ni ɣöö bɛ döör ti ŋuan däk,

⁸ kɛ ɣöö cɛ wee i̱, “/Cikɛ bööth rɛ̈mdä la kua̱r diaal tɔ̱?

⁹ /Ka̱n Kal-no ka̱n ce̱tkɛ Kar-kɛ-mic? Kä /ka̱n Ä-math ka̱n ce̱tkɛ Ar-pad? Kä /ka̱n Tha-mɛ-ria ka̱n ce̱tkɛ Da-math-kɛth?

¹⁰ Ɣän bä kuäär kuthni guääyni däk, kɛn kuth guääyni tɔ̱ ŋuan ni kɛn tɔ̱, kä ji̱ Jɛ-ru-tha-lɛm kɛnɛ ji̱ Tha-mɛ-ria.

¹¹ Ɣän ɛ cä Jɛ-ru-tha-lɛm bi ku däk kɛnɛ kuthkɛ, ce̱tkɛ mëë cä Tha-mɛ-ria däk kɛnɛ kuthkɛ?”

¹² Kä mi wä Kuäär ni Kuoth thuɔ̱k kɛ lätni nyinäkɛ diaal Pääm Dha-yɔn kɛnɛ Jɛ-ru-tha-lɛm, bɛ kuäär A-thi-ri-ya däk kɛ kui̱ liakädɛ kɛnɛ kapdɛ kɛ rɔ nhial.

¹³ Kɛ ɣöö cɛ wee i̱, “Kɛ buɔ̱mdä ɣän cä mɛmɛ la̱t, kä kɛ pɛlä kɛnɛ ŋäc ŋɔaanidä, ɣän cä këth dööri woc, kä cä ria̱ŋdiɛn pɛc, ce̱tkɛ ram mi bum ɣän cä kua̱rkiɛn jak kä kuaany.

¹⁴ Ɣän cua̱ ria̱ŋ nɛɛni diaal ka̱n, ce̱tkɛ min la raan duel kɛcä a cop, ɣän cua döör diaal ma̱a̱t, ce̱tkɛ min la raan toŋ a määt, kä /cuɛ thil mi cu gɔ̱a̱kdɛ kiɛ thokdɛ käp nhial kɛ ɣä.”

¹⁵ Ɛ dëë jio̱p rɔ ku liak kɛ ram in jɔp jɛ, kiɛ dëë ŋemɛ rɔ kap nhial kɛ ram in ŋok jɛ duɔ̱ɔ̱r? Kä /ci kɛɛt ram in rɔm jɛ dëë ruac, kä /cɛ raan dëë kap!

¹⁶ Kɛ kui̱c ɛmɔ, bi Kuäär ni Kuoth Nhial in la Ruey Ɣɔaa juey, mi jiääk jäk kä rɛm köör A-thi-ri-ya, kä bɛ buɔ̱mdɛ waŋ kɛ mac, bɛ dɔap ce̱tkɛ mac mi pɛt.

¹⁷ Kuoth in la buay ji̱ I-thɛ-rɛl, bɛ ce̱tnikɛ mac, jɛn min Rɛl Gɔɔydɛ rɔ, bɛ ce̱tnikɛ bo̱l maac. Bɛ ce̱tnikɛ mac in la gɔ̱a̱k kɛnɛ kuiy a waaŋ nikɛ cäŋ kɛl.

¹⁸ Bɛ rupdɛ min gɔaa kɛnɛ ka̱a̱k bɛɛl tin gɔw pɛt, ce̱tkɛ min la juey puɔ̱ny ran ɛ thuuk.

¹⁹ Bi jiɛn tin ci duɔth cuŋä kuɛ̈ɛ̈ ɛlɔ̱ŋ, ɛ dëë gat mi tɔt kɛ luäŋ kɛ kuën.

Luny duɔthni nath jɔk pec

²⁰ Ɛn cäŋ ɛmɔ /ci duɔth ji̱ I-thɛ-rɛl kɛn tin ci kään dhɔr Je-kɔb rɔ̱ bilɛ thieŋ ram in näkɛ, kɛ thuɔ̱k bikɛ rɔ̱ thieŋ Kuoth Nhial jɛn Kuoth I-thɛ-rɛl.

²¹ Bi duɔth nath luny jɔk, kɛn duɔth ji̱ dhɔaar Je-kɔb bikɛ luny kä Kuoth in leny buɔ̱mdɛ ti diaal.

²² Kä cäŋ bi nɛɛku ŋuan ce̱tnikɛ liɛt thuɔk yiëër lö I-thɛ-rɛl, bi luny ni duɔth jɔk. Ci Kuoth da̱k muɔ̱ɔ̱n lat, bɛ jɛ däk kɛɛliw a päär.

²³ Bi Kuäär ni Kuoth Nhial in la Ruey Ɣɔaa ɛ moc kɛ guut, ce̱tnikɛ mëë ca lar kɛ kui̱ wec muɔ̱ɔ̱n kɛɛliw.

²⁴ Kɛ kui̱c ɛmɔ ci Kuoth Nhial in la Ruey Ɣɔaa wee i̱, “Lö nɛɛkä tin cieŋ kä Dha-yɔn, /cuarɛ dual kɛ ji̱ A-thi-ri-ya tin dua̱ckɛ yɛ kɛ kɛtni, tin kapkɛ kɛtni nhial kɛ kui̱dun ce̱tnikɛ mëë ca lät kä yɛ ɛ ji̱ I-jëp.

²⁵ Kɛ ɣöö kɛ gua̱a̱th mi tɔt bi gakdä kɛ yɛ thuɔ̱k, kä bi ŋɛ̈ɛ̈nydä wa̱a̱ ni duŋ däkädiɛn.

²⁶ Kä bi Kuoth Nhial in la Ruey Ɣɔaa kɛ duäc kɛ waat, ce̱tkɛ mëë cɛ ji̱ Mid-yan duäc pääm O-reb. Kä bɛ kɛɛtdɛ riɛny wi̱i̱ pi̱i̱ni ce̱tkɛ mëë cɛ la̱t kä I-jëp.

²⁷ Ɛn cäŋ ɛmɔ bi rik tin la̱t kɛ kä yɛ cu thil, kä bä gäkdiɛn cu woc ŋuääkdun.”

²⁸ Bi rɛm ji̱ A-thi-ri-ya ben kä A-yath, bikɛ rët kɛ Mig-ron, kä bikɛ mi̱ethdiɛn tɛ̱̈ɛ̱̈ kä Mik-mac.

²⁹ Bikɛ wä rɛy duɔ̱p, kä bikɛ niɛɛn kä Gabä, kä bi ji̱ Rama dual, kä bi ji̱ wec Thɔɔl ni Giba rɔ̱ bar.

³⁰ Wieeni lö nya Gɛ̈-lim! Kä liŋɛ lö Lay-caa! Kä locɛ lö Ä-na-thoth!

³¹ Ji̱ Mad-mɛ-na a wuurä, ji̱ Gɛ-bim lɛ̱̈nykɛ tëkdiɛn.

³² Ɛn walɛ bikɛ cuɔ̱ŋ kä Nob, bikɛ ko̱r wä tɛr ni pääm Dha-yɔn, min la päm Jɛ-ru-tha-lɛm.

³³ Kä nɛnɛ, bi Kuoth Nhial in la Ruey Ɣɔaa, kɛ ŋuɔk jɔ̱ɔ̱r ce̱tnikɛ jiath kɛ buɔ̱mdɛ min di̱i̱t, kɛn jiɛn tin ba̱r ba̱a̱r bakɛ jɔap piny, kɛn mɛ̈ɛ̈k jiɛn tin gɔw bakɛ kuɛr piny.

³⁴ Bɛ rup in di̱i̱t jɔap ni piny kɛ jio̱p, ɛn rup Lɛ-ba-nɔn bɛ tɛɛth kɛ buɔ̱m Kuɔth in bum ni Jɛn.