I-ca-yaa 1 - RUAC KUƆTH IN RƐL RƆ

¹ Nɛmɛ ɛ nyuuth I-ca-yaa gat A-modh mëë cɛ nɛn kɛ kui̱ Juda kɛnɛ Jɛ-ru-tha-lɛm kɛ gua̱th tëë ruec ni Ö-dhi-ya kɛnɛ Yo-tham kɛ A-ɣadh kɛnɛ Ɣidh-ki-yaa kua̱r Juda.

Dueer Juda

² Liŋɛ lö pua̱a̱r, kä li̱ŋni lö piny, kɛ ɣöö ruac Kuoth Nhial wëë i̱, “Ɣän cä gaat pith kä cäkɛ rɔm, duundɛ ɣöö cikɛ ɣä luɔ̱c tɛr.

³ Ŋäc yaŋ gua̱ndɛ, kä ŋäc muul gua̱a̱th in la gua̱ndɛ jɛ a mi̱i̱th thi̱n. Duundɛ ɣöö kui̱c ji̱ I-thɛ-rɛl ɣä, /ci nɛɛkä ŋɔak ŋäc.”

⁴ Yɛn do̱r mi gua̱n dui̱rä, nɛy ti ɣa̱a̱ckɛ ni dueer, gaat ti la̱a̱t jiäkni, dho̱li ti ji̱ nyuɔɔni, cia Kuoth Nhial pa̱l ruëëc, cia Kuoth lo̱k, Kuoth I-thɛ-rɛl in rɛl gɔɔydɛ rɔ, cikɛ jɛ riet ni jɔkdiɛn!

⁵ Ɛŋu go̱o̱ri duäc mi dɔ̱ŋ ɔ? Ɛŋu ciɛŋi ni kac raar ɔ? Kä wi̱cdu cɛ thia̱a̱ŋ kɛ buɔ̱ɔ̱t kɛɛliw, kä bɛc lɔcdu kɛɛliw.

⁶ Ɛ känɛ jɛ ni pät cio̱kädu, cu mäni wi̱cdu, thilɛ gua̱a̱th mi gɔaa thi̱n, te ni tiathni kɛnɛ luluur thi̱n, kä löny ni buɔ̱ɔ̱t, /ken lönydiɛn ni cuɔ̱ŋ, kä /ka̱n kɛ ni yiɛn, kä thilɛ wäl mi ca ni la̱th thi̱n.

⁷ Mundu cɛ da̱k, ca wi̱i̱ku waŋ kɛ mac. Ni nhiamdu ci ji̱ tɛ̈ru mundu mac, cɛ da̱k ce̱tkɛ wec mi ca däk ɛ ji̱ tɛ̈r.

⁸ Ca Dha-yɔn gɛy ce̱tnikɛ döŋ mi te rɛy kakä wal kɛ kui̱ kɔaŋ, ce̱tnikɛ dhaŋ rɔɔny mi te rɛy kakä petdä, ce̱tdɛ nikɛ wec mi ca go̱l.

⁹ Duŋ mi /ken Kuoth Nhial in la Ruey Ɣɔaa kɔn pa̱l nɛy ti tɔt a tëk, dënɛ da̱k ce̱tnikɛ Thɔ-dɔm, kiɛ dënɛ da̱k ce̱tnikɛ Go-mo-ra.

¹⁰ Liɛŋɛ ruac Kuɔth Nhial, lö yɛn nɛy tin ce̱tkɛ ruëëc Thɔ-dɔm! Liɛŋɛ ŋi̱i̱c Kuɔthda, lö yɛn nɛy tin ce̱tkɛ ji̱ Go-mo-ra!

¹¹ Ci Kuoth Nhial wee i̱, “Muckun ti ŋuan ti̱ti̱ kɛ ŋuni kä ɣä? Ɣän cä ro̱ŋ kɛ muc dɛy deet rɔɔmni tin waŋkɛ, kɛnɛ thiɔl leeyni tin ca la̱a̱k, ɣän /cä riɛm mucni thääkni kɛnɛ dɛy rɔɔmni kɛ böwni go̱o̱r.

¹² “Mɔ bä yɛn ɣä ben pal ɔ, ɛŋa ci yɛ thiec ɔ? Ɛŋu jääl yɛn rɛy kal a thil luth ɔ.

¹³ /Cuarɛ muc ti thil luɔt nyɔk kɛ no̱o̱ŋ, wälun in kurkur lo̱kä jɛ. Ɣän lökä cäŋ ti̱mä tëth pathdun, kä lökä ti̱em ca̱ŋ lɔ̱ŋä, kɛ duɔ̱ɔ̱li matädun tin kɔ̱ŋ, ɣän /cä duɔ̱ɔ̱likun tin la̱tdɛ jiäk thi̱n, dëë luäŋ kɛ ruɔ̱t.

¹⁴ Lo̱k ti̱eydä ti̱em tëth pathdun, kɛnɛ ni̱n ti̱mädun tin kɔ̱ŋ, ci kɛn a riɛk kä ɣä, ɣän cä cuuc kɛ ruɔ̱tdiɛn.

¹⁵ Mi wä yɛn tetkun wä tar nhial kɛ pal, ɣän /cä yɛ bi liɛc. Ɛ cäŋ bia pal nikä ti nyin ŋuan, ɣän /cä yɛ bi liŋ, kɛ ɣöö ci tetkun thia̱a̱ŋ kɛ riɛm.

¹⁶ Lakɛ rɔ̱ kä jiäk. Wuɔcɛ jiäk tin la̱tdɛ waaŋdä, pa̱lɛ lät kä ti jiäk.

¹⁷ Ŋi̱i̱cni rɔ kɛ lätni kä mi gɔaa, go̱r ni thuɔ̱k, kä luäk ram in ciaŋkɛ a jiäk, kä gaŋ rɛɛt, kämni ciek jɔkä cuɔ̱ŋdɛ.”

Go̱r Kuɔth Nhial kɛ luäk nɛɛnikɛ

¹⁸ Cu Kuoth Nhial wee i̱, “Bër ruacnɛ kɛ kui̱ kä ti̱ti̱, cäŋ ni mɔ tith dueerku ce̱tnikɛ riɛm ɔ, bikɛ buay ce̱tnikɛ cak, kä cäŋ tithkɛ ce̱tnikɛ töc, bikɛ buay ce̱tnikɛ kën.

¹⁹ Mi dërɛ luɔ̱th ni ɣä, bia gɔɔy muɔ̱ɔ̱n ɛmɛ cam,

²⁰ duundɛ ɣöö mi wä yɛn luthdä wä lo̱k, ɛ bi kac ni yɛn raar kä ɣä, ba yɛ näk ko̱o̱r,” ruac ni ɣän Kuoth Nhial.

Duäc kɛnɛ ka̱n

²¹ Jɛ-ru-tha-lɛm wec ëë la ŋa̱th ɛ jɛn ci ce̱tnikɛ ler ɛ! Mëë la cieŋ kɛ thuɔ̱ɔ̱k kä la te ni cuŋ rɛydɛ ɛn täämɛ te ni luɔ̱ɔ̱c nath thi̱n!

²² Jɛ-ru-tha-lɛm ci ce̱tnikɛ thäc cikä min bo̱r, ci ce̱tnikɛ kɔaŋ mi ca liɔm kɛ pi̱w.

²³ Ruëëcku ci kɛ kac raar, kä kɛ buɔ̱n kuëëli. Kɛn diaal nhɔakɛ ni kök, kä görkɛ ni muc. /Ci kɛn rɛɛt käm cuɔ̱ɔ̱ŋdɛ, kä /ci luk ciëk jɔkä cup nhiamdiɛn.

²⁴ Kɛ kui̱c ɛmɔ cu Kuäär ni Kuoth Nhial in la Ruey Ɣɔaa, min Leny buɔ̱mdɛ ti diaal, ni Kuoth I-thɛ-rɛl wee i̱, “Aɣ, bä ŋɛ̈ɛ̈nydä wuɔ̱c ji̱ tɛ̈rä, kä bä rɔ col kä ji̱ gaakdä!

²⁵ Ɣän bä rɔ luɔ̱c ji̱, bä ji̱ lɛy ce̱tnikɛ ladiit mi lɛ̈ykɛ, bä jiäku diaal woc.

²⁶ Bä ji̱ luɔ̱c ruëëcku ce̱tnikɛ ni̱n tëë nhiam, kä bä ji̱ luɔ̱c nɛy tin la luëkɛ ji̱, ce̱tnikɛ ni̱n tëë kɔn. Kɛ kɔrɛ ba ji̱ cɔli wec cuŋni, wec mi tekɛ ŋa̱th.”

²⁷ Ba Jɛ-ru-tha-lɛm luɛl kɛ lätni thuɔ̱ɔ̱kni, kä ba ji̱kɛ tin ci luny kä Kuoth pälikä kɛ kui̱ cuŋni.

²⁸ Duundɛ ɣöö ba nɛy tin ci loc jɔk kɛnɛ nɛy tin ji̱ dueeri däk kɛɛl, kä ba nɛy tin ca Kuoth Nhial lo̱k thuk.

²⁹ Bi pöc kɛ palu kɛ kuth thäri jiɛn, kä bi tekɛ buar kɛ kui̱ ka̱a̱kni tin la pali kuth guääyni thi̱n.

³⁰ Kä bi ce̱tnikɛ thep mi ci ji̱thkɛ rɔɔl, kä bi ce̱tnikɛ kak mi thil pi̱w.

³¹ Bi ram in bum ni jɛn mun ce̱tnikɛ köm jiaath mi ci kööt, kä bi lätkɛ ce̱tnikɛ tɛ̈ny maac, jɛn kɛnɛ lätkɛ bikɛ waaŋ kɛɛl, kä thilɛ ram mi bi mac yieny.