Ɣöth 9 - RUAC KUƆTH IN RƐL RƆ

5. Riɛk li̱eth ɣɔ̱ɔ̱k

¹ Täämɛ, cu Kuoth Nhial Muthɛ ku jiök i̱, “Ji̱n, wër kä Pɛro, jio̱kni jɛ, ɛ Kuoth Nhial Kuoth ji̱ Ɣi-bɛ-ru i̱, ‘A nɛɛkä wä kɛ ɣöö bikɛ ɣä wä pal.

² Kɛ ɣöö mi biɛ lo̱k ɛn ɣöö wäkɛ, kä bi ŋot gaŋi kɛ piny,

³ nɛn ɛ, tetdä ɣän Kuoth Nhial, bɛ juey mi jiääk nöŋ ji̱ yɛnɛ ɣɔ̱ɔ̱ku tɔ̱ te rɛy ka̱a̱kni dɔɔr tɔ̱, amäni jio̱o̱k tuɔ̱ruɔ̱k kɛnɛ muɔ̱liku, kɛ thɔ̱a̱rɔa̱a̱liku, kɛnɛ bun ɣɔ̱ɔ̱ku, kɛ bun de̱e̱tku.

⁴ Kä ɣän bä tëë dääk kamä ɣɔ̱ɔ̱k ji̱ I-thɛ-rɛl kɛnɛ ɣɔ̱k ji̱ I-jëp, kɛ ɣöö thilɛ mi bi li̱w kä tɔ̱ la nyin ji̱ I-thɛ-rɛl tɔ̱.’ ”

⁵ Kä cu Kuoth Nhial gua̱a̱th in bɛ lät ni nɔmɔ lar, cuɛ wee i̱, “Iruun bi Kuoth Nhial nɔmɔ la̱t rɛy muɔ̱ɔ̱n ɛmɛ.”

⁶ mëë ruɔ̱n cu Kuoth Nhial nɔmɔ la̱t, cu ɣɔ̱k ji̱ I-jëp diaal li̱w, kä thilɛ mi cu li̱w kä ɣɔ̱k ji̱ I-thɛ-rɛl.

⁷ Cu Pɛro naath jek, wäkɛ ɣɔ̱k gui̱l, kä cukɛ ɣɔ̱k ji̱ I-thɛ-rɛl wä ja̱k cäŋɛ ni kɛl /kenɛ li̱w thi̱n. Cu lɔc Pɛro cu buɔ̱m, /kenɛ naath jak kä wä.

6. Jɔk buɔ̱m

⁸ Ɛn wa̱nɔ, cu Kuoth Nhial Muthɛ kɛnɛ Ä-ron jiök i̱, “Jɔamɛ ŋɛ̈th mi thiääŋ te̱tkun kɔ̱k buɔ̱l tuɔpni, a Muthɛ yor jɛ nhial nhiam Pɛro.

⁹ Bɛ rɔɔdɛ looc ni tur muun I-jëp kɛɛliw. Bɛ pua̱ny nath wuɔ̱ɔ̱c kɛ ŋuäät mi bi rɔɔdɛ pät ala jiöri, bɛ kɛ käp amäni le̱y muun I-jëp kɛɛliw.”

¹⁰ Ɛ jɛn, cukɛ ŋɛ̈th jɔm kɔ̱k buɔ̱l tuɔpni, kä cukɛ wä cuɔ̱ŋ nhiam Pɛro, cu Muthɛ ɛ kiɛth nhial, cuɛ rɔɔdɛ looc ni ŋuäät pua̱nyni nath kɛnɛ le̱y, a bɛ rɔɔdɛ looc ni jiöri.

¹¹ Kä /ken ti̱t cuɔ̱ŋ luäŋ nhiam Muthɛ kɛ kui̱ ŋua̱t, kɛ ɣöö te pua̱ny ti̱tni tɔ̱tɔ̱ kɛnɛ ji̱ I-jëp diaal kɛ ŋuäät.

¹² Kä cu Kuoth Nhial lɔc Pɛro jak kä bum, /kenɛ ruacdiɛn liŋ ni kɛ mëë ci Kuoth Nhial ɛ kɔŋ la̱r Muthɛ.

7. Dɛ̈m nhial guiiyni

¹³ Cu Kuoth Nhial Muthɛ ku jiök i̱, “Mal ke̱e̱r ni kɛ runwaŋ, kä wër nhiam Pɛro, jio̱kni jɛ, ci Kuoth Nhial Kuoth ji̱ Ɣi-bɛ-ru ɛ lar i̱, ‘A nɛɛkä wa ɣä pal.

¹⁴ Kɛ ɣöö ɛn kui̱r ɛ mi, bä rik liawni diaal tin tëë ɣä la̱th lɔɔcdu, mäni lɔc la̱a̱tniku, kɛ lɔc nɛɛniku diaal, kɛ ɣöö biɛ cu ŋa̱c i̱ thilɛ mi päär kɛ ɣä wi̱i̱ muɔ̱ɔ̱n ɛmɛ kɛɛliw.

¹⁵ Kɛ ɣöö, ɛn nëë duŋ cä tetdä riny kä dëë ji̱ kuer rik liawni, yɛnɛ nɛɛku, kä dëë yɛn thuɔ̱m wi̱i̱ muɔ̱ɔ̱n ɛmɛ,

¹⁶ kä ɣän ci jak kä tëk kɛ luɔt kä ɣöö bä yɛ nyuɔ̱th buɔ̱mdä kɛnɛ ɣöö dëë ciötdä cu këëk rɛy ɣɔaa kɛɛliw.

¹⁷ Kä ji̱n ŋotdi, kapi rɔɔdu nhial kɛ nɛɛkä, kä pe̱ni kɛ jiɛn.

¹⁸ Iruun cɔ̱tdä nɛ bä nhiaal guiiyni mi /ken me̱t dɛ̈m ro̱o̱l I-jëp ni mëë kua yiath piny mäni täämɛ, jak kä dɛm.

¹⁹ Kɛ kui̱ ɛmɔ, lärni la̱a̱tku lär, akɛ mal ɣɔ̱ɔ̱ku kɛnɛ nyinku diaal tɔ̱ te rɛy ka̱a̱kni dɔɔr tɔ̱ no̱o̱ŋ lue̱e̱kni, kɛ ɣöö bi nhiaal nɛy diaal kɛnɛ le̱y diaal, tin bi ŋot rɛy ka̱a̱kni dɔɔr a /ka̱n no̱o̱ŋ cieŋ, dua̱c dɔɔr a bikɛ li̱w.’ ”

²⁰ Nɛy diaal tëë dual kɛ min ci Kuoth Nhial ɛ lar kä ji̱ kɔaar Pɛro cukɛ la̱a̱tkiɛn kɛnɛ ɣɔ̱ɔ̱kiɛn no̱o̱ŋ rɛy ti̱ecni.

²¹ Kä nɛy diaal tëë /ka̱n riet Kuɔth Nhial liŋ cukɛ la̱a̱tkiɛn kɛnɛ ɣɔ̱ɔ̱kiɛn pa̱l rɛy ka̱a̱kni dɔɔr.

²² Ɛ jɛn, cu Kuoth Nhial Muthɛ ku jiök i̱, “Rinyni tetdu nhial kɛ ɣöö bi ɣɔw tekɛ nhiaal guiiyni muun I-jëp kɛɛliw, bɛ nɛy diaal kɛnɛ ɣɔ̱k diaal, kɛ juaac diaal rɛy rööl I-jëp kɛɛliw, dua̱c piny.”

²³ Cu Muthɛ kɛɛtdɛ nyuɔth nhial, kä cu Kuoth Nhial ma̱a̱r kɛnɛ nhiaal guiiyni no̱o̱ŋ piny, cuɛ tekɛ yiel nhial mi di̱i̱t. Cu Kuoth Nhial nhiaal guiiyni jak kä dɛm muun I-jëp kɛɛliw.

²⁴ Cuɛ cu tëë guiy ti kui̱i̱rɛ kɛɛl kɛ yiel nhial a thil kam, kɛ guiy ti /ken me̱t te thi̱n ni mëë kua ro̱l I-jëp yiath piny, amäni mëë ca do̱r.

²⁵ Cu nhial guiiyni ti diaal tëë te rɛy ka̱a̱kni dua̱c piny rɛy rööl I-jëp kɛɛliw, naath kɛn diaal amäni le̱y, cuɛ wal mi̱eth diaal dua̱c piny kä cuɛ jiɛn diaal töl.

²⁶ Cua ni ji̱ I-thɛ-rɛl tëë te muun Go-cɛn kärɔ̱, kɛn tɔ̱ cu thil nhiaal guiiyni tɔ̱.

²⁷ Ɛ jɛn, cu Pɛro Muthɛ kɛnɛ Ä-ron jäk kä raan, kä mëë cikɛ ben, cuɛ kɛ jiök i̱, “Ɣän cä ku duer kitdɛ. Kuoth Nhial ɛ jɛn ci kua gua̱n cuuŋä mɔ, ɣän kɔnɛ nɛɛkä cakɔ kua ji̱ dueeri.

²⁸ La̱ŋɛ Kuoth Nhial kɛ ɣöö ci ma̱a̱r kɛnɛ nhiaal guiiyni nɛmɛ ku di̱t, bä yɛ jak kä wä. /Cia bi lɛ tëë wanɛ mi.”

²⁹ Cu Muthɛ ɛ jiök i̱, “Niɛ nɔ bä jiɛn rɛy wec ɔ, bä te̱tkä ta̱r Kuoth Nhial, bi ma̱a̱r kɛnɛ nhiaal guiiyni cu cuɔ̱ŋ, kɛ ɣöö biɛ cu ŋa̱c i̱ piny ɛ duŋ Kuɔth Nhial.

³⁰ Kä ji̱n puɔ̱nydu yɛnɛ la̱a̱tku ŋa̱cä jɛ i̱ ŋuɔtdɛ /cia Kuoth, Kuoth Nhial ni luth.”

³¹ Täämɛ, lath kɛnɛ lääb ca kɛ dup kɛ ɣöö lääb gɔ̱k ni jɛn kä lath tunh ni jɛn.

³² Kä be̱e̱l mi ce̱tkɛ päth /ka̱n kɛ dup kɛ ɣöö la cakɛ ni ciɛk.

³³ Cu Muthɛ cu jiɛn däär wec nhiam Pɛro, cuɛ te̱tkɛ wä ta̱r Kuoth Nhial, kä cu ma̱a̱r kɛnɛ nhiaal guiiyni cuɔ̱ŋ, kä cuɛ thil nhiaal mi lɛn ŋot kɛ dɛ̈m piny.

³⁴ Kä mëë wä Pɛro ɛ nɛn ɛn ɣöö ci nhiaal kɛnɛ ma̱a̱r, kɛ nhiaal guiiyni cuɔ̱ŋ, cuɛ lɛ ni loc jiäknikɛ, cu lɔcdɛ buɔ̱m kɛnɛ ji̱ kɔaarɛ.

³⁵ Inɔ, cu Pɛro lɔcdɛ buɔ̱m kä /kenɛ ji̱ I-thɛ-rɛl nhök wä ni kɛ mëë ci Kuoth Nhial jɛ lar kɛ thok Muthɛ.