Ɣöth 8 - RUAC KUƆTH IN RƐL RƆ

2. Riɛk guëëkni

¹ Kɛ kɔrɛ, cu Kuoth Nhial Muthɛ ku jiök i̱, “Wiaa kä Pɛro, jiökɛ jɛ i̱, ci Kuoth Nhial wee i̱, ‘A nɛɛkä wa ɣä pal.

² Kä mi wi̱i̱ jɛ lo̱k ɛn ɣöö wäkɛ, nɛn ɛ, bä ro̱lu kɛɛliwdɛ thiäŋ kɛ guëëk.

³ Bi kir kɛɛliw thia̱a̱ŋ kɛ guëëk ti bi le̱ny raar a bikɛ ben ni due̱e̱l kuäärädu, bikɛ wä duëël tɔ̱ɔ̱cädu a bikɛ räth ni wi̱i̱ dhaŋädu, kä bikɛ coth ni duëli ji̱ kɔaaru amäni nɛɛku diaal, amäni mäc tha̱tdu kɛnɛ piɛliku.

⁴ Bi guëëk ben kä ji̱ yɛnɛ nɛɛku kɛnɛ ji̱ kɔaaru diaal.’ ”

⁵ Ɛ jɛn, cu Kuoth Nhial Muthɛ ku jiök i̱, “Jio̱kni Ä-ron i̱, ‘Riny tetdu min tekɛ kɛɛt wuɔ̱thni yiëri kɛnɛ wuɔ̱th liɛli kɛ wuɔ̱th puɔ̱li, bɛ guëëk jak kä bëë raar wi̱i̱ muɔ̱ɔ̱n I-jëp.’ ”

⁶ Cu Ä-ron tetdɛ riɛny wi̱i̱ pi̱i̱ni I-jëp inɔ. Kä cu guëëk ben cukɛ mun I-jëp kum ɛ dur.

⁷ Kä cu ti̱t I-jëp la̱t ni mi ce̱tkɛ nɔmɔ, cukɛ guëëk no̱o̱ŋ wi̱i̱ muɔ̱ɔ̱n I-jëp bä.

⁸ Ɛn wan ɔ, cu Pɛro Muthɛ kɛnɛ Ä-ron cɔl, cuɛ kɛ ben jiök i̱, “La̱ŋɛ Kuoth Nhial kɛ ɣöö bɛ guëëk woc puɔ̱ɔ̱nydä kɔnɛ nɛɛkä. Kä bä naath jak kä wa jɛ pal. Kä ba Kuoth Nhial wä kir kɛ ŋɔak.”

⁹ Cu Muthɛ Pɛro ku jiök i̱, “Ɛ ruacdu, mi biɛ la̱r ɣä i̱ bä la̱ŋ, kä bä la̱ŋ i̱ nɛy kɛ kui̱du yɛnɛ ji̱ kɔaaru kɛ nɛɛku kɛ ɣöö dëë guëëk woc puɔ̱ɔ̱nydu kɛnɛ duëlku a bikɛ loc ni yie̱e̱r?”

¹⁰ Cuɛ wee i̱, “Iruun,” cu Muthɛ wee i̱, “A ku ce̱tnikɛ mɔ ci lar ɔ kɛ ɣöö biɛ cu ŋa̱c i̱ thilɛ ram päär kɛ Kuothda ni Kuoth Nhial.

¹¹ Bi guëëk jiɛn puɔ̱ɔ̱nydu kɛnɛ duëlku, amäni ji̱ kɔaaru, bikɛ loc ni kiir.”

¹² Cu Muthɛ kɛnɛ Ä-ron jiɛn nhiam Pɛro, cu Muthɛ pal nhiam Kuɔth kɛ kui̱ guëëkni tëë cɛ luɔ̱ny Pɛro.

¹³ Cu Kuoth Nhial min ca la̱r jɛ ɛ Muthɛ la̱t. Cu guëëk li̱w rɛy duëli kɛnɛ rɛy käli, amäni rɛy ka̱a̱kni dɔɔr.

¹⁴ Cukɛ kɛ duɔ̱ɔ̱l bua̱a̱ni, cu ŋuänydiɛn piny thiäŋ.

¹⁵ Mëë ci Pɛro ɛ nɛn i̱ ci riɛk wecdɛ wä raar, cu wi̱cdɛ rɔɔdɛ nyɔk kɛ buɔ̱m, /kenɛ ruacdiɛn liŋ ni kɛ mëë ci Kuoth Nhial ɛ dhil lar.

3. Riɛk gui̱c guecä

¹⁶ Cu Kuoth Nhial Muthɛ ku jiök i̱, “Jio̱kni Ä-ron i̱, ‘Cuŋ kɛɛtdu wi̱i̱ muɔ̱ɔ̱n, yɔ̱t tup kɛ jɛ, bɛ rɔɔdɛ looc ni gui̱i̱c gui̱i̱c ro̱o̱l I-jëp kɛɛliw.’ ”

¹⁷ Cukɛ jɛ la̱t ni nɔ, cu Ä-ron tetdɛ riny, cuɛ tup piɛny yɔ̱t, cu gui̱i̱c gui̱i̱c ben pua̱nyni nath kɛnɛ pua̱ny le̱e̱ni. Cu tur piɛny kɛɛliw a gui̱i̱c gui̱i̱c muun I-jëp kɛɛliw.

¹⁸ Cu ti̱t wee lɔathkɛ jɛ kɛ ca̱a̱pkiɛn, i̱ no̱o̱ŋkɛ gui̱i̱c gui̱i̱c, cukɛ thil lua̱ŋ. Cu gui̱i̱c gui̱i̱c cu bur ni pua̱ny nath kɛnɛ le̱y.

¹⁹ Cu ti̱t Pɛro jiök i̱, “Nɛmɛ ɛ tet Kuɔth.” Cu wi̱c Pɛro ŋot ni kɛ buɔ̱m, /kenɛ ruac Muthɛ kɛnɛ Ä-ron liŋ ni kɛ mëë ci Kuoth Nhial ɛ dhil lar.

4. Riɛk luaŋni

²⁰ Ɛn wa̱nɛ mɔ, cu Kuoth Nhial Muthɛ ku jiök i̱, “Keri ni kɛ runwaŋ kä wër päth Pɛro thaakä min la wä kɛ jɛ thok yieer, wër jio̱kni jɛ ɛ Kuoth Nhial i̱, ‘A nɛɛkä wä kɛ ɣöö bikɛ ɣä wä pal.

²¹ Kɛ ɣöö mi ci kɛ bi jak kä wä, bä luaŋ mi di̱i̱t jäk kä puɔ̱ɔ̱nydu kɛnɛ ji̱ kɔaaru, kɛ nɛɛku, amäni rɛy duëël kuäärädu. Bi duël ciɛŋä ji̱ I-jëp cu thia̱a̱ŋ kɛ luaŋ mi di̱i̱t, matdɛ amäni jɛn mun in cuŋkɛ thi̱n.

²² Kä ɛn cäŋ ɛmɔ, bä mun Go-cɛn in cieŋ nɛɛkä thi̱n cu kɛ̈k go̱lä, thilɛ luaaŋ ti bi te thi̱n kɛ ɣöö bia jɛ cu ŋa̱c i̱ ɛ ɣän Kuoth Nhial te däärun ɔ.

²³ Ɣän bä kam nɛɛnikä cu da̱a̱k kɛ nɛɛkun, kä bia nyuuth ɛmɛ nɛn iruun bakä.’ ”

²⁴ Cu Kuoth Nhial nɔmɔ la̱t inɔ. Cu luaŋ mi bääp ben due̱e̱l kuäärä Pɛro kɛnɛ duël ji̱ kɔaarɛ kɛ mun I-jëp kɛɛliw, a cua mun ŋar ŋar ɛ luaaŋ.

²⁵ Ɛ jɛn, cu Pɛro Muthɛ kɛnɛ Ä-ron cɔl, cuɛ kɛ jiök i̱, “Wiaa, kiɛrɛ Kuothdun kɛ ŋɔak guäth mi te rɛy wec.”

²⁶ Kä cu Muthɛ ɛ jiök i̱, “/Cɛ rɔ bi lot inɔ kɛ ɣöö tɔ̱ bakɔ na̱k Kuothda ni Kuoth Nhial tɔ̱ bikɛn a luuri ti lökɛ ɛ ji̱ I-jëp. Mi wakɔ luuri ti lo̱k ji̱ I-jëp kɛ wä na̱k Kuoth kä nɛ̈nkɛ kɔ thi̱n ɛ ji̱ I-jëp, bi̱i̱ ku thi̱ec, kɛn /cikɛ kɔ bi bök kɛ pääm jɔɔk?

²⁷ Kɔn bakɔ dhil wä dɔɔr kɛ ja̱l ni̱ni diɔ̱k kɛ ɣöö bakɔ Kuothda ni Kuoth Nhial wä kir kɛ pe̱k mi bɛ la̱r kɔ.”

²⁸ Cu Pɛro wee i̱, “Ɣän bä yɛ jak kä wä, kä duundɛ ɣöö /cia bi räth guäth mi nɔ̱a̱n ɛlɔ̱ŋ. Ɛ la̱ŋ ni yɛn kɛ kui̱dä.”

²⁹ Cu Muthɛ wee i̱, “Ɛpuc, niɛ wädä raar ɛmɛ nhiamdu, bä Kuoth Nhial wä thi̱ec kɛ ɣöö bi luaŋ ɛ di̱i̱t ɛmɔ jiɛn iruun puɔ̱ɔ̱nydu amäni ji̱ kɔaaru kɛnɛ nɛɛku, duundɛ ɣöö puɔ̱ɔ̱nydu ji̱n Pɛro /cu lɛ ruac kɛ kac kɛ pe̱ndu kɛ naath wä, kɛ ɣöö bikɛ Kuoth Nhial wä kir.”

³⁰ Cu Muthɛ jiɛn nhiam Pɛro, cuɛ Kuoth Nhial wä läŋ.

³¹ Kä cu Kuoth Nhial min ca thi̱ec kä jɛ ɛ Muthɛ la̱t, cuɛ luaŋ ɛ di̱i̱t ɛmɔ woc puɔ̱ɔ̱ny Pɛro kɛnɛ ji̱ kɔaarɛ amäni nɛɛkɛ. Thilɛ kɛl mi cu duɔth.

³² Cu Pɛro lɔcdɛ lɛni buɔ̱m bä ɛn guäth ɛmɔ, kä /kenɛ naath nhök wä.