Ɣöth 7 - RUAC KUƆTH IN RƐL RƆ

¹ Kä cu Kuoth Nhial jɛ jiök i̱, “Guic ɛ, ɣän ci jak kä ce̱tkɛ Kuoth kä Pɛro. Bä dämuɔɔr ni Ä-ron ku lɛ jak kä ce̱tkɛ thokdu.

² Bi ti diaal ti cä guɔ̱k ji̱ lat, kä bi dämuɔɔr ni Ä-ron ruac ku la gäm Pɛro i̱ bɛ ji̱ I-thɛ-rɛl jak kä wëë raar muundɛ.

³ Kä ɣän bä lɔc Pɛro jak kä bum kɛ ɣöö bä nyuuthni kɛnɛ lätkä ti ga̱ykɛ naath re̱p ro̱o̱l I-jëp.

⁴ Kä /ci Pɛro ruacdun bi liŋ. Kä ɣän bä ji̱ I-jëp yi̱ek piny kɛ tetdä, ɣän bä bun nɛɛnikä ni ji̱ I-thɛ-rɛl no̱o̱ŋ raar muun I-jëp kɛ luk mi di̱i̱t.

⁵ Bi ji̱ I-jëp ɛ ku lɛ ŋa̱c i̱ ɛ ɣän Kuoth Nhial mi wa̱a̱ tetdä riɛny kä kɛ, kä bä ji̱ I-thɛ-rɛl ka̱m raar rɛydiɛn.”

⁶ Cu Muthɛ kɛnɛ Ä-ron la̱t niɛ nɔ. Cukɛ jɛ la̱t ni kɛ jɛn duɔ̱ɔ̱p in ci Kuoth Nhial jɛ la̱r kɛ.

⁷ Täämɛ kɛ gua̱a̱th ëë ruac Muthɛ kɛnɛ Ä-ron kɛ Pɛro, Muthɛ ɛn wan ɔ runkɛ jiɛn bädäk, kä te Ä-ron kɛ jiɛn bädäk wi̱cdɛ diɔ̱k.

Kɛɛt Ä-ron mi locrɔ Thɔ̱l

⁸ Ɛn wa̱nɔ, cu Kuoth Nhial Muthɛ kɛnɛ Ä-ron jiök i̱,

⁹ “Mi wä Pɛro ruac kɛ yɛ i̱ nyuɔ̱thɛ ɣä buɔ̱mdun kɛ la̱t mi gääy naath, ji̱n Muthɛ ku Ä-ron jiök i̱, ‘Käni kɛɛtdu mi go̱o̱ŋ ɛmɛ kä yori jɛ piny nhiam Pɛro kɛ ɣöö bɛ rɔɔdɛ loc thɔ̱l.’ ”

¹⁰ Cu Muthɛ kɛnɛ Ä-ron cu wä kä Pɛro, cukɛ wä lät ni kɛ jɛn pe̱k in ci Kuoth Nhial jɛ la̱t kɛ. Cu Ä-ron kɛɛtdɛ min go̱o̱ŋ indaan yuɔr piny nhiam Pɛro kɛnɛ la̱a̱tkɛ, cuɛ rɔɔdɛ loc ni thɔ̱l.

¹¹ Cu Pɛro nɛɛkɛ tin pɛl pɛɛl kɛnɛ ti̱tkɛ cɔl. Kä cu ti̱t ji̱ I-jëp ɛ la̱t inɔ bä kɛ ca̱a̱p ti̱i̱tädiɛn.

¹² Cu kɛn diaal kɛtnikiɛn tin göŋni yuɔr piny, cukɛ rɔ̱ looc ni thɔ̱ɔ̱l, kä cu kɛɛt Ä-ron in go̱o̱ŋ kɛtnikiɛn roc.

¹³ Kä cu Pɛro wi̱cdɛ buɔ̱m. /Kenɛ ruacdiɛn liŋ ni kɛ mëë ci Kuoth Nhial jɛ kɔŋ lar.

Rik tëë ci pɛ̈ɛ̈n kä I-jëp 1. Riɛk Riɛm

¹⁴ Cu Kuoth Nhial Muthɛ jiök i̱, “Ci lɔc Pɛro buɔ̱m, lo̱kɛ ɣöö jiɛy naath.

¹⁵ Kua wä kä Pɛro kɛ runwaŋ gua̱a̱th in la wä kɛ jɛ thok yiëër, käni jɛn kɛɛt ëë ci rɔɔdɛ looc thɔ̱l, wiaa liɛpɛ Pɛro cuŋä wi̱i̱ kiɛɛr.

¹⁶ Jio̱kni jɛ i̱, ‘Ci Kuoth Nhial Kuoth ji̱ Ɣi-bɛ-ru ɣä jäk kä ji̱, A nɛɛkä wa ɣä pal rɛy dɔaar. Kä ŋotdi ci ruacdɛ liŋ.

¹⁷ Täämɛ, biɛ ŋa̱c i̱ ɛ ɣän Kuoth Nhial kɛ nɛmɛ, nɛn ɛ, ɣän bä pi̱ tɔ̱ te kiir tɔ̱ yɔ̱t kɛ kɛɛt ɛ te te̱tädä mi, kä bi pi̱ rɔ̱ looc ni riɛm.

¹⁸ Bi rɛc tɔ̱ te kiir tɔ̱ li̱w. Bi kir cu ŋuɔ̱th, kä bi ji̱ I-jëp ma̱th pi̱i̱ni kiɛɛr cany.’ ”

¹⁹ Cu Kuoth Nhial Muthɛ ku jiök i̱, “Jio̱kni Ä-ron i̱, ‘Käni kɛɛtdu kä rinyni jɛ wi̱i̱ pi̱i̱ni ji̱ I-jëp, wi̱i̱ yiëri, wi̱i̱ liɛli kä wi̱i̱ puɔ̱li, kɛnɛ bar kɛ wa̱a̱t amäni gua̱th pi̱i̱nikiɛn diaal. Bikɛ la riɛm kɛn diaal. Bi mun I-jëp kɛɛliw a riɛm, amäni dha̱a̱ri pi̱i̱ni kɛnɛ thääk pi̱i̱ni diaal.’ ”

²⁰ Cu Muthɛ kɛnɛ Ä-ron la̱t ni min ca guɔ̱k kɛ ɛ Kuoth Nhial nhiam Pɛro kɛnɛ nhiam nɛɛnikɛ, cuɛ kɛɛt kap nhial, cuɛ pi̱ kiɛɛr yɔ̱t, kä cukɛ a riɛm.

²¹ Cu rɛc kiɛɛr li̱w. Cu yi̱er ŋuɔ̱th ɛlɔ̱ŋ, cu ji̱ I-jëp thil gua̱a̱th mi jëkɛ pi̱ ma̱th thi̱n. Cu pi̱ rööl I-jëp kɛɛliw a riɛm.

²² Kä cu ti̱t I-jëp mi ce̱tkɛ nɔmɔ ni la̱t kɛ ca̱a̱pkiɛn. Kä cu wi̱c Pɛro ŋot ni buɔ̱m, /kenɛ Muthɛ kɛnɛ Ä-ron ruacdiɛn liŋ, ni kɛ pe̱k ëë ci Kuoth Nhial jɛ lar.

²³ Cu Pɛro rɔɔdɛ woc nhiamdiɛn cuɛ loc due̱e̱l kuäärädɛ, /kenɛ nɔmɔ gul la̱th lɔɔcdɛ.

²⁴ Cu ji̱ I-jëp diaal wa̱a̱t tɛt gekä kiɛɛr kɛ kui̱ pi̱i̱ni ti mathkɛ.

²⁵ Cu ni̱n bärɔw thuuk kɛ kɔr gua̱th ëë ci Kuoth Nhial pi̱ kiɛr looc ni riɛm.