Ɣöth 6 - RUAC KUƆTH IN RƐL RƆ

Nyɔak cio̱tdä Kuɔth kɛ Muthɛ

¹ Ɛn wa̱nɛ mɔ, cu Kuoth Nhial Muthɛ ku jiök i̱, “Täämɛ, bi mia̱a̱ bä lät kä Pɛro ni nɛn. Kɛ buɔ̱mdä mi di̱i̱t bɛ jɛ kuɔ̱k ɣöö bɛ kɛ jɛn wä. Bä jɛ jiök i̱ jak ni nɛɛkä ni ji̱ I-thɛ-rɛl kä wä raar.”

² Cu Kuoth ruac kɛ Muthɛ kä cuɛ jɛ jiök i̱, “Ɛ ɣän Kuoth Nhial.

³ Cä rɔɔdä nyuɔ̱th A-bɛ-ram, kɛ Ay-dhɛk, kä cua rɔɔdä lɛ ni nyuɔ̱th Je-kɔb, ala Kuoth in le̱ny buɔ̱mdɛ ti diaal, kä /ka̱n rɔɔdä nyuɔ̱thkɛ kɛ ciötdä min rɛl rɔ ni Kuoth Nhial.

⁴ Kä cä guk ruacdä cuɛt piny kamäda kɔnɛ kɛ, mëë cä lar i̱ bä kɛ ka̱m mun Kɛ-naan, jɛn mun ëë cikɛ kɔŋ nyuur thi̱n ala ja̱a̱l.

⁵ Min di̱t ni jɛn ɛ ɣöö cä lul ji̱ I-thɛ-rɛl tin yiankɛ ala ja̱a̱ŋ ɛ ji̱ I-jëp liŋ, kä cua guk ruacdä kɛ kui̱diɛn cu tim.

⁶ Kɛ kui̱c ɛmɔ, yɛn jiökɛ ji̱ I-thɛ-rɛl i̱, ‘Ɛ ɣän Kuoth Nhial, ɣän bä yɛ kuëk raar lätni ji̱ I-jëp ti bɛ̈c bɛ̈ɛ̈c. Ɣän bä yɛ dhi̱eel raar yie̱e̱nädiɛn in bɛc bɛc, kä bä yɛ kän kɛ tet mi bumbum kɛnɛ luk mi di̱i̱t.

⁷ Ɣän bä yɛ ka̱n ala nɛɛkä, kä ba̱a̱ Kuothdun, kä bia jɛ cu ŋa̱c i̱ ɛ ɣän Kuoth Nhial Kuothdun ëë käm yɛ raar ɣa̱a̱cni ji̱ I-jëp.

⁸ Kä ɣän bä yɛ cu no̱o̱ŋ muun ëë cä yac i̱ bä ka̱m A-bɛ-ram kɛnɛ Ay-dhɛk kɛ Je-kɔb, kä ɣän bä jɛ ɣël yɛ. Ɛ ɣän Kuoth Nhial.’ ”

⁹ Cu Muthɛ nɛmɛ la̱t ji̱ I-thɛ-rɛl, kä /kenkɛ jɛ liŋ kɛ kui̱ jiɛthä lɔaacdiɛn kɛnɛ kue̱ny ciɛŋä mëë yiankɛ ni kɛ.

¹⁰ Ɛ jɛn, cu Kuoth Nhial Muthɛ ku jiök i̱,

¹¹ “Wër, ruacni kɛ Pɛro kuäär I-jëp kä jio̱kni jɛ i̱ jakni ji̱ I-thɛ-rɛl kä jiɛy muundu.”

¹² Kä cu Muthɛ ruac ɛmɛ luɔ̱c Kuoth Nhial, cuɛ wee i̱, “Ji̱ I-thɛ-rɛl, /ka̱n ruacdä liŋ, kä dëë Pɛro ruacdä liŋ i̱di, ɣän ram mi kui̱c ruac?”

¹³ Kä cu Kuoth Nhial Muthɛ kɛnɛ Ä-ron la̱t laat tin ba wä la̱t ji̱ I-thɛ-rɛl, amäni Pɛro kuäär I-jëp, kɛ ɣöö dëë ji̱ I-thɛ-rɛl mal jiɛn muun rööl I-jëp.

Di̱eeth Muthɛ kɛnɛ Ä-ron

¹⁴ Täämɛ ti̱ti̱ kɛ kɛn ciööt di̱tni thukni duëli gua̱ndɔɔŋnikiɛn, gaat Rɛ-u-ben in la kɛ̱̈ɛ̱̈ I-thɛ-rɛl, ɛ Ä-nɔk kɛnɛ Palu, kɛ Ɣɛdh-ron kɛnɛ Kar-mi. Kɛ thuk duëli Rɛ-u-ben kɛn tɔ̱tɔ̱.

¹⁵ Gaat Cim-on, ɛ Yɛ-muel kɛnɛ Ya-min, kɛ O-adh kɛnɛ Ya-kin, kɛ Dho-ɣar kɛnɛ Ca-ul min man mɔ nya Kɛ-naan. Kä thuk duëli Cim-on, kɛ kɛn ɛn tɔ̱.

¹⁶ Ti̱ti̱ kɛ ciööt gan Lii-bay ni kuaynikiɛn. Ɛ Ger-con kɛnɛ Ko-ath kɛ Mɛ-ra-ri. Run te̱e̱kä Lii-bay kɛ run ti kuɔ̱r wi̱cdɛ jiɛn diɔ̱k wi̱cdɛ bärɔw.

¹⁷ Gaat Ger-con ni gɔalikiɛn, ɛ Lib-ni kɛnɛ Cimi.

¹⁸ Cu gaat Ko-ath, a Am-ram kɛ Yidh-ɣar, kɛ Ɣɛb-ron kɛnɛ U-dhi-el. Täämɛ run te̱e̱kä Ko-ath kɛ run ti kuɔ̱r wi̱cdɛ jiɛn diɔ̱k wi̱cdɛ diɔ̱k.

¹⁹ Kä cu gaat Mɛ-ra-ri, a Mali kɛnɛ Muci. Tɔ̱tɔ̱ kɛ kɛn thuk duëli ji̱ Lii-bay ni kuaynikiɛn.

²⁰ Cu Am-ram waydɛ ni Yo-kɛ-bɛd kuɛn. Kä cuɛ jɛ diëth gaat kɛ ni Ä-ron kɛnɛ Muthɛ. Cu run te̱e̱kä Am-ram a run ti kuɔ̱r wi̱cdɛ jiɛn diɔ̱k wi̱cdɛ bärɔw.

²¹ Kä gaat Yidh-ɣar ɛ Kora kɛ Nɛ-pɛg kɛ Dhik-ri.

²² Cu gaat U-dhi-el, a Mi-ca-el, kɛ Ɛl-dha-pan kɛnɛ Thith-ri.

²³ Cu Ä-ron nyaa A-mi-na-dab mi cɔal i̱ E-li-ci-ba mi mɔ nyiman Na-con kuɛn, kä cuɛ Na-dab di̱eth kɛnɛ Ä-bi-ɣu kɛ Ɛl-a-dhar kɛ I-ta-mar.

²⁴ Gaat Kora, ɛ A-thir kɛ El-ka-na kɛ A-bi-ya-thap. Tɔ̱tɔ̱ kɛ kɛn thuk duëli ji̱ Kora.

²⁵ Cu gat Ä-ron ni El-a-dhar, nyam kɛl kä nyiee Pu-ti-el kuɛn, kä cuɛ jɛ diëth gat mi cɔal i̱ Pi-nɛ-ɣath.

²⁶ Tɔ̱tɔ̱ kɛ kɛn gatdi tëë ci Kuoth Nhial kɛ la̱r lär, ɛn Ä-ron kɛnɛ Muthɛ i̱ bikɛ ji̱ I-thɛ-rɛl böth raar kä I-jëp kɛ bunkiɛn.

²⁷ Kɛ kɛn nɛy tëë ruac kɛ Pɛro in la kuäär I-jëp kɛ no̱o̱ŋ ji̱ I-thɛ-rɛl raar kä I-jëp. Kɛ jɛn Muthɛ ɛmɛ kɛnɛ Ä-ron ɛmɛ pua̱nykiɛn.

Ruac Kuɔth kɛ Muthɛ kɛnɛ Ä-ron

²⁸ Täämɛ cäŋ ëë ruac kɛ Kuoth Nhial kɛ Muthɛ ro̱o̱l I-jëp, cuɛ Muthɛ jiök i̱,

²⁹ “Ɛ ɣän Kuoth Nhial, läri Pɛro kuäär I-jëp ti diaal tëë cä la̱rä ji̱.”

³⁰ Kä cu Muthɛ Kuoth Nhial jiök i̱, “Nɛn ɛ, ɣän lapä ram mi kui̱c ruac. DEE Pɛro ruacdä liŋ i̱di?”