Ɣöth 40 - RUAC KUƆTH IN RƐL RƆ

Lëy duëël ro̱mä Kuɔth

¹ Cu Kuoth Nhial Muthɛ jiök i̱,

² “Bi due̱l duälä ro̱mä yiath piny kɛ cäŋ in nhiam kä pay in jio̱l.

³ Kä bi thanduk lueekni la̱th rɛydɛ, kä bi thanduk ɛmɔ ge̱l kɛ ge̱e̱l.

⁴ Kä bi tharbët no̱o̱ŋ rɛc, kä papɛ, kä bi taŋ lɛmbärä no̱o̱ŋ rɛc, bi̱i̱ lɛmbärni diaal kuëŋ gua̱thnikiɛn.

⁵ Bi̱i̱ yi̱k dääpä wal tin la waŋkɛ tin te̱e̱ ŋuäny mi gɔaa la̱th nhiam thandukä lueekni, kä bi ge̱e̱l duëël Kuɔth in la due̱l ro̱mä la̱th thi̱n.

⁶ Bi̱i̱ yi̱k weŋä luuri la̱th nhiam thi̱ek duëël duälä ro̱mä,

⁷ kä bi̱i̱ thak la̱k kuëŋ rɛc kam gua̱th ro̱mä nath kɛ Kuoth Nhial kɛnɛ yi̱k, kä bi rɛydɛ jiöm pi̱,

⁸ bi kal yiath piny, yi̱i̱thi jɛ ni due̱l kɛɛliw, kä bi̱i̱ bi̱i̱ thi̱ek ŋap thok kal.

⁹ Bi liɛɛth yi̱rä in rɛl rɔ cu ka̱n, bi due̱l ɛmɔ ku yi̱r amäni tin diaal tin te rɛydɛ, kä biɛ ka̱m Kuoth amäni kuak rɛydɛ diaal, ba duŋ Kuɔth mi gɔaa mi rɛl rɔ.

¹⁰ Kä bi̱i̱ yi̱k weŋä luuri yi̱r bä, mäni kuakɛ diaal, kä biɛ ka̱m Kuoth Nhial, kä bɛ cua jɛn duŋ Kuɔth in gɔaa in rɛl ni rɔ.

¹¹ Kä bi̱i̱ thak la̱k kɛnɛ tharɛ yi̱r bä, kä biɛ ka̱m Kuoth Nhial.

¹² Kä bi̱i̱ Ä-ron kɛnɛ gaatkɛ ku no̱o̱ŋ thok duëël ro̱mä rɛc i̱, bi kɛ lak kɛ pi̱,

¹³ kä bi̱i̱ bieyni Kuoothä tin gɔw ni kɛn tin ɣɛ̈lkɛ rɔ̱ la̱th puɔ̱ɔ̱ny Ä-ron. Biɛ yi̱r kɛ liɛɛth, kä biɛ ka̱m ɣä kɛ ɣöö bɛ lätkä la̱t ala bo̱o̱th ŋuɔ̱tni.

¹⁴ Bi gaatkɛ no̱o̱ŋ bä, kä bi bieyni tin cuɔri la̱th pua̱nynikiɛn,

¹⁵ bi kɛ yi̱r kɛ yieer in yi̱i̱ri ni gua̱ndiɛn, kɛ ɣöö bikɛ lätkä la̱t ala kua̱r ŋuɔ̱tni, kä bi yi̱eriɛn ɛmɔ kɛ nöŋ ɣöö bi kuääriɛn ɛmɔ a mi lööthkɛ ɛ di̱eeth ri̱cnikiɛn diaal.”

¹⁶ Cu Muthɛ ɛ la̱t ni nɔ, ce̱tkɛ min ci Kuoth Nhial ɛ la̱t jɛ kɛɛliw, cuɛ jɛ la̱t ni nɔ.

¹⁷ Cua due̱l ku yiath piny kɛ pay in jio̱liɛn kä rɛw runä kɛ cäŋ in jio̱l kä pay.

¹⁸ Cu Muthɛ due̱l ɛmɔ yiath piny, cuɛ thär kääpni kue̱ŋ kä thi̱n keŋni, cuɛ cuɔ̱ɔ̱ŋkɛ kue̱ŋ kä thi̱n, kä cuɛ to̱ŋkɛ kuëŋ rɛydɛ, cuɛ thieerkɛ cuŋ.

¹⁹ Cuɛ bi̱i̱ nhiam pap wi̱i̱ duëël, kä cuɛ kuum duälä min dɔ̱ŋ la̱th wi̱i̱dɛ, ce̱tnikɛ mëë ci Kuoth Nhial ɛ la̱r Muthɛ.

²⁰ Kä cuɛ lueek ka̱n kä cuɛ kɛ la̱th rɛy thandukä lueekni, kä cuɛ jɛ moc to̱ŋ gëëknikɛ. Cuɛ kum kuëŋ wi̱i̱ thandukä nhial,

²¹ cuɛ thanduk no̱o̱ŋ rɛy duëël, kä cuɛ thanduk lueekni ge̱l, ce̱tnikɛ min ci Kuoth Nhial jɛ la̱r Muthɛ.

²² Kä cuɛ Tharbët la̱th guäthdɛ rɛy duëël rɛc i̱ kui̱c cueec duëël, kui̱c ɛ wëë kayŋuääk ɛ, jɔk ge̱e̱lä raar,

²³ kä cuɛ jurayni tin rɛl kɛ rɔ guɛr wi̱i̱dɛ nhiam Kuoth Nhial, ce̱tnikɛ mëë ci Kuoth Nhial ɛ la̱r Muthɛ.

²⁴ Kä cuɛ cuuŋ lɛmbärä la̱th rɛy duëël ro̱mä, lotdä tharbëtdä kui̱c caam duëël ɛmɔ, kui̱c ɔ wëë targɛ̈w ɔ.

²⁵ Cuɛ lɛmbär la̱th nhiam Kuɔth Nhial, ce̱tnikɛ mëë ci Kuoth Nhial ɛ la̱r Muthɛ.

²⁶ Kä cu Muthɛ yi̱k dääpä wal la̱th rɛy duëël ro̱mä nhiam ge̱e̱lä.

²⁷ Kä cuɛ wäl mi kur kur waŋ wi̱i̱dɛ, ce̱tnikɛ mëë ci Kuoth Nhial ɛ la̱r jɛ.

²⁸ Cuɛ bi̱i̱ thi̱ek thuɔk duëël ro̱mä la̱th thi̱n.

²⁹ Kä cuɛ yi̱k weŋä luuri kuëŋ thok duëël ro̱mä, kä cuɛ Kuoth lor kɛ luuri tin la waŋkɛ wi̱i̱dɛ amäni luuri bɛɛl, ce̱tnikɛ ruac ëë ci Kuoth Nhial ɛ la̱r jɛ.

³⁰ Kä cuɛ thak la̱k kuëŋ kam duëël ro̱mä kɛnɛ yi̱k, kä cuɛ rɛydɛ jiöm pi̱ la̱k,

³¹ ɛ jɛn min la Muthɛ kɛnɛ Ä-ron kɛnɛ gaatkɛ te̱tkiɛn kɛ ciökiɛn a lak kɛ jɛ.

³² Mi cikɛ wä rɛc due̱e̱l ro̱mä, kɛnɛ mi cikɛ rɔ̱ ticiec gekä yi̱kä, bikɛ rɔ̱ lak, ce̱tnikɛ mëë ci Kuoth Nhial ɛ la̱r Muthɛ.

³³ Kä cuɛ käl rɛ̈ɛ̈k yiath piny, yi̱i̱thɛ jɛ ni due̱l kɛnɛ yi̱k rɛc i̱, kä cuɛ bi̱i̱ thuɔkdɛ la̱th thi̱n. Cu Muthɛ la̱t ɛmɔ cu thuk.

Pua̱r wi̱i̱ duëël ro̱mä

³⁴ Cu pua̱r due̱l ro̱mä cu kuɔ̱m piny, kä cu wuɔ̱t Kuɔth Nhial due̱l ro̱mä riaw kɛɛliw.

³⁵ Kä cu Muthɛ thil gua̱a̱th kɛ coth rɛy duëël ro̱mä kɛ ɣöö ci pua̱r ben ciɛŋ wi̱cdɛ, kä cu wuɔ̱t Kuɔth Nhial due̱l ɛmɔ riaw kɛɛliw.

³⁶ Rɛy jälikiɛn diaal, mɔ ca pua̱r woc wi̱i̱ duëël ro̱mä mɔ, la ji̱ I-thɛ-rɛl a wä nhiam,

³⁷ kä mi /ka̱n pua̱r woc, /cikɛ lɛ wä nhiam amäni cäŋ in wa jɛ woc.

³⁸ Kɛ kui̱ kä ɣöö tëë pua̱r Kuɔth Nhial wi̱i̱ duëël kɛ cäŋdäär rɛy jälikiɛn diaal, kä te mac rɛydɛ mi ca wäär waaŋ ji̱ I-thɛ-rɛl diaal.