Ɣöth 4 - RUAC KUƆTH IN RƐL RƆ

Käm Kuɔth kɛ Muthɛ lua̱ŋ

¹ Ɛ jɛn, cu Muthɛ Kuoth ku loc i̱, “Kä nɛn ɛ, ɣän bä ŋu lɛl mi /ca ɣä bi ŋäth kä /ca ruacdä bi liŋ ɛ ji̱ I-thɛ-rɛl? Dɔ̱ŋ bi kɛn ɛ lar i̱, ‘/Kenɛ rɔɔdɛ nyuɔ̱th ji̱.’ ”

² Cu Kuoth Nhial ɛ jiök i̱, “Ɛŋu te te̱tädu mɔ?” Cu Muthɛ wee i̱, “Ɛ kɛɛt mi go̱o̱ŋ.”

³ Cuɛ jɛ jiök i̱, “Yori jɛ piny.” mëë cɛ jɛ ku yuɔr piny, cuɛ rɔ loc ni thɔ̱l, a bi Muthɛ rɔɔdɛ bar kɛ jɛ.

⁴ Cu Kuoth Nhial ɛ jiök i̱, “Riny tetdu, kuany ɛ juäälɛ.” Cuɛ tetdɛ riny, cuɛ jɛ käp, niɛ wa̱nɔ cuɛ rɔɔdɛ loc ni kɛɛt mi go̱o̱ŋ te̱tädɛ.

⁵ Cu Kuoth Nhial ɛ jiök i̱, “Nɛmɛ ɛ ɣöö ba cu ŋäth ɛ kɛn i̱ Kuoth Nhial Kuoth guuri, Kuoth Ay-dhɛk, Kuoth Je-kɔb cɛ rɔɔdɛ nyuɔ̱th ji̱.”

⁶ Cuɛ jɛ lɛni jiök i̱, “Cotni tetdu rɛy bieydu.” Cuɛ tetdɛ cu cuɔt, mëë wëë jɛ guëëth raar, cua tetdɛ käp ɛ dhɔp, cuɛ buay ce̱t cak.

⁷ Cu Kuoth ɛ ku jiök i̱, “Cotni tetdu rɛy bieydu.” Cuɛ jɛ nyɔk kɛ loc thi̱n, kä mëë wëë jɛ nyɔk kɛ guëëth raar cu tetdɛ pual ɛ bɛ ce̱tnikɛ duɔth pua̱a̱nydɛ min dɔ̱ŋ.

⁸ Cu Kuoth ɛ jiök i̱, “Mi /ca ji̱ bi ŋäth, kiɛ /cikɛ ruacdu bi liŋ kɛ nyuuth in nhiam, bikɛ nyuuth in dɔ̱ŋ ŋäth.

⁹ Mi /cikɛ nyuuthni da̱ŋ rɛw ti̱ti̱ bi ŋäth, kä /cikɛ ruacdu bi liŋ thi̱n, jɔm pi̱ kiɛɛr, wocni kɛ muun in kööt. Bi pi̱ tin ci jɔm yie̱e̱r rɔ̱ loc ni riɛm wi̱i̱ muɔ̱ɔ̱n in kööt.”

Ä-ron ala thok Muthɛ

¹⁰ Cu Muthɛ Kuäär ni Kuoth ku jiök i̱, “/Ciɛ ɣän ram mi ŋäc ruac ni mëë, amäni mi ruaci kɛ ɣä mi, kä kuiy ruacdä.”

¹¹ Cu Kuoth Nhial jɛ jiök i̱, “Ɛŋa mi moc raan ŋäc ruac? Kä ɛŋa mi jak lieŋdɛ kä dak? Kä ɛŋa mi la miiŋ jɛ? Ciɛ ɣän puɔ̱nydä, ɣän Kuoth Nhial?

¹² Wër täämɛ, ɣän bä te thokdu, bä ji̱ nyuɔ̱th kɛ min bi lat.”

¹³ Kä cuɛ wee i̱, “Aɣ la̱a̱ŋä ni ji̱, kuäärä, jäkni radɔ̱diɛn.”

¹⁴ Cu Kuoth Nhial lɔcdɛ cu jiääk kɛ Muthɛ, cuɛ jɛ jiök i̱, “Ci dämuɔɔr ni Ä-ron raan Lii-bay tëë wi̱ni? Ɣän ŋa̱cä jɛ ɛn ɣöö derɛ ruac agɔaa. Kä jɛn a bëë ni, ro̱mɛ kɛ ji̱. Mi wëë ji̱ nɛn, bi lɔcdɛ tɛɛth kɛ nendu.

¹⁵ Bi ruac kɛ jɛ, ku laat ti̱ti̱ cu la̱th thokdɛ. Ɣän bä te thokdu, kä bä te thokdɛ, bä ji̱ nyuɔ̱th kɛ mi bi la̱t.

¹⁶ Bɛ ruacdu ga̱m naath, ba thokdu, bi ku lɛ ce̱t Kuoth kä jɛ.

¹⁷ Bi kɛɛt in go̱o̱ŋ in bi lät ni nyuuthni rɔm kɛ tetdu.”

Loc Muthɛ kä I-jëp

¹⁸ Ɛ jɛn, cu Muthɛ ku loc kä gua̱nthudɛ ni Yith-ro, cuɛ jɛ wä jiök i̱, “Ɣän la̱a̱ŋä ni ji̱, a luɔcä kä watkä kä I-jëp, ba wä nɛn mi kɛ nɛy ti ŋot te̱e̱kä.” Cu Yith-ro Muthɛ jiök i̱, “Wër ni kɛ mal.”

¹⁹ Mëë ŋot Muthɛ muun Mid-yan, cu Kuoth Nhial ruac kɛ jɛ wëë i̱, “Locni kä I-jëp kɛ ɣöö kɛn nɛy diaal tëë görkɛ näkdu ɛn täämɛ cikɛ li̱w.”

²⁰ Cu Muthɛ ciekdɛ kɛnɛ gaatkɛ ka̱n, kä cuɛ kɛ kuëŋ jɔk muɔ̱l kä cuɛ rɔɔdɛ rieet, lunyɛ kä I-jëp. Kä rɔm Muthɛ kɛɛt Kuɔth in go̱o̱ŋ kɛ tetdɛ.

²¹ Cu Kuoth Nhial jɛ jiök i̱, “Mi wi̱i̱ loc kä I-jëp, tit ɛ ɛn ɣöö bi ti diaal ti ga̱ykɛ naath tëë cä kuëŋ te̱tädu la̱t nhiam Pɛro, kä bä lɔcdɛ jak kä bum a /cɛ naath bi nhök wä.

²² Ji̱n bi Pɛro jiök i̱, ‘I-thɛ-rɛl ɛ jɛn gatdä min kɛ̱̈ɛ̱̈.’

²³ Ci jiök i̱, ‘A gatdä wä ɣä pal.’ Kä kɛ ɣöö ci wädɛ lo̱k, tit ɛ ɣän bä kɛ̱̈ɛ̱̈du dhil näk.”

²⁴ Täämɛ cu Kuoth Nhial näk Muthɛ go̱r dup mëë cikɛ röm guäth mi ci naath pua̱t thi̱n.

²⁵ Cu Dhi-pö-ra ciɛ̈l pa̱a̱m mi moth ka̱n kä cuɛ gatdɛ cuɛl kɛ jɛ, cuɛ ciök cɔaadɛ ni Muthɛ ben yiny kɛ guɔp ɛmɔ, cuɛ cu wee i̱, “Ɛpuc, ji̱n ci kua̱ cɔw riɛm kath kä ɣä.”

²⁶ Cu Kuoth ɛ cu päl. Kä ɛ jɛn mëë ci ciek ɛ lar i̱, “Ci kua̱ cɔw riɛm kä ɣä, kɛ ɣöö cu cuël cu te thi̱n.”

²⁷ Ɛn kamä nɔmɔ, cu Kuoth Nhial Ä-ron jiök i̱, “Wër, ro̱mni kɛ Muthɛ dɔɔr.” Cuɛ cu wä, cuɛ wä röm kɛ jɛ pa̱a̱m Kuɔth, kä cuɛ jɛ cim.

²⁸ Cu Muthɛ laat Kuoth Nhial diaal tëë cɛ jäk ni jɛ kɛ kui̱diɛn la̱t Ä-ron.

²⁹ Cu kɛn da̱ŋ rɛw di̱t I-thɛ-rɛl diaal wä dol,

³⁰ cu Ä-ron laat diaal tëë ci Kuoth Nhial kɛ la̱t Muthɛ la̱t naath, kä cuɛ lät ti ga̱ykɛ naath la̱t nhiam nath.

³¹ Cu naath ɛ ŋäth mëë cikɛ jɛ liŋ i̱ ci Kuoth Nhial ji̱ I-thɛ-rɛl gui̱l, kä cɛ bɛ̈c bɛ̈ɛ̈ckiɛn nɛn, cukɛ wuɔ̱thkiɛn guɔ̱l piny, cukɛ jɛ pal.