Ɣöth 38 - RUAC KUƆTH IN RƐL RƆ

Ta̱th yi̱kä mucni ti waaŋ

¹ Cuɛ yi̱k mi la waŋkɛ luuri wi̱i̱dɛ la̱t kɛ jiath thëëp bä. Bärɛ jua̱th tetdä da̱ŋ dhieec, riewdɛ jua̱th tetdä da̱ŋ dhieec, ca kui̱ckɛ diaal pa̱a̱r. Bär thöölɛ ɛ jua̱th tetdä da̱ŋ diɔ̱k.

² Cuɛ jɛ lät kä tuɔ̱ŋ guɔ̱ɔ̱knikɛ da̱ŋ ŋuaan, la̱tkɛ tuɔ̱ŋkɛ kɛ jɛn jiath ɔ kɛl ɔ kɛ puɔ̱nydɛ, kä cuɛ jɛ rɔth kɛ ciɛk mi yian.

³ Kä cuɛ kuak yi̱kä diaal la̱t, thääk, kɛ jio̱o̱mnikɛ, kɛ tuɔ̱ŋ, kɛ go̱o̱ni, kɛ yiömni miim. Cuɛ kuakɛ diaal tɔ̱tɔ̱ la̱t kɛ ciɛk mi yian.

⁴ Kä cuɛ duɔ̱ɔ̱r tak ce̱tkɛ cambak kɛ ciɛk mi yian kɛ kui̱ yi̱kä. Kä ca la̱th thaar thɛɛrädɛ min la la̱tkɛ pinydɛ a pe̱k däär ɔ, a /cɛ piny cop.

⁵ Cuɛ ciik da̱ŋ ŋuaan täth guɔ̱ɔ̱kni da̱ŋ ŋuaan kä min ca tak kɛ ciɛk ce̱tkɛ cambak ala kääpni kɛ kui̱ to̱ŋni.

⁶ Cuɛ to̱ŋ tɔ̱tɔ̱ la̱t kɛ jiath thëëp, kä cuɛ kɛ rɔth kɛ ciɛk in yian.

⁷ Kä cuɛ to̱ŋ cuɔt kɛ rɛy ciikni tin te kui̱cni yi̱kä da̱ŋ rɛw diaal, kɛ ɣöö ba kɛ kap ni jɛ. Cɛ täth ala gue̱k gue̱k ce̱tkɛ thanduk jiaath.

Thak la̱ŋ mi yian

⁸ Kä cuɛ thak la̱k te̱tni kɛnɛ ciök kua̱r ŋuɔ̱tni täth kɛ ciek in yian, la̱tkɛ jɛ kɛnɛ tharɛ kɛ ne̱e̱ni mään tin la̱a̱t thok duëël ro̱mä nath kɛ Kuoth Nhial.

Kal duëël ro̱mä

⁹ Kä cuɛ rɛk täth, cu kui̱c rɛ̈ɛ̈k kui̱c ɔ wëë targɛ̈w ɔ, tekɛ bieyni ti dël dëël ti ca mɛn a gɔw kä takɛ kɛ kɛ lath mi ca mɛn agɔaa ti bäriɛn jua̱th tetdä ti kuɔ̱r.

¹⁰ Kä thieerkiɛn ti jiɛn rɛw kɛnɛ thärkiɛn tin rɔamkɛ kɛ ti jiɛn rɛw ca kɛ täth kɛ ciɛk in yian, kä go̱o̱ni thieeri kɛnɛ loorikiɛn la̱tkɛ kɛ kɛ ciɛk in bo̱r.

¹¹ Kä cu kui̱c kayŋua̱a̱k tekɛ bieyni ti bäriɛn jua̱th tetdä ti kuɔ̱r. Ca thieerkiɛn ti jiɛn rɛw kɛnɛ thärkiɛn ti jiɛn rɛw la̱t kɛ ciɛk mi yian kɛɛl kɛ go̱o̱nikiɛn kɛnɛ thötkiɛn ti ca la̱t kɛ ciek in bo̱r.

¹² Kä te kui̱c känyä ca̱ŋ kɛ bieyni ti bäriɛn jua̱th tetdä ti jiɛn dhieec ti ca ŋap. Te kɛ kɛ thieer wäl kɛnɛ thärkiɛn da̱ŋ wäl. Ca go̱o̱nikiɛn kɛnɛ loorikiɛn la̱t kɛ ciɛk in bo̱r.

¹³ Cu nhiamdɛ min lot ni käny ca̱ŋ tëë kɛ bieyni ti bäriɛn jua̱th tetdä ti jiɛn dhieec.

¹⁴ Tëë kɛ bieyni ti ca ŋap thok rɛ̈ɛ̈k ti bäriɛn jua̱th tetdä da̱ŋ wäl dhieec, kɛ thieerkiɛn da̱ŋ diɔ̱k kɛnɛ thärkiɛn da̱ŋ diɔ̱k.

¹⁵ Kä ɛ jɛn inɔ bä kui̱c thi̱ek in dɔ̱ŋ thok rɛ̈ɛ̈k kui̱c ɔ kɛnɛ kui̱c ɔ ca bieyni ti dël dëël ti bäriɛn jua̱th tetdä da̱ŋ wäl dhieec ŋap thi̱n kɛ thieer diɔ̱k kɛnɛ thärkiɛn da̱ŋ diɔ̱k tin ca tɛ̈t piny.

¹⁶ Kɛn bieyni diaal tin ca ŋap puɔ̱ɔ̱ny kal kɛɛliw takɛ kɛ kɛ lath mi ca mɛn agɔaa, kä ca ta̱kdɛ thi̱n.

¹⁷ Kä ɣo̱t ciökni thieerikiɛn la̱tkɛ kɛ kɛ ciɛk in yian, kä go̱o̱ni thieeri kɛnɛ de̱pkiɛn ca kɛ la̱t kɛ ciɛk in bo̱r. Kɛn thieer diaal ca biɛɛnikiɛn rɔth kɛ ciɛk in bo̱r, kä tekɛ kɛ loori cikä mi bo̱r.

¹⁸ Kä bi̱i̱ thuɔk kal ca jɛ ta̱k biɛl mi yie̱l kɛnɛ mi mɛr kɛ do̱l, kɛ lath mi takɛ jɔkdɛ kɛ tet kɛ liprɔ. Lath mi ca mɛn agɔaa, bi̱i̱ bärɛ jua̱th tetdä ti jiɛn rɛw, kä ri̱i̱wädɛ kɛɛliw tho̱lɛ jua̱th tetdä da̱ŋ dhieec. Päärɛ kɛ bieyni kal tin kɔ̱kiɛn.

¹⁹ Kä thieerkiɛn da̱ŋ ŋuaan kɛnɛ ɣo̱t thärikiɛn da̱ŋ ŋuaan ca kɛ la̱t kɛ ciɛk in yian, kä go̱o̱ni thieerikiɛn ca kɛ la̱t kɛ ciɛk in bo̱r. Ca wuɔ̱thkiɛn rɔth kɛ ciɛk in bo̱r kä tekɛ kɛ loori cikä mi bo̱r.

²⁰ Kä löc duëël kɛɛliw kɛnɛ löc kal diaal ca kɛ la̱t kɛ ciɛk mi yian.

Yiëëth ëë ca tääth ni due̱l ro̱mä

²¹ Nɛmɛ ɛ jɛn mat ŋɔaani diaal tëë ca lät ni due̱l ro̱mä, min ca luëëk la̱th thi̱n, ala tëë ca kuɛn rɛy ruac Muthɛ ëë lätdɛ naath i̱ bi a la̱t duëël, cu ji̱ Lii-bay ɛ la̱t. Kä kɛ rui̱c I-ta-mar gat Ä-ron in la bo̱o̱th ŋuɔ̱tni,

²² cu Be-dha-lel gat Uri in la gat Ɣär in la raan döör Juda, ŋɔak diaal tëë ci Kuoth Nhial kɛ la̱t Muthɛ la̱t.

²³ Cukɛ kɛ la̱t kɛɛl kɛnɛ Ɔ-li-yab gat A-ɣi-tha-mak raan döör Daan. Ɛ ram mi kuur, kä ɛ ram mi ŋue̱e̱k jiɛn, ɛ ram mi tääk bieyni mi la jäm bieyni kɛ biɛl mi yie̱l kɛ mi mɛr kɛ mi do̱l kɛ ta̱k mi puɔth mi ca lathdɛ mɛn agɔaa.

²⁴ Pek dääpä ëë la̱tkɛ la̱t duëël Kuɔth kɛɛliw, a da̱a̱p ëë no̱o̱ŋkɛ ala muc, pe̱kdɛ ɛ theemni ti bath dɔɔr kɛl ki̱i̱lugram, ca thɛm kɛ theem duëël Kuɔth.

²⁵ Kä ciɛk in bo̱r ëë no̱o̱ŋkɛ ɛ ji̱ I-thɛ-rɛl tëë ca pe̱kdiɛn gɔ̱r, cu theemnikɛ a bathdɔɔri diɔ̱k wi̱cdɛ kur ŋuaan wi̱cdɛ jiɛn diɔ̱k ki̱i̱lugram, a ca thɛm ni kɛ theem duëël Kuɔth.

²⁶ Jɛn pe̱k ɛmɔ cua jɛn kui̱c in ci nɛy diaal tin ca ciöötkiɛn gɔ̱r ɛ no̱o̱ŋ, tho̱p ram ɔ ni pe̱k in thieckɛ kä jɛ, mi ca thɛm kɛ theem duëël Kuɔth. Kɛ ɣöö cua wutni diaal tin runkiɛn jiɛn rɛw di̱eeth kɛnɛ tin wä nhiam pe̱kdiɛn gɔ̱a̱r piny, cua nɛy ti bathdɔɔri ti kur bäkɛl wi̱cdɛ diɔ̱k, wi̱cdiɛn kur dhieec wi̱cdɛ jiɛn dhieec kuɛn.

²⁷ Theemni cikä in bo̱r ti kɛ theemni ti bathdɔɔri da̱ŋ diɔ̱k wi̱cdɛ kur ŋuaan ki̱i̱lugram, cua duŋ ta̱th kääpni thäri thieeri duëël Kuɔth ti kuɔ̱r kɛl, kɛnɛ kääpni thäri thieeri ge̱e̱lä. Theemni ti jiɛn diɔ̱k wi̱cdɛ ŋuaan ki̱i̱lugram kɛ kui̱ kääpä kɛl.

²⁸ Kɛ theemni ti jiɛn diɔ̱k duɔth cikä min bo̱r, cu Be-dha-lel go̱o̱ni thieeri la̱t kä cuɛ wuɔ̱th thieeri rɔth kɛ jɛ kä cuɛ de̱pkiɛn la̱t kɛ jɛ.

²⁹ Kä ciɛk ëë yian ëë ca ŋun pe̱kdɛ theemni ti bathdɔɔri rɛw wi̱cdiɛn kur ŋuaan wi̱cdɛ jiɛn da̱ŋ rɛw wi̱cdɛ dhieec ki̱i̱lugram.

³⁰ Cuɛ kääpni thäri thieeri thuɔk duëël ro̱mä nath kɛ Kuoth Nhial la̱t kɛ jɛ. Kɛ yi̱k mi ca täth kɛ ciɛk mi yian cuɛ la̱t kɛ jɛ amäni ciɛk in ca tak ce̱tkɛ cambak kɛ kui̱ yi̱ka amäni kuak wec yi̱kä diaal.

³¹ Kɛnɛ ɣo̱t ciökni cuɔ̱ɔ̱ŋni kal kɛnɛ ɣo̱t ciökni wäthni thuɔk kal, kɛ löc duëël kɛnɛ löc kal diaal.