Ɣöth 37 - RUAC KUƆTH IN RƐL RƆ

Ta̱th thandukä matdä

¹ Täämɛ, cu Be-dha-lel thanduk lueekni la̱t kɛ jiath thëëp. Bärɛ cua jua̱th tetdä da̱ŋ rɛw kɛ nuth, riewdɛ juäth tetdä kɛl kɛ nuth, kä tho̱lɛ juäth tetdä kɛl kɛ nuth.

² Kä cuɛ jɛ rɔth kɛ da̱a̱p mi ti̱l ti̱l rɛc ɔ kɛnɛ jɔk ɔ, kä cuɛ thɛɛr la̱t wi̱i̱dɛ kɛ da̱a̱p.

³ Kä cuɛ guɔ̱ɔ̱kɛ da̱ŋ ŋuaan lät kä ciik dääpä da̱ŋ ŋuaan. Ciik rɛw kui̱c kɛl, kɛ ciik kui̱c in dɔ̱ŋ.

⁴ Cuɛ jiɛn la̱t kɛ jiath thëëp, kä cuɛ kɛ rɔth kɛ da̱a̱p.

⁵ Kä cuɛ jiɛn kiɛk kɛ rɛy ciikni gëëkni thandukä kɛ ɣöö ba kɛ a kapkɛ ni thanduk.

⁶ Kä cuɛ kuum wi̱i̱ thandukä la̱t kɛ da̱a̱p mi ti̱l ti̱l. Bärɛ jua̱th tetdä da̱ŋ rɛw kɛ nuth, kä riewdɛ juäth tetdä kɛl kɛ nuth.

⁷ Kä cuɛ pua̱ny da̱ŋ rɛw ti ce̱tkɛ pua̱ny ja̱a̱kni täth kɛ da̱a̱p mi ca dɛŋ kɛ de̱y. Cuɛ kɛ la̱th pekni kuumä thandukä da̱ŋ rɛw.

⁸ Te kɛl pe̱e̱k thandukä kɛl kä te min dɔ̱diɛn pe̱e̱k in dɔ̱ŋ. Cɛ kɛ täth kɛ jɛn yieeth ɔ kɛl ɔ kɛ kuum thandukä kɛn da̱ŋ rɛw diaal.

⁹ Cukɛ gɔ̱kiɛn ɣa̱r nhial wi̱i̱ thandukä, buɔ̱rkɛ kuum thandukä piny kɛ gɔ̱kiɛn, a römkɛ nhiamdiɛn. Cikɛ nhiamdiɛn riet kuumä thandukä.

Ta̱th tharbëtdä mi̱eth in rɛl rɔ mi ka̱mkɛ Kuoth

¹⁰ Kä cuɛ tharbët lɛni la̱t bä kɛ jiath thëëp. Bärɛ jua̱th tetdä da̱ŋ rɛw, riewdɛ juäth tetdä kɛl, tho̱lɛ juäth tetdä kɛl kɛ nuth.

¹¹ Kä cuɛ kɛ rɔth kɛ da̱a̱p mi ti̱l ti̱l, kä cuɛ wi̱cdɛ ta̱th thɛɛr kɛ da̱a̱p.

¹² Kä cuɛ jɛ ta̱th rɛ̈l mi de̱l de̱l mi pät Pät mi ce̱tkɛ pät tetdä, kä cuɛ wi̱cdɛ ta̱th thɛɛr.

¹³ Cuɛ jɛ ta̱th ciik da̱ŋ ŋuaan kɛ da̱a̱p, cuɛ kɛ gɔan guɔ̱ɔ̱knikɛ da̱ŋ ŋuaan kä ciökɛ da̱ŋ ŋuaan.

¹⁴ Ca ciik thieek kɛ rɛ̈lɛ ala ti ba jiɛn gɔan thi̱n kɛ kui̱ ka̱p tharbëtdä.

¹⁵ Kä cua jiɛn la̱t kɛ thep kɛ ɣöö ba tharbët la kapkɛ kɛ kɛ, kä cua kɛ rɔth kɛ da̱a̱p.

¹⁶ Kä cukɛ kuak tharbëtdä täth kɛ da̱a̱p mi ti̱l ti̱l, kɛn kuak wec tharbëtdä, thääkɛ kɛnɛ thänkɛ kɛ kui̱ wal tin kuɔ̱r kuɔ̱ɔ̱r, tin la waŋkɛ, kɛ cuɔ̱ɔ̱kɛ kɛnɛ thääk tin di̱t tin la luur in la muɔckɛ piny a la̱thkɛ thi̱n.

Ta̱th cuuŋ lɛmbärä

¹⁷ Cuɛ cuuŋ lɛmbärä la̱t bä kɛ da̱a̱p mi ti̱l ti̱l. Thar cuuŋä lɛmbärä kɛnɛ tha̱a̱kɛ ŋuɛkɛ kɛ kɛ de̱y. Thääkɛ, kɛ tɛtkɛ tin ci tunh kɛ gaaknikɛ ta̱thkɛ kɛ kɛ yieeth kɛl.

¹⁸ Kä cuɛ tekɛ kar da̱ŋ bäkɛl ti ca rɔ̱ dia̱ny dɔɔr gëëknikɛ. Kar cuuŋä lɛmbärä da̱ŋ diɔ̱k tekɛ kui̱ydɛ kɛl, te kar cuuŋä lɛmbärä da̱ŋ diɔ̱k ti kɔ̱ŋ kui̱ydɛ min dɔ̱diɛn.

¹⁹ Thääk da̱ŋ diɔ̱k ti ca täth ala guɔ̱k guɔ̱ɔ̱k ce̱tkɛ tuaal, kä te mɔ rɛydɛ kɛ tɛtkɛ, kä te gaakni tualä thi̱n kä te kɛn diaal wi̱i̱ tuɔ̱ɔ̱ŋ kɛl, kä te thääk da̱ŋ diɔ̱k kɔ̱kiɛn thi̱n kui̱c in dɔ̱ŋ ti te mɔ kɛ tɛtkɛ ti ci tunh kä te gaaknikɛ thi̱n. Cu kar da̱ŋ bäkɛl tin ca rɔ̱ ɣa̱r wi̱i̱ cuuŋä lɛmbärä cu tëë nɔ.

²⁰ Kä jɛn cuuŋ lɛmbärä puɔ̱nydɛ te wi̱cdɛ kɛ thääk da̱ŋ ŋuaan ti ca täth ce̱tkɛ tuaal, kɛ tɛtkiɛn tin ci tunh kɛnɛ gaaknikiɛn.

²¹ Kɛ tɛ̈t kɛl mi ci tunh thaar kari thaak da̱ŋ rɛw kä kar da̱ŋ bäkɛl tin ca rɔ̱ dia̱ny dɔɔr Puɔ̱ɔ̱nydɛ. Kɛn tɛt tɔ̱tɔ̱ tekɛ kɛɛl kɛ puɔ̱ny cuuŋä thar kari lɛmbärä tin ca rɔ̱ rɛk kä tuɔ̱ŋ da̱ŋ bäkɛl tin ca rɔ̱ dia̱ny dɔɔr puɔ̱ɔ̱nydɛ.

²² Thar thääknikiɛn kɛnɛ karkiɛn dɛŋɛ kɛ kɛ kä jɛn yieeth ɔ kɛl ɔ kɛɛl kɛ puɔ̱ɔ̱nydɛ min la cuuŋ. Puɔ̱nydɛ cuuŋä lɛmbärä a ta̱thkɛ kɛn yieeth ɔ kɛl ɔ mi ca rith kɛ da̱a̱p mi ti̱l ti̱l.

²³ Kä cuɛ lɛmbärnikɛ da̱ŋ bärɔw la̱t kɛnɛ bieynikɛ tin la yienykɛ jɛ, kɛ tha̱a̱kɛ kɛ da̱a̱p mi ti̱l ti̱l.

²⁴ Cuɛ jɛ la̱t kɛnɛ kuakɛ diaal kɛ da̱a̱p mi ti̱l ti̱l mi pe̱kdɛ theemni ti jiɛn diɔ̱k wi̱cdɛ dhieec ki̱i̱lugram.

Ta̱th yi̱kä weŋä wal

²⁵ Kä cuɛ yi̱k mi ba wal ti la ŋuäny gɔaa a waŋkɛ wi̱i̱dɛ la̱t kɛ jiath thëëp. Bärɛ cua juäth tetdä kɛl, kä riewdɛ ɛ juäth tetdä kɛl, kui̱ckɛ diaal ca pe̱kdiɛn pa̱a̱r. Cu tho̱lɛ a jua̱th tetdä da̱ŋ rɛw, kä cua tuɔ̱ŋkɛ la̱t kɛ jɛn jiath ɔ kɛl ɔ kɛ puɔ̱nydɛ.

²⁶ Cuɛ jɛ rɔth kɛ da̱a̱p mi ti̱l ti̱l, biɛɛdɛ, kɛ bua̱a̱lkɛ diaal kɛnɛ tuɔ̱ŋkɛ, kä cuɛ wi̱cdɛ moc thɛɛr kɛ da̱a̱p.

²⁷ Kä cuɛ ciik da̱ŋ rɛw la̱t kɛ da̱a̱p jɔkdɛ thaar thɛɛrä kui̱cni yi̱kä da̱ŋ rɛw tin luɔtkɛ rɔ̱, ala go̱o̱ni to̱ŋni tin ba ku la kapkɛ jɛ.

²⁸ Kä cuɛ to̱ŋ tɔ̱tɔ̱ la̱t kɛ thep, kä cuɛ kɛ rɔth kɛ da̱a̱p.

Liöm liɛth yi̱rä mi ɣɛɛl rɔ

²⁹ Cuɛ liɛɛth yi̱rä mi rɛl rɔ la̱t bä, kɛnɛ wäl tulä mi ti̱l ti̱l mi tekɛ ŋuäny mi kur kur, ca liɔm agɔaa ce̱tkɛ la̱t gua̱n lio̱mä wal ti la ŋuäny.