Ɣöth 36 - RUAC KUƆTH IN RƐL RƆ

¹ “Ɛn wa̱nɛ mɔ, Be-dha-lel kɛnɛ Ɔ-li-yab, kɛ nɛy diaal tin ji̱ kuurä tin ci Kuoth kɛ ka̱m pɛl lätni, kɛ tiit ŋɔaani min ŋa̱ckɛ ni lät diaal tin ba cäp ni la̱t kɛmɛ ro̱mä, bikɛ lät ce̱tkɛ min ci Kuoth Nhial jɛ lar.”

Muc ti ŋuan kä naath

² Cu Muthɛ Be-dha-lel kɛnɛ Ɔ-li-yab cɔl, kɛ nɛy diaal tëë ci Kuoth Nhial ca̱riɛn moc pɛl la̱t, nɛy diaal tëë ci lɔcdiɛn wä la̱t a ca jɛ nhɔk.

³ Cukɛ muc tëë ca ŋun kɛ lɔc mi bo̱r ɛ ji̱ I-thɛ-rɛl kɛ ɣöö ba kɛ ben lät ni la̱t kɛmɛ ro̱mä, ka̱n kä Muthɛ. Cukɛ ŋot kɛ mi no̱o̱ŋkɛ muc ti thöpkɛ kɛ lɔc mi bo̱r kɛ runwaŋ ni ciaŋ,

⁴ kɛ kui̱c ɛmɔ, cu wutni diaal tëë tekɛ pɛl lätni, tëë tekɛ ca̱r la̱t kɛmɛ röma, ben, bä ram ɔ kɛ thar la̱tdɛ min la lätdɛ,

⁵ bɛ Muthɛ ben jiök i̱, “Naath no̱o̱ŋkɛ ni ti lënykɛ tin ro̱ŋ kɛ la̱t in ci Kuoth Nhial jɛ lar i̱ ba la̱t.”

⁶ Cu Muthɛ naath la̱r lär, kä cuɛ riet ɛmɔ wä wec i̱, “A thil wut kiɛ ciek mi lɛn muc dɔ̱diɛn nööŋ kɛ kui̱ kɛmɛkä ro̱mä.” Cu naath rɔ̱ cu ka̱p cuɔ̱ŋ no̱o̱ŋä ŋɔaani.

⁷ Kɛ kui̱ kä ɣöö ci ŋɔak tëë la̱tkɛ la̱t kɛɛliw ro̱ŋ a cikɛ ba̱l.

Ta̱th duëël ro̱mä

⁸ Cu wutni tin tekɛ lua̱ŋ la̱t, due̱l la̱t kɛ bieyni ti dël dëël da̱ŋ wäl. Takɛ kɛ kɛ bi̱i̱ mi gɔaa mi ca lathdɛ mɛn agɔaa, kɛ biɛl mi yie̱l kɛnɛ mi mɛr kɛ mi do̱l, kɛ pua̱ny ti ce̱tkɛ pua̱ny ja̱a̱kni ti ca täth ɛ ji̱ kuurä.

⁹ Bieyni diaal päär di̱tdiɛn kɛnɛ thɛ̈mdiɛn, bär biey in de̱l de̱l kɛl ɛ jua̱th tetdä ti jiɛn rɛw wi̱cdɛ bädäk, kä riewdɛ jua̱th tetdä da̱ŋ ŋuaan.

¹⁰ Kä cukɛ bieyni da̱ŋ dhieec thukiɛn dööp kɛɛl.

¹¹ Cukɛ thuk bieyni tin ca muɔ̱t, moc lath mi yiel kui̱c raar, kä cua la̱t inɔ bä kui̱c biey in dɔ̱diɛn kä bieyni diaal tin ca thukiɛn dööp kɛɛl.

¹² Cukɛ lath mi yiel ti jiɛn dhieec la̱th thok biey kɛl, kä cukɛ la̱a̱thni ti yiel ti jiɛn dhieec kɔ̱kiɛn la̱th thok biey in dɔ̱diɛn. Lot la̱a̱thni diaal kui̱c ɔ kɛnɛ kui̱c ɔ rɔ̱.

¹³ Kä cukɛ go̱o̱ni ti jiɛn dhieec ti kua kɛ la cuɔtkɛ thi̱n la̱t kɛ da̱a̱p, kä cukɛ kɛn bieyni tin di̱t da̱ŋ rɛw ku dööp kɛ kɛn go̱o̱ni tɔ̱tɔ̱. Cu due̱l cua kɛl kɛɛliw.

¹⁴ Cukɛ bieyni ku tak kɛ mi̱em böwni kɛ ɣöö ba kɛ la̱th nhial wi̱i̱ duëël ro̱mä. Cukɛ bieyni ti dël dëël da̱ŋ wäl kɛl tak.

¹⁵ Bär kä kɛl kä kɛn bieyni tɔ̱tɔ̱ ɛ jua̱th tetdä ti jiɛn diɔ̱k, kä riewdɛ jua̱th tetdä da̱ŋ ŋuaan. Kɛn bieyni tin dël dëël da̱ŋ wäl kɛl diaal, päär thɛ̈mdiɛn.

¹⁶ Cukɛ bieyni tɔ̱tɔ̱ dööp kɛɛl dhieec kɛɛl kärɔ̱, kɛ bäkɛl kɛɛl go̱lädiɛn.

¹⁷ Kä cukɛ la̱a̱thni ti jiɛn dhieec la̱t thok biey kä mat bieyni tin nhiam tin ca dööp, kä cuɛ la̱a̱thni ti jiɛn dhieec kɔ̱kiɛn la̱t thok biey in dɔ̱ŋ min mɔ mat kä tin ca dööp go̱lädiɛn.

¹⁸ Kä cukɛ go̱o̱ni ti jiɛn dhieec ti kua la̱a̱thni la ruɔnykɛ rɛydiɛn la̱t kɛ ciek in yian kɛ ɣöö ba bi̱i̱ duälä wec duëël ro̱mä dööp kɛ kɛ ala kɛl kɛɛliw.

¹⁹ Kä cukɛ due̱l ɛmɔ bur kɛ tuacni rɔɔmni ti thiääŋ kɛnɛ tuacni böwni.

²⁰ Kä cukɛ cuɔ̱ɔ̱ŋ duëël ro̱mä tin cuɔ̱ŋkɛ ni jɛ nhial la̱t kɛ jiath thëëp.

²¹ Cuɔ̱ŋ kɛl bärɛ jua̱th tetdä da̱ŋ wäl, kä riew cuŋä kɛl ɛ juäth tetdä kɛl kɛ nuth.

²² Cuɔ̱ŋ kɛl kä kɛn diaal tëë kɛ ciök rɛw ti ca rɛk thaarɛ, kɛ kui̱ kä ɣöö bikɛ ro̱ŋ ɣo̱tni tin ca guaŋ piny. Cua nɔmɔ lät ni kɛn cuɔ̱ɔ̱ŋ duëël diaal.

²³ Cukɛ cuɔ̱ɔ̱ŋ duëël diaal la̱t ni kɛ jɛn ta̱a̱ ɛmɔ inɔ. Cuɔ̱ɔ̱ŋ ti jiɛn rɛw kui̱ duëël ɔ wee targɛ̈w ɔ.

²⁴ Kä cukɛ kääpni thariɛn tɛ̈t piny keŋni duëël diaal kɛ ciɛk in bo̱r. Thäri cuɔ̱ɔ̱ŋni ti jiɛn rɛw tëë kɛ kääpni thar da̱ŋ rɛw ti luɔtkɛ rɔ̱ kɛ cuɔ̱ŋ kɛl ciöknikɛ da̱ŋ rɛw tin ca rɔ̱ rɛk.

²⁵ Kä cukɛ cuɔ̱ɔ̱ŋ ti jiɛn rɛw la̱t kui̱c kayŋuääk,

²⁶ kɛnɛ ɣo̱tkiɛn ti jiɛn ŋuaan ti cuɔ̱ŋkɛ thi̱n piny ti ca täth kɛ ciɛk in bo̱r. Ɣo̱t da̱ŋ rɛw piny bikɛ te thaar thi̱er kɛl, kä ɣo̱t da̱ŋ rɛw tin kɔ̱kiɛn bikɛ te thaar thier kɛl.

²⁷ Kä cukɛ jɔk duëël lät kä cuɔ̱ɔ̱ŋ da̱ŋ bäkɛl kui̱c ɔ wee kony cäŋ ɔ.

²⁸ Kä cukɛ guɔ̱ɔ̱k jɔak duëël lät kä cuɔ̱ɔ̱ŋ da̱ŋ rɛw kɔ̱kiɛn.

²⁹ Ca kɛ cuɔ̱ŋ te mɔ gukädɛ kɛ ɣöö bikɛ tekɛ dääk thaariɛn kɛ ka̱a̱p duëël tin di̱eel, kä ca kɛ ku lɛ mat kɛɛl wi̱i̱diɛn thaar bëër min te bikä duëël. Cukɛ kɛn da̱ŋ rɛw diaal la̱t inɔ kɛ kui̱ guɔ̱ɔ̱kni da̱ŋ rɛw.

³⁰ Cu cuɔ̱ɔ̱ŋ da̱ŋ bädäk te thi̱n kɛ ɣo̱tkiɛn da̱ŋ wäl wi̱cdɛ bäkɛl ti ca täth kɛ ciɛk in bo̱r. Cuɔ̱ɔ̱ŋ diaal te cuɔ̱ŋ ɔ kɛ ciök da̱ŋ rɛw.

³¹ Kä cukɛ bëër la̱t kɛ jiath thëëp, cukɛ dhieec la̱t kɛ kui̱ cuɔ̱ɔ̱ŋni duëël kui̱c kɛl,

³² kɛ bëër dhieec kɔ̱kiɛn kɛ kui̱ cuɔ̱ɔ̱ŋni duëël kui̱c in dɔ̱diɛn, kɛ bëër dhieec kɛ kui̱ cuɔ̱ɔ̱ŋni duëël jɔk ɔ kui̱c ɔ wee kony cäŋ ɔ.

³³ Kä cukɛ be̱r da̱a̱r mi bäär la̱t a palɛ kui̱cni diaal, kaathɛ cuɔ̱ɔ̱ŋ däär.

³⁴ Kä cukɛ cuɔ̱ɔ̱ŋ tɔ̱tɔ̱ rɔth kɛ da̱a̱p, cukɛ ciikiɛn täth kɛ da̱a̱p kɛ ɣöö bikɛ a kääpni bëëri, kä cukɛ bëër rɔth kɛ da̱a̱p.

³⁵ Kä cukɛ ge̱e̱l biey in de̱l de̱l tak kɛ lath mi biɛlɛ yie̱l, kɛnɛ mi mɛr, kɛ mi do̱l. Mi la lath mi ca mɛn agɔaa kä ca ta̱kdɛ thi̱n. Cukɛ puɔ̱ny ti ce̱tkɛ pua̱ny ja̱a̱kni jak kä ta̱thkɛ ɛ be̱l tin gɔw ni kɛn.

³⁶ Kä cukɛ thieer da̱ŋ ŋuaan kuac kä jiath thëëp kɛ kui̱dɛ kä cukɛ kɛ rɔth kɛ da̱a̱p, go̱o̱nikiɛn ɛ da̱a̱p bä, kä cukɛ ɣo̱t ciöknikiɛn kɛn da̱ŋ ŋuaan täth kɛ ciɛk in bo̱r.

³⁷ Kä cukɛ bi̱i̱ tak kɛ kui̱ thuɔk duëël ro̱mä. Cukɛ jɛ tak kɛ biɛl lath mi yie̱l kɛnɛ mi mɛr, kɛ mi do̱l, kɛ lathdiɛn mi ca mɛn agɔaa kä ca ta̱kdɛ thi̱n. Ca biɛɛlkɛ dɛ̈r thi̱n kɛ tet kɛ liprɔ.

³⁸ Kɛ thieerkɛ da̱ŋ dhieec kɛɛl kɛ go̱o̱nikiɛn, kä cukɛ thär thääkni wäthni thieeri kɛnɛ go̱o̱nikiɛn rɔth kɛ da̱a̱p, kä cukɛ ɣo̱tkiɛn kɛn da̱ŋ dhieec täth kɛ ciɛk in bo̱r.