Ɣöth 34 - RUAC KUƆTH IN RƐL RƆ

Pääm ti pat paat ti kɔ̱kiɛn kɛ kui̱ lueekni

¹ Cu Kuoth Nhial Muthɛ jiök i̱, “Kuac pääm da̱ŋ rɛw ti pat paat ti ce̱tkɛ tëë nhiam, bä rieet tëë cä gɔ̱a̱r jɔk kä tëë nhiam tëë ci töl, ben gɔ̱a̱r jɔkdiɛn.

² Riali rɔɔdu ikä kɛ runwaŋ, kä bër wi̱i̱ Pa̱a̱m Thi-nay kɛ runwaŋ. Bër nhiamdä wi̱i̱ pa̱a̱m.

³ /Cu raan no̱o̱ŋ kɛ ji̱ kɛɛl, kä thilɛ ram mi ba dääkdɛ nɛn wi̱i̱ pa̱a̱m kɛɛliw, cäŋɛ ni bun de̱e̱t kiɛ ɣɔ̱k akɛ /ca no̱o̱ŋ laak gekä pa̱a̱m ɛmɔ.”

⁴ Ɛ jɛn, cu Muthɛ pääm da̱ŋ rɛw ti ce̱tkɛ pääm tëë nhiam kuac, kä cuɛ ke̱e̱r ni kɛ runwaŋ a ŋot ɣɔw ɛ gui̱r gui̱r, cuɛ wä wi̱i̱ Pa̱a̱m Thi-nay ni kɛ ruac ëë ci Kuoth Nhial ɛ la̱r jɛ, a gɔnɛ pääm da̱ŋ rɛw kɛ te̱tkɛ.

⁵ Kä cu Kuoth Nhial ben piny kɛ pua̱r, kä cukɛ ben cuɔ̱ŋ kɛɛl, cuɛ köök kɛ ciötdɛ i̱ Kuoth Nhial.

⁶ Kä cuɛ rët kɛ nhiam Muthɛ, kä köökɛ i̱, “Kuoth Nhial, ɛ Kuoth mi kɔ̱c lɔc, kä gɔaa lɔc, mi gua̱n dhi̱i̱lä, mi /ci nhökdɛ min thil pek kɛnɛ ciaŋ thuɔ̱ɔ̱knikɛ rɔ̱ wany.

⁷ Nyuthɛ nhökdɛ mi /ci rɔ wany nɛy ti bathdɔɔri, ta̱a̱ kɛ pälikä kɛ jiäk kɛnɛ dueer, mäni nyuɔɔn. Kä jɛn puɔ̱nydɛ /cɛ ram mi duundɛ la̱t dueeri ni ciaŋ päl ɛ tɛk, kä yɔ̱tdɛ duer gua̱ni gan wi̱i̱ gankiɛn mäni gaat gankiɛn wä ni kä käth in diɔ̱ɔ̱kdiɛn kɛnɛ ŋuaandiɛn.”

⁸ Kä cu Muthɛ wi̱cdɛ guɔ̱l piny, cuɛ jɛ pal.

⁹ Cuɛ wee i̱, “Aɣ, Kuäär ni Kuoth täämɛ ɣän mi jekä gɔɔy lɔaac kä ji̱, kua läŋ ni ji̱, kuäär, ku wä cieŋ rɛyda, cäŋ lapkɔ nɛy ti bum wuɔ̱thkiɛn bä, kä päli kɔ jiäkɔ kɛnɛ dueerkɔ, kä käni kɔ ala nyinku pa̱ny.”

Nyɔak matdä ruac kɛ yiɛth piny

¹⁰ Cu Kuoth Nhial Muthɛ jiök i̱, “Nɛn ɛ, ɣän cä guk ruacdä la̱th piny nhiam nɛɛniku diaal. Ɣän bä lät ti ga̱ykɛ naath ti /ka̱n me̱t la̱t rɛy ɣɔaa kɛɛliw kiɛ rɛy dööri diaal la̱t nhiam nɛɛniku diaal. Kä nɛy diaal ti̱n bia te rɛydiɛn bikɛ lätkä nɛn. Kä ɛnɔ bä la̱t kɛ kui̱dun ɔ ba mi bɛc ɛlɔ̱ŋ.

¹¹ Tit tin la̱tdä ji̱ ɛn wa̱lɛ. Nɛn ɛ, ɣän bä ji̱ Ɛ-mor, kɛnɛ ji̱ Kɛ-naan, kɛ ji̱ Ɣɛ̈th, kɛ ji̱ Pɛ-rii-dhi, kɛ ji̱ Iwi amäni ji̱ Yɛ-buth buɔ̱k nhiamdun.

¹² Ku rɔ̱ niɛk agɔaa ɛn ɣöö /ci ŋuɔ̱t bi lat kɛ kɛn ji̱ muɔ̱ɔ̱n ɛmɔ wiaa thi̱n ɔ, kɛ ɣöö /cikɛ dëë lɛ wa̱a̱ röök ciökni rɛydun.

¹³ Kä yɛn da̱kɛ yi̱knikiɛn, kä tölɛ pua̱ny kuthnikiɛn tin ca ta̱th rɔ̱, kä jɔapɛ riäkni kuthnikiɛn piny,

¹⁴ a thil kuoth dɔ̱diɛn mi bi pal, kɛ ɣöö, lapä Kuoth mi gua̱n tiilä.

¹⁵ /Cuarɛ tekɛ mat kɛ ji̱ rööl, mi wa jɛn, bi kuothkiɛn pal mi wäkɛ kuth ciëŋdiɛn wä pal, kä bikɛ kɛ na̱k ŋɔaani ti luɔɔrkɛ ni kɛ. Kɛnɛ mi wä raan kä yɛ wä cɔal nyuaakä, kä bia mi̱th ri̱i̱ŋ tin luɔɔrkɛ ni kuthkiɛn cam.

¹⁶ Amäni mi wiaa nyieekiɛn kuën gaatkun, kä dɔ̱ɔ̱ bi nyieekiɛn wä ŋot kɛ pal kuthnikiɛn, kä bikɛ gaatkun buath palä kɔɔr kuthnikiɛn.

¹⁷ /Cuarɛ rɔ̱ lät kuth.

¹⁸ “Tiɛtdɛ ŋar jurayni ti thil thuɔp. Bia pam pam mi /ka̱n nupdɛ läny a camɛ kɛ ni̱n bärɔw, ce̱tnikɛ mëë cä guɔ̱k yɛ, kɛ gua̱a̱th ëë cä mɛk paay in cɔal i̱ Guak, kɛ ɣöö biaa raar kä I-jëp kɛ Guak.

¹⁹ Key diaal kɛ nyinkä, key ɣɔ̱ɔ̱k kɛnɛ key de̱e̱t,

²⁰ bi kɛ̱̈ɛ̱̈ muɔ̱l a luɛ̈lɛ kɛ ruath dɛ̈ɛ̈l rɔmä, kä mi /cia jɛ bi luɛl, bi ŋuäkdɛ tol. Kä bi key ganku diaal a luɛ̈lɛ, kä thilɛ ram mi bia bä nhiamdä kɛ te̱tkɛ.

²¹ “Yɛn bia lät kɛ ni̱n bäkɛl, kä bia a lɔ̱a̱ŋɛ kɛ bärɔw ni̱ni. Bia a lɔ̱a̱ŋɛ kɛ gua̱a̱th puɔ̱r kɛnɛ gua̱a̱th ŋër.

²² Kä bia cäŋ ŋarä juɔkni tit, kɛ cäŋ ŋar ŋër bɛɛl tin jio̱l, kɛ cäŋ ŋarä ŋër kɛ pe̱k runä.

²³ Bi tutkun diaal a bëë kä diɔ̱ɔ̱k kɛ ruɔ̱n nhiamdä, ɣän Kuoth Nhial in la Kuoth ji̱ I-thɛ-rɛl.

²⁴ Kä bä döör dhia̱y dɔɔr nhiamdun, kä bä pe̱k këthnikun lɛ̈k jɔk, kä /ca mundun bi röl ɛ raan, mi wiaa la biaa kä diɔ̱ɔ̱k kɛ ruɔ̱n nhiamdä, ɣän Kuothdun ni Kuoth Nhial.

²⁵ “Yɛn /cia riɛm luurädä bi luuri ɣä kɛɛl kɛ juray. /Cia duɔth ri̱eŋ luurä ca̱ŋ ti̱mä Bälä bi päl mäni runwaŋ.

²⁶ Bia kɛ̱̈ɛ̱̈ in nhiam kä kuay bɛɛl muɔ̱ɔ̱ndun no̱o̱ŋ due̱e̱l Kuɔthdun ni Kuoth Nhial. /Cuɔrɛ dɔw böwä bi thal kɛ cak man.”

²⁷ Kä cu Kuoth Nhial Muthɛ jiök i̱, “Gɔ̱r rieet ti̱ti̱, kɛ ɣöö kɛ kɛn rieet tin bi te kamdan kɔnɛ ji̱, amäni kamda kɔnɛ ji̱ I-thɛ-rɛl.”

²⁸ Kä cuɛ te kɛɛl kɛ Kuoth Nhial ɛn thɔ̱ŋ i̱ kɛ ni̱n ti jiɛn ŋuaan, thilɛ mi̱eth mi camɛ, kä thilɛ pi̱ ti maathɛ kɛ cäŋ däär kɛnɛ wäär. Kä cuɛ rieet tin la lueek Kuɔth da̱ŋ wäl gɔ̱a̱r puɔ̱ɔ̱ny pa̱a̱m in ca kuac ala pat pat.

Riew nhiam muthɛ

²⁹ mëë wä Muthɛ ben piny wi̱i̱ Pa̱a̱m Thi-nay kɛ kɛn pääm lueekni da̱ŋ rɛw tin pat pat te̱tädɛ, kä nhiamdɛ ɛ riaw riaw kɛ ɣöö bëë guäth mi cikɛ ruac thi̱n kɛnɛ Kuoth. Kä duundɛ ɣöö /känɛ jɛ ŋa̱c.

³⁰ Kä mëë wä Ä-ron kɛnɛ ji̱ I-thɛ-rɛl jɛ nɛn, a ci guɔ̱p nhiamdɛ a riaw riaw inɔ, cukɛ dual kɛ thieekdɛ.

³¹ Kä cu Muthɛ kɛ cɔl, kä cu Ä-ron kɛnɛ bööth ji̱ dolä diaal luny kä jɛ, cuɛ cu ruac kɛ kɛ.

³² Kɛ kɔrɛ cu ji̱ I-thɛ-rɛl diaal ben thie̱kä, cuɛ kɛ ka̱m lueek diaal tëë ci Kuoth Nhial kɛ lat kɛ jɛ wi̱i̱ Pa̱a̱m Thi-nay.

³³ Mëë wëë thuɔ̱k kɛ ruac kɛ kɛ, cuɛ nhiamdɛ ge̱l kɛ bi̱i̱ mi rɛp rɛp.

³⁴ Kä mɔ la wä Muthɛ rɛc ɔ nhiam Kuɔth Nhial, kɛ ɣöö bikɛ wä ruac ɔ, la ge̱e̱l a guɛɛnyɛ nhiamdɛ amäni mi wee ben raar. Mi cɛ ku ben raar, kä cɛ ji̱ I-thɛ-rɛl la̱r min ca la̱r ɛ,

³⁵ bi ji̱ I-thɛ-rɛl nhiam Muthɛ cu nɛn riawɛ, bɛ nhiamdɛ cu nyɔk kɛ gël amäni mi wee wä rɛc kɛmɛ ro̱mä kɛ ɣöö bɛ wä ruac kɛ Kuoth.