Ɣöth 33 - RUAC KUƆTH IN RƐL RƆ

Jiɛɛn nath thaar Pa̱a̱m Thi-nay

¹ Cu Kuoth Nhial Muthɛ jiök i̱, “Ji̱n yɛnɛ nɛy tëë kämi raar muun I-jëp, ɛn täämɛ, jiɛ̈yɛ ɛn wan ɛ. Wiaa ni muun ëë cä guɔ̱k A-bɛ-ram kɛnɛ Ay-dhɛk kɛ Je-kɔb, mëë laarä i̱ bä ka̱m kuaykiɛn.

² Kä ɣän bä jääk jäk kä nhiamdun. Bä ji̱ Kɛ-naan joc, kɛnɛ ji̱ Ɛ-mor kɛ ji̱ Ɣɛ̈th, kɛ ji̱ Pɛ-rii-dhi, kɛ ji̱ Iwi amäni ji̱ Yɛ-buth.

³ Kä wiaa muun caak kɛnɛ liɛɛth tuar. Kä ɣän /cä bi ja̱l dup kɛɛl kɛ yɛ mäni mi dëë yɛ puɔ̱k rɛy duɔ̱p kɛ ɣöö lapɛ nɛy ti bum wuɔ̱thkiɛn ɛ tet.”

⁴ Täämɛ, mëë ci naath thuk tɔ̱ jiäk tɔ̱tɔ̱ liŋ, cukɛ möt kɛ pa̱r, kä cuɛ thil ram mi ciɛŋ yio̱w pua̱a̱nydɛ.

⁵ Kɛ ɣöö ci Kuoth Nhial Muthɛ jiök i̱, “Jio̱kni ji̱ I-thɛ-rɛl i̱, ‘Yɛn lapɛ nɛy ti bum wuɔ̱thkun ɛ tet. Mi dëë ja̱l dup kɛ yɛ kɛɛl kɛ gua̱a̱th mi tɔt, ɣän dëë yɛ puɔ̱k. Wuɔcɛ yio̱w pua̱nynikun, kɛ ɣöö inɔ bä mɔ bä lät kä yɛ mɔ cu ŋa̱c.’ ”

⁶ Kɛ kui̱ ɛmɔ, cu ji̱ I-thɛ-rɛl yio̱w pua̱nynikiɛn woc. Niɛ mëë cikɛ kɛ woc thaar Pa̱a̱m Thi-nay /kenkɛ kɛ nyɔk kɛ kue̱ŋ amäni gua̱a̱th ëë wä kä wä nhiam.

Kɛmɛ ro̱mä

⁷ Gua̱thni diaal tɔ̱ la puɔ̱t ji̱ I-thɛ-rɛl thi̱n tɔ̱, la Muthɛ due̱l duälä mi la yiathkɛ piny cu yiath piny jɔk wec ni raar. Cuɛ jɛ cɔl i̱ due̱l ro̱mä nath kɛ Kuoth Nhial. Kä nɛy diaal tin görkɛ Kuoth Kuoth Nhial bikɛ wä due̱e̱l ro̱mä nɔmɔ jɔk wec raar.

⁸ Mɔ ci Muthɛ wä raar ɔ, wee due̱e̱l duälä nɔmɔ, la nɛy diaal rɔ̱ cua jiɛɛy. Cuŋ nɛy diaal ram ɔ thok duëël gɔaalɛ, guɛckɛ kɔr Muthɛ lɛɛr amäni mi cɛ coth rɛy duëël ɛmɔ.

⁹ Mɔ ci Muthɛ coth rɛy duëël ɔ la pua̱r in ci rɔ cuŋ a bëë piny, bɛ cuɔ̱ŋ thok thi̱ek duëël ro̱mä nath kɛ Kuoth Nhial, bi Kuoth Nhial ruac rɛydɛ kɛ Muthɛ.

¹⁰ Kä mɔ ci nɛy diaal pua̱r in ci rɔ cuŋ nɛn ɔ, cuŋä thok duëël duälä mɔ, bi nɛy diaal rɔ̱ jiac cuɔ̱ŋ palkɛ, ram ɔ thok duëël gɔaalɛ.

¹¹ Ɛ jɛn ruac ëë la ruac kɛ Kuoth Nhial kɛ Muthɛ ɛn nɛmɛ, a ro̱mkɛ nhieemkiɛn ce̱tnikɛ min la ruac raan kɛnɛ määthdɛ. Mɔ ci Muthɛ rɔɔdɛ nyɔk kɛ ri̱i̱t wi̱c ɔ la läätdɛ ni Jɔ-cua gat Nun mi ŋuɛ̈t cua̱ doth duëël duälä.

Lär Kuɔth kɛ ta̱a̱dɛ kɛɛl kɛ nɛɛkɛ

¹² Cu Muthɛ ku ruac kɛ Kuoth Nhial jio̱kɛ jɛ i̱, “Nɛn ɛ, ji̱n ci ɣä jiök i̱ bä nɛy ti̱ti̱ böth raar, kä /keni ɣä jak kä ŋa̱cä ram in bi ja̱k kɛ ɣä kɛɛl. Duundɛ ɣöö curi jɛ la̱r ɣä niɛ ji̱n puɔ̱nydu i̱ ŋäci ɣä ni cio̱tdä kä cä puɔ̱th je̱k kä ji̱ bä.

¹³ Kɛ kui̱ ɛmɔ täämɛ, ɣän mi tɛ̈ɛ̈thä lɔcdu, ku ɣä nyuɔ̱th ciaaŋdu kɛ ɣöö bä lɔcdu cu ŋa̱c agɔaa kä bä puɔ̱thdu cu rɔam thi̱n. Tit ɛ bä i̱ ɛn do̱r ɛ do̱r nɛɛniku pa̱ny.”

¹⁴ Kä cu Kuoth Nhial ɛ loc i̱, “Bi ti̱eepdä wä kɛ ji̱ kɛɛl, kä bä ji̱ moc kɛ lɔ̱ŋ.”

¹⁵ Kä cuɛ jɛ jiök i̱, “Dëë gɔaa ni ɣöö /cakɔ bi jiɛn ɛn wanɛ mi /ci ti̱eepdu puɔ̱nydɛ bi wä kɛ kɔ kɛɛl.

¹⁶ Kä dëëkɔ jɛ ku lɛ ŋa̱c i̱di ɛn ɣöö cakɔ puɔ̱th je̱k nhiamdu, /ciɛ ni ɣöö bi wä kɛ kɔ kɛɛl? Kɛ ɣöö ba kɔ cua ŋiɛckɛ kä nɛy diaal tin cieŋ rɛy ɣɔaa.”

¹⁷ Cu Kuoth Nhial Muthɛ jiök i̱, “Ɛ nɛmɛ latdi mi pa̱ny, ɣän ba la̱t kɛ min ci gɔɔy lɔaacdä je̱k, kä ŋa̱cä ji̱ kɛ ciötdu.”

¹⁸ Cu Muthɛ wee i̱, “Ɣän la̱ŋä ni ji̱, a nɛ̈ɛ̈nä buay pua̱a̱nydu.”

¹⁹ Kä cuɛ wee i̱, “Ɣän bä gɔɔydä kɛɛliw jak kä jɔc nhiamdu, kä bä ciötdä ni Kuoth Nhial nyoth nhiamdu, bi lɔcdä gɔaa kɛ ram in cä je̱k i̱ bä nyuɔ̱th gɔɔy lɔaacdä, kä bi lɔcdä kɔ̱a̱c kɛ ram in cä je̱k i̱ bä nyuɔ̱th kɔ̱a̱c lɔaacdä.”

²⁰ Kä cuɛ Muthɛ ku jiök i̱, “Ji̱n, /ci nhiamdä dëë guic kɛ ɣöö thilɛ ram mi dëë puɔ̱nydä nɛn a bɛ ŋot te̱e̱kä.”

²¹ Kä cuɛ ni wee i̱, “Nɛn ɛ, bër cuŋni gekädä wanɛ mi wi̱i̱ pa̱a̱m.

²² Kä guäth in jɔc kɛ gɔɔy pua̱a̱nydä nhiamdu ɣän bi̱i̱ cuɔt ɣɔ̱tdä pa̱a̱m, kä bi̱i̱ kum kɛ tetdä a amäni räthdä.

²³ Inɔ bä tetdä cu woc, bi cu nɛ̈n ni jɔkdä, kä /ci nhiamdä bi lɛ nɛn.”