Ɣöth 31 - RUAC KUƆTH IN RƐL RƆ

Bël kɛmɛkä ro̱mä

¹ Cu Kuoth Nhial Muthɛ jiök i̱,

² “Nɛn ɛ, ɣän cä Be-dha-lel in la gat Uri, Uri in la gat Ɣur, raan döör Juda cɔl ni cio̱tdä,

³ kä cä jɛ thiäŋ kɛ yiëëdä in gɔaa in rɛl rɔ. Cä jɛ ka̱m pɛl kɛnɛ ŋäc ŋɔaani, kɛ tiit kä ŋɔaani amäni ca̱a̱p kuurä diaal.

⁴ Kɛ ɣöö bɛ ca̱a̱p kuurä la̱t kɛ la̱t dääpä kɛnɛ la̱t cikä min bo̱r, kɛ la̱t min yian,

⁵ kɛ wuɔ̱ɔ̱k guiiyni kɛnɛ wuɔ̱r dɔ̱a̱kni, kɛ ŋa̱t jiɛn, amäni ca̱a̱p kuurä lätni diaal.

⁶ Nɛn ɛ, ɣän cä jɛ kuany kɛɛl kɛnɛ Ɔ-li-yab in la gat A-ɣi-tha-mak, raan döör Daan. Kä ɣän cä ji̱ kuurä diaal tin pɛl ka̱m ca̱a̱p be̱e̱lä diaal kɛ ɣöö bikɛ tin cä la̱r i̱ la̱t.

⁷ Ala ge̱e̱l duëël ro̱mä nath kɛ Kuoth Nhial kɛnɛ thanduk lueekni kɛnɛ kum wecdɛ min la duŋ kɔ̱cä lɔaac, amäni kuak duëël ro̱mä diaal.

⁸ Kɛ tharbët kɛnɛ kuakɛ kɛ min la lɛmbärni a cuɔ̱ŋkɛ wi̱i̱dɛ amäni kuakɛ diaal, kɛ yi̱k in la wäl mi ŋuäny gɔaa a waŋkɛ thi̱n,

⁹ amäni yi̱k luur tin lap waŋkɛ, kɛ kuakɛ diaal, kɛnɛ thak la̱k te̱tni kɛnɛ ciökɛ kɛ tharɛ min la cuŋ kɛ jɛ.

¹⁰ Kɛnɛ bieyni tin ca ta̱kdiɛn thi̱n, kɛnɛ bieyni Kuɔth ti ɣɛ̈lkɛ rɔ̱ kɛ kui̱ Ä-ron in la bo̱o̱th ŋuɔ̱tni, kɛnɛ bieyni gankɛ, kɛ kui̱ la̱t gua̱n kua̱r ŋuɔ̱tnikä.

¹¹ Kɛ liɛɛth yi̱rä Kuɔth, kɛ wal ŋuänyä tin gɔw tin la tuɔ̱ɔ̱lkɛ ni gua̱a̱th Kuɔth in thɛ̈kɛ. Bikɛ ti̱ti̱ diaal la̱t ce̱tnikɛ min cä la̱r ji̱.”

Ŋuɔ̱t ca̱ŋ lɔ̱ŋä Kuɔth

¹² Kä cu Kuoth Nhial Muthɛ jiök i̱,

¹³ “Läri jɛ ji̱ I-thɛ-rɛl i̱, ‘Yuɔpɛ ni̱n lɔ̱ŋädä, kɛ ɣöö nɔmɔ ɛ nyuth kamdä kɔnɛ yɛ ri̱cnikun diaal, kɛ ɣöö bia jɛ ŋa̱c i̱, ɣän Kuoth Nhial, ɛ ɣän jak yɛ kä lɛ̈y lɛ̈ɛ̈y ɔ.

¹⁴ Bia cäŋ lɔ̱ŋä a yuɔpɛ, kɛ ɣöö ɛ cäŋ Kuɔth mi gɔaa mi rɛl rɔ kä yɛ. Ram mi wä jɛ ya̱r duundɛ ɣöö ba näk, kä ram mi wä la̱t wä la̱t kɛ jɛn cäŋ ɛmɔ ba jɛ ŋuɔk raar rɛy nɛɛnikɛ.

¹⁵ Bi naath lät kɛ ni̱n bäkɛl, kä bärɔw ni̱ni ɛ cäŋ lɔ̱ŋä mi ca gok ni bum, ɛ cäŋ lɔ̱ŋä mi gɔaa mi rɛl rɔ kä Kuoth Nhial. Ram mi wä la̱t la̱t thi̱n duundɛ lia̱a̱.

¹⁶ Kɛ kui̱ ɛmɔ, bi ji̱ I-thɛ-rɛl jɛ a yoop, tiɛtdɛ cäŋ lɔ̱ŋä ala gok mi do̱raar ri̱cnikiɛn diaal.

¹⁷ Ba nyuth mi bi a do̱raar kamdä kɔnɛ ji̱ I-thɛ-rɛl ɛn ɣöö ɣän Kuoth Nhial cua nhial kɛnɛ piny cak kɛ ni̱n bäkɛl, kä cua lɔ̱ɔ̱ŋ kɛ bärɔwdiɛn, a bi yiëëdä wee ɣa̱a̱c.’ ”

¹⁸ Kä cuɛ Muthɛ ka̱m pääm da̱ŋ rɛw ti pat paat ti ca lueek gɔ̱a̱r thi̱n guäth ëë cɛ thuɔ̱k kɛ ruac wi̱i̱ Pa̱a̱m Thi-nay, pääm ti gɔ̱r ni Kuoth kɛ yiatdɛ.