Ɣöth 3 - RUAC KUƆTH IN RƐL RƆ

Ciöt Muthɛ

¹ Täämɛ, guäth ëë yi̱en Muthɛ det gua̱nthudɛ ni Yith-ro min la bo̱o̱th palä kä Mid-yan, cuɛ kɛ no̱o̱ŋ kui̱c waŋ, guäth mi cɔal i̱ Thi-nay min mɔ päm Kuɔth in rɛl rɔ.

² Kä cu jääk Kuɔth Nhial rɔɔdɛ nyuɔ̱th jɛ kɛ bo̱l maac däär buɔ̱t buɔ̱ɔ̱t. Cuɛ butbut nɛn pɛtdɛ kɛ mac, Kä /ci mac jɛ waŋ piny bä.

³ Cuɛ wee i̱, “Ɣän bä rɔɔdä ti̱ec thi̱n, bä mi gääy ɣä mi wä nɛn, jɛn mɔ /ci waŋ kɛ butbut ɔ!”

⁴ Mëë ci Kuoth Nhial jɛ nɛn i̱ ri̱tdɛ rɔɔdɛ thi̱n, cuɛ jɛ cɔl rɛy buɔ̱t buɔ̱ɔ̱t i̱, “Muthɛ, Muthɛ.” Cu Muthɛ ɛ loc i̱, “Ɣän ɛ.”

⁵ Kä cu Kuoth jɛ ku jiök i̱, “/Cu rɔɔdu cak ti̱eec thiäkä kämni wa̱a̱riku raar kɛ Ɣöö ɛn gua̱a̱th ɛ cuŋi thi̱n ɛ, ɛ mun mi thɛ̈kɛ, mi rɛl gɔɔydɛ rɔɔdɛ.”

⁶ Kä cuɛ wee i̱, “Ɛ ɣän Kuoth guur, Kuoth A-bɛ-ram, Kuoth Ay-dhɛk, Kuoth Je-kɔb.” Cu Muthɛ nhiamdɛ ku kum kɛ ɣöö cɛ dual kɛ guecdɛ kɛ Kuoth.

⁷ Cu Kuoth Nhial ɛ jiök i̱, “Ɣän cä bɛ̈c bɛ̈ɛ̈c nɛɛnikä ŋäc kä gua̱a̱th kä I-jëp, cä lulliɛn in ci ränh kä ɣä kɛ kui̱ kua̱ri La̱tdiɛn liŋ, kä cä jiɛ̈th lɔaaydiɛn nɛn ɛpuc.

⁸ Kä cä ben piny kɛ ɣöö bä kɛ ben naŋ raar te̱tni ji̱ rööl I-jëp, kä bä kɛ naŋ raar ɛn muun ɛmɔ, kä bä kɛ naŋ muun mi gɔaa, mun mi di̱i̱t, jɛn mun caak kɛnɛ tuaar. Jɛn ro̱l ji̱ Kɛ-naan, kɛ ji̱ ɣɛ̈th, kɛ ji̱ Ɛ-mor, kɛ ji̱ Pɛ-rii-dhi, kɛ ji̱ Iwi kɛnɛ ji̱ Yɛ-buth.

⁹ Kä nɛn ɛ, ci lul ji̱ I-thɛ-rɛl cop ji̱thdä, kä ɣän cä mit in miɛtkɛ ni kɛ ɛ ji̱ I-jëp ni jiäk nɛn.

¹⁰ Bër, ja̱kä ji̱ kä Pɛro, bi nɛɛkä ni ji̱ I-thɛ-rɛl wä böth raar kä I-jëp.”

¹¹ Kä cu Muthɛ Kuoth jiök i̱, “Ɛ ɣän ŋa mi dëë di̱l ni wä kä Pɛro a bä ji̱ I-thɛ-rɛl wä böth raar kä I-jëp.”

¹² Cuɛ Muthɛ jiök i̱, “Bä dhil te kɛɛl kɛ ji̱, kä bi nɛmɛ a nyuuth kɛ kui̱du, mi biɛ nyoth i̱ jäk i̱ ɣän, kä ji̱n mi wi̱i̱ nɛy tɔ̱tɔ̱ wä böth raar kä I-jëp, yɛn bia Kuoth ben pal wi̱i̱ pa̱a̱m ɛmɛ.”

Ciöt Kuɔth ëë ruac kɛ Muthɛ

¹³ Ɛn wa̱nɛ mɔ, cu Muthɛ Kuoth jiök i̱, “Mi wa̱a̱ wä kä ji̱ I-thɛ-rɛl, kä bä kɛ wä jiök i̱ Kuoth guuri cɛ ɣä jäk kä yɛ, kä mi kua ɣä lɛ wä thi̱ec ɛ kɛn i̱ cɔal jɛ i̱di, ɛŋu mi bä la̱r kɛ?”

¹⁴ Cu Kuoth Muthɛ jiök i̱, “Ɛ ƔÄN MI TE WANƆ.” Kä cu Kuoth Nhial wee jiök ni kɛ i̱, “Min cɔali ɛ ɣän min te wa̱nɔ ci ɣä jäk kä yɛ mɔ.”

¹⁵ Kä cu Kuoth Muthɛ jiök i̱, “Jiök ni ji̱ I-thɛ-rɛl i̱ ɛ Kuoth Nhial, Kuoth gua̱nikun, Kuoth A-bɛ-ram, Kuoth Ay-dhɛk, Kuoth Je-kɔb min jäk ji̱ kä kɛ, i̱ nɛmɛ ɛ jɛn ciötdä min bi te thi̱n amäni cäŋ kɛl, kä ba ɣä a tiɛtkɛ kɛ jɛ ɛ ri̱c diaal.

¹⁶ Wër, rol di̱t I-thɛ-rɛl guäth kɛl, kä jio̱kni kɛ i̱, ‘Ci Kuoth Nhial Kuoth guuri, Kuoth A-bɛ-ram, Kuoth Ay-dhɛk, Kuoth Je-kɔb rɔɔdɛ nyuɔ̱th ɣä, wëë i̱, ɣän cä yɛ nɛn amäni kɛn tin la̱tkɛ kä yɛ ɛ ji̱ I-jëp.

¹⁷ Kä cä car ɛn ɣöö bä yɛ kuëk raar yaakä I-jëp kä bä yɛ no̱o̱ŋ muun ji̱ Kɛ-naan, kɛ ji̱ ɣɛ̈th, kɛ ji̱ Ɛ-mor, kɛ ji̱ Pɛ-rii-dhi, kɛ ji̱ Iwi kɛnɛ ji̱ Yɛ-buth, mun caak kɛnɛ liɛɛth tuar.’

¹⁸ Bi di̱t I-thɛ-rɛl ruacdu liŋ, ji̱n yɛnɛ kɛ bia cu dhil wä nhiam kua̱r I-jëp, bia jɛ wä jiök i̱, ‘Kuoth Nhial min la Kuoth ji̱ Ɣi-bɛ-ru cɛ rɔ nyuɔ̱th kɔ, kä la̱ŋkɔ ji̱ täämɛ kɛ ɣöö bi kɔ jak kä wä ja̱l rɛy dɔaar kɛ ni̱n da̱ŋ diɔ̱k, kɛ ɣöö bakɔ Kuothda ni Kuoth Nhial wä moc kɛ luuri.’

¹⁹ Ɣän ŋa̱cä jɛ i̱ /ci kuäär I-jëp yɛ bi nhök jiɛn ɛ ni mi ba kok kɛ tet mi bumbum.

²⁰ Kɛ kui̱c ɛmɔ, ɣän bä tetdä riny ni bum. Kä bä I-jëp duäc kɛ ti diaal ti ga̱ykɛ naath tia̱ bä la̱t rɛydɛ ni. Kɛ kɔrɛ bɛ yɛ cu jak kä wä.

²¹ Kä ɣän bä ji̱ I-jëp dhil moc gɔɔy lɔaac kɛ kui̱ ji̱ I-thɛ-rɛl, mi wiaa jiɛn, /cia bi wä kɛ te̱tkun baaŋ.

²² Kä a ciek ɔ kä män ji̱ I-thɛ-rɛl thieec ciek thie̱e̱kädɛ kä män ji̱ I-jëp ni duɔ̱ɔ̱r amäni ciek in cieŋ kɛɛl kɛ jɛ cieŋdɛ, ce̱tkɛ kuat kiɛ til cikä kɛnɛ da̱a̱p, kɛ bieyni, bia kɛ la̱th pua̱nyni gankun kɛnɛ nyieekun. Bia nyin ji̱ I-jëp cu pël rɔ̱ inɔ.”