Ɣöth 29 - RUAC KUƆTH IN RƐL RƆ

Lëy Ä-ron kɛnɛ gaatkɛ

¹ “Min bi lät kä Ä-ron kɛnɛ gaatkɛ täämɛ, ɛ nɛmɛ, ji̱n bi kɛ rial ikä kɛ yi̱riɛn Kuoth, kɛ ɣöö bikɛ lätkä la̱t ala bööth palä. Käni ruath tha̱a̱k kɛl kɛnɛ rue̱e̱th rɔɔmni da̱ŋ rɛw ti thil diɛw,

² kɛ juray mi thil thuɔp, kɛnɛ jurayni ti pat paat ti ca nyɔ̱t kɛ liɛɛth, kɛnɛ pam pamni ti nyin tiɛtni ti rɛ̈p rɛ̈ɛ̈p ti ca wi̱cdiɛn yi̱r kɛ liɛɛth. Bi kɛ pat kɛ nup bɛɛl mi ko̱k ko̱k mi kɔ̱c kɔ̱c.

³ Bi kɛ la̱th rɛy diëny kɛl, bi kɛ no̱o̱ŋ kɛ di̱eny kɛl, kä bi ruath tha̱a̱k kɛnɛ rue̱e̱th rɔɔmni da̱ŋ rɛw no̱o̱ŋ.

⁴ Bi̱i̱ Ä-ron kɛnɛ gaatkɛ no̱o̱ŋ thok duëël ro̱mä nath kɛ Kuoth Nhial, bi kɛ cu puɔk kɛ pi̱.

⁵ Kä bi̱i̱ bieyni ka̱n, bi bi̱i̱ in cuɔɔr kuëŋ puɔ̱ɔ̱ny Ä-ron, kä bi bi̱i̱ in bäär in yɔ̱c yɔ̱c kuëŋ puɔ̱ɔ̱nydɛ kɛnɛ bi̱i̱ gɔ̱rä ran kä bi bi̱i̱ kath la̱th jɔkdɛ kä bi lɛ̈tdɛ dot kɛ la̱a̱k biey gɔ̱rä.

⁶ Kä bi̱i̱ kum la̱th wi̱i̱dɛ, kä bi kum in rɛl rɔ par nhiam kumä.

⁷ Kä bi liɛɛth yi̱rä ka̱n, bi jɛ wuɔc wi̱i̱dɛ, biɛ cu yi̱r.

⁸ Bi gaatkɛ no̱o̱ŋ bi̱i̱ bieyni tin cuɔri kuëŋ puɔ̱ɔ̱nydiɛn.

⁹ Kä bi lɛtkiɛn duɔt kɛ la̱a̱kni, kä bi̱i̱ kumnikiɛn kuëŋ wi̱i̱diɛn, kä bi lät gök ni a nyinkiɛn kɛ pe̱k mi do̱raar. Inɛ bi̱i̱ Ä-ron kɛnɛ gaatkɛ cu ŋuɔ̱tdä.

¹⁰ “Bi ruath tha̱a̱k no̱o̱ŋ thok duëël Kuɔth, bi̱i̱ Ä-ron kɛnɛ gaatkɛ te̱tkiɛn kuëŋ wi̱i̱ ruaath tha̱a̱k ɛmɔ.

¹¹ Kä bi ruath tha̱a̱k näk nhiam Kuɔth Nhial thok duëël ro̱mä.

¹² Bi tha̱a̱ŋ riɛm tha̱a̱k ka̱n, bi jɛ ku la yinyi wuɔ̱thni tuɔ̱ŋni yi̱kä kɛ yiatdu, kä bi duɔth riɛm wuɔc thaar yi̱kä.

¹³ Kä bi paar in kum jia̱c piny kɛɛliw ka̱n, kɛnɛ ra̱p kɔlä cua̱ny, kɛ rok da̱ŋ rɛw kɛ kɔalikiɛn kɛɛl, bi kɛ waŋ wi̱i̱ yi̱kä.

¹⁴ Kä bi ri̱ŋ tha̱a̱k kɛnɛ ko̱lɛ kɛ wawdɛ waŋ jɔk wec. Nɔmɔ ɛ luur mi la luur dui̱rä.

¹⁵ “Bi kɛl kä rue̱e̱th rɔɔmni ka̱n, kä bi Ä-ron kɛnɛ gaatkɛ te̱tkiɛn la̱th wi̱i̱ ruaath dɛ̈ɛ̈l rɔmä nɔmɔ.

¹⁶ Bi ruath dɛ̈ɛ̈l cu näk, kä bi riɛmdɛ ka̱n, bi jɛ kiɛth wi̱i̱ yi̱kä a guuli jɛ.

¹⁷ Bi ruath dɛ̈ɛ̈l ɛmɔ ŋuɔ̱k dhoni, kä bi jia̱cdɛ kɛnɛ ci̱nkɛ lak, kɛ ciökɛ, biɛ la̱th guäth kɛl kɛɛl kɛ dhonkɛ, kɛ wi̱cdɛ.

¹⁸ Bi ruath dɛ̈ɛ̈l ɛmɔ waŋ kɛɛliw wi̱i̱ yi̱kä. Ɛ luur mi wa̱ŋkɛ ɣä, ɣän Kuoth Nhial, ɛ miɛl mi kur kur mi tɛɛth lɔc. Ɛ luur maac kä Kuoth Nhial.

¹⁹ “Kä bi ruath rɔmä min dɔ̱diɛn ka̱n, bi Ä-ron kɛnɛ gaatkɛ te̱tkiɛn kuëŋ thi̱n.

²⁰ Bi jɛ cu näk, kä bi tha̱a̱ŋ riɛmdɛ ka̱n, biɛ la̱th wi̱i̱ jieth cueec Ä-ron kɛnɛ wuɔ̱th ji̱thni cuëcni gankɛ, kɛ wuɔ̱th yiɛtni cuëcni te̱tnikiɛn, tin di̱t kɛ wuɔ̱th yiɛtni ciöknikiɛn tin di̱t. Kä kithni tha̱a̱ŋ riɛm wi̱i̱ yi̱kä a guuli jɛ.

²¹ Kä bi tha̱a̱ŋ riɛm in te wi̱i̱ yi̱kä kɛnɛ liɛɛth yi̱rä ka̱n, biɛ kiɛth puɔ̱ɔ̱ny Ä-ron kɛnɛ bieynikɛ, mäni pua̱ny gankɛ kɛnɛ bieynikiɛn kɛ jɛ kɛɛl. Kä jɛn kɛnɛ bieynikɛ bikɛ a nyin Kuɔth ti ɣɛ̈lkɛ rɔ̱ mäni gaatkɛ kɛnɛ bieynikiɛn kɛ jɛ kɛɛl.

²² Bi kɔl ruaath dɛ̈ɛ̈l rɔmä lɛni ka̱n, kɛnɛ thiɔl jua̱a̱lɛ, kɛ paarɛ min ci jia̱c yi̱k piny, kɛ ra̱p cua̱ny, kɛ rok da̱ŋ rɛw kɛ kɔalikiɛn, kɛ ɣäm cueec, kɛ kui̱ kä ɣöö nɛmɛ ɛ dɛl in yi̱erkɛ ni kɛ.

²³ Rɛy diëny in te juray mi thil thuɔp thi̱n, jɛn di̱eny in ca luur ni ɣä, ɣän Kuoth Nhial, kämni juray kɛl raar thi̱n, kɛnɛ jurayni ti pat paat ti ca nyɔ̱t kɛ liɛɛth, kɛ pam pamni ti nyin tiɛtni ti rɛ̈p rɛ̈ɛ̈p ti ca wi̱cdiɛn yi̱r kɛ liɛɛth.

²⁴ Kä bi kɛn diaal la̱th te̱tni Ä-ron kɛnɛ te̱t gankɛ, bikɛ kɛ ŋuëŋ ɣä.

²⁵ Bi kɛ cu ka̱n te̱tnikiɛn, bi kɛ waŋ wi̱i̱ yi̱kä. Mati kɛ kɛɛl kɛ luur in la waŋkɛ ala miɛl tɛthkä lɔaac mi kur kur kä ɣä. Min mɔ luur maac kä jɛ.

²⁶ “Kä bi kaw ruaath dɛ̈ɛ̈l yi̱rä Ä-ron Kuoth ka̱n, biɛ ŋuaŋ ala luur ŋue̱ŋä nhiamdä, ɣän Kuoth Nhial, ba jɛn bo̱thdu ɛ nɔ.

²⁷ Kä bi kaw dɛ̈ɛ̈l ŋue̱ŋä kuany go̱lä ala duŋ Kuɔth Nhial kɛnɛ ɣäm in la ri̱ŋ kua̱r ŋuɔ̱tni, min ca ŋuaŋ kä ca luuri Kuoth kä ruath dɛ̈ɛ̈l yi̱rä Ä-ron Kuoth kɛnɛ gaatkɛ.

²⁸ Kä ba bo̱th Ä-ron kɛnɛ gaatkɛ amäni cäŋ kɛl kä ji̱ I-thɛ-rɛl kɛ ɣöö ba duŋ bööthni ŋuɔ̱tni mi ba a luɔrkɛ ɛ ji̱ I-thɛ-rɛl kä luuri nyuaakädiɛn, ba luuriɛn kä ɣä.

²⁹ “Bi bieyni Ä-ron tin gɔw tin ɣɛ̈lkɛ rɔ̱ a nyin gankɛ tɔ̱ bi ben kɔɔrɛ tɔ̱, ba kɛ yi̱r thi̱n, kä ba kɛ lëy Kuoth Nhial.

³⁰ Gat in bia bo̱o̱th ŋuɔ̱tni bɛ kɛ ciɛŋ guäthdɛ kɛ ni̱n bärɔw, guäth in la bëë due̱e̱l ro̱mä min bëë nyin Kuɔth Nhial ben la̱t guäth thɛkä.

³¹ “Bi ruath dɛ̈ɛ̈l in la duŋ yi̱rä kua̱r ŋuɔ̱tni Kuɔth ka̱n, kä bi ri̱i̱ŋdɛ thal guäth mi gɔaa mi rɛl rɔ go̱lä.

³² Kä bi Ä-ron kɛnɛ gaatkɛ ri̱ŋ dɛ̈ɛ̈l ɛmɔ cam kɛɛl kɛ juray in te rɛy diëny, thok duëël ro̱mä kɛ Kuoth Nhial.

³³ Bi kɛn kɛ cam kɛn ti̱ti̱ kɛɛl kɛ tin ca luɛl, kɛ ɣöö ba kɛ lɛy kä ba kɛ ka̱m Kuoth Nhial, kä /ci nɛy ti kɔ̱ŋ bi mi̱th thi̱n, kɛ ɣöö kɛ ti rɛl gɔɔydiɛn rɔ.

³⁴ Kä mi wëë tekɛ ri̱ŋ yi̱rädiɛn Kuoth kiɛ juray mi bi duɔth amäni runwaŋ, waŋɛ duɔth ɛmɔ, a /ca cam kɛ ɣöö ɛ duŋ Kuɔth min gɔaa in rɛl rɔɔdɛ.

³⁵ “Bi Ä-ron kɛnɛ gaatkɛ yi̱er Kuoth Nhial, bi la̱t ɛmɔ lät kä kɛ kɛ ni̱n da̱ŋ bärɔw ce̱tkɛ ti diaal ti ci ɣän kɛ la̱r i̱ ni nɔ.

³⁶ Ni ciaŋ bi tuut a loori Kuoth Nhial ala luur dui̱rä kɛ kui̱ kä ɣöö bɛ tekɛ luël kam Kuɔth Nhial kɛ kua̱r ŋuɔ̱tni. Bi luur dui̱rä thöp bä, kɛ kui̱ yi̱kä kɛ ɣöö bɛ tekɛ luël kɛ Kuoth Nhial guäth in lätdi la̱t luël kɛ kui̱dɛ, kä biɛ yi̱r kɛ liɛɛth kɛ ɣöö ba jɛ ley Kuoth Nhial.

³⁷ Bi yi̱k luɛl kɛ ni̱n bärɔw, kä bi jɛ jak kä gɔaa, kä ba mi rɛl rɔ, biɛ jak kä mi gɔaa ɛlɔ̱ŋ mi rɛl rɔ. Niɛ kɛl ɔ bi yi̱k gueer ɔ bɛ jɛ jak kä mi gɔaa mi rɛl rɔ.

Luuri tin waŋkɛ ni ciaŋ

³⁸ “Täämɛ nɛmɛ ɛ jɛn mi bi a luuru kɛ Kuoth Nhial wi̱i̱ yi̱kä, rue̱e̱th de̱e̱t rɔɔmni da̱ŋ rɛw ti guɔ̱ɔ̱r kɛli, biɛ lor kɛ kɛ ciaŋ ciaŋ a wee wä.

³⁹ Bi ruath dɛ̈ɛ̈l a luuri Kuoth Nhial kɛ runwaŋ. Bi rɛwdɛ luɔr kɛ thiaŋdɛ.

⁴⁰ Ruath dɛ̈ɛ̈l in nhiam ba thöp kɛɛl kɛ nup mi tup tup mi te rɛy lirä mi yial mi ca nyɔp kɛɛl kɛ liɛɛth mi nhiackɛ dɛɛni jiɛn kä pe̱kɛ däär lirä, kɛ pi̱ dɛɛni wal (pi̱ thiɛɛŋ) ti pe̱k däär lirä, ala ti ba tiɛth piny.

⁴¹ Kä bi ruath dɛ̈ɛ̈l in dɔ̱ŋ luuri Kuoth Nhial kɛ thiaŋ kɛɛl kɛ nup in lap a luɔɔrkɛ ni Kuoth Nhial amäni mucdɛ in tiɛthkɛ piny, ce̱tkɛ min te luuri ruɔ̱nwaaŋ, kɛ kui̱ ŋuänyä mi kur kur. Ɛ luur maac kä Kuoth Nhial.

⁴² Ba luur mi waŋkɛ kä ri̱ckun diaal thok duëël ro̱mä nhiamdä, ɣän Kuoth Nhial guäth in ba̱a̱ ro̱mä kɛ yɛ kɛ ɣöö ba̱a̱ ruacä kɛ ji̱ thi̱n.

⁴³ Ba̱a̱ ro̱mä kɛ ji̱ I-thɛ-rɛl, kä ba due̱l ro̱mä tany kɛ kui̱dä a ba taŋ taŋ kɛ buaydä.

⁴⁴ Ɣän bä due̱l ro̱mä kɛnɛ yi̱k tany kɛ kui̱dä. Ä-ron bä kɛnɛ gaatkɛ, bä kɛ tany kɛ kui̱dä kɛ ɣöö bikɛ ɣä lät ikä ala kua̱r ŋuɔ̱tni.

⁴⁵ Ɣän ba̱a̱ cieŋä rɛy ji̱ I-thɛ-rɛl, kä ba̱a̱ Kuothdiɛn.

⁴⁶ Kä ba ɣä ŋa̱c ala Kuoth Nhial Kuothdiɛn ëë käm kɛ raar muun I-jëp kɛ ɣöö bä cieŋ rɛydiɛn. Ɛ ɣän Kuoth Nhial Kuothdiɛn.”