Ɣöth 28 - RUAC KUƆTH IN RƐL RƆ

Bieyni kua̱ri palä

¹ “Bi dämuɔɔr ni Ä-ron ma̱t rɔɔdu kɛnɛ gaatkɛ kä bi kɛ koc rɛy ji̱ I-thɛ-rɛl kɛ ɣöö bikɛ lätkä la̱t ala bööth palä, jɛn Ä-ron kɛnɛ gaatkɛ, ni Na-dab, kɛ Ä-bi-ɣu kɛ El-a-dhar kɛnɛ I-ta-mar.

² Kä bi̱i̱ bieyni palä ti gɔw ti ɣɛ̈lkɛ rɔ̱ la̱t kɛ kui̱ dämuɔɔr ni Ä-ron kɛ ɣöö bɛ tekɛ luth kä bɛ waŋ nath riaw kɛ maan bieynikɛ.

³ Kä ruacni kɛ nɛy ti kuɔ̱ɔ̱r ti cä ca̱k pɛl, kɛ ɣöö bikɛ bieyni palä Ä-ron la̱t, tin ba jɛ jak kä göl kɛ kui̱ Kuɔth kɛ ɣöö bɛ ɣä lät kä la̱t ala bo̱o̱th palä.

⁴ Ti̱ti̱ kɛ kɛn bieyni palä tin ba la̱t. Bi̱i̱ kath ran, kɛ bi̱i̱ gɔ̱rä ran, kɛ bi̱i̱ palä mi läw läw mi di̱i̱t, kɛ bi̱i̱ mi ca rël, kɛ kum, kɛ la̱a̱k lɛtdä, bikɛ dämuɔɔr ni Ä-ron kɛnɛ gaatkɛ lät kä bieyni palä kɛ ɣöö bikɛ ɣä lät kä la̱t ala bööth palä.

⁵ Akɛ la̱t kɛ bieyni tɔ̱tɔ̱ kɛ da̱a̱p, kɛnɛ biɛl mi yie̱l, kɛ biɛl mi mɛr, kɛ biɛl mi do̱l, kɛ lath mi ca mɛn kä ca kɛ thi̱n.”

Bi̱i̱ gɔ̱rä ran

⁶ “Kä bikɛ bi̱i̱ gɔ̱rä ran mi tekɛ maan la̱t kɛ da̱a̱p, kɛ biɛl mi yie̱l, kɛ mi mɛr, kɛ mi do̱l, kɛ lath mi ca mɛn agɔaa, kä ca ta̱kdɛ mɛn kɛ la̱t kuurä.

⁷ Bɛ tekɛ te̱t da̱ŋ rɛw wuɔ̱ɔ̱knikɛ ti ba dööp thukni biey da̱ŋ rɛw in te kui̱c i̱ jɔk ɔ, kɛ ɣöö bɛ cua bi̱i̱ kɛl.

⁸ Kä la̱a̱k lɛtdä in yiäkɛ ni jɛ piny ba la̱t ni kɛ jɛn la̱t ɔ, la̱tkɛ jɛ kɛ da̱a̱p, kɛnɛ lath mi yie̱l kɛ mi mɛr, kɛ mi do̱l, kɛ lath mi ca mɛn agɔaa, kä ca ta̱kdɛ mɛn.

⁹ Kä bi guiy da̱ŋ rɛw ti ma̱li ka̱n kä bi ciööt gan I-thɛ-rɛl gɔ̱a̱r jɔkdiɛn.

¹⁰ Bi bäkɛl gɔ̱a̱r guiiyä kɛl, kä bi duɔthkiɛn tin kɔ̱kiɛn gɔ̱a̱r jɔk guiiyä in dɔ̱diɛn, bi kɛ luay guɔ̱ɔ̱ri kɛ pe̱k diëëthdiɛn.

¹¹ Bi ciööt gan I-thɛ-rɛl kɛ̈t jɔk guiiyni da̱ŋ rɛw tɔ̱tɔ̱, ŋatni kɛ thi̱n a gɔ̱ɔ̱ri kɛ ni kɛ kët in la bël mi kuura kɛt ni tiil gɔ̱rä, kä bi kɛ ta̱th kääpni dääpä da̱ŋ rɛw.

¹² Bi kɛn guiy da̱ŋ rɛw tɔ̱tɔ̱ la̱th nhial wuɔ̱ɔ̱kni biey ala nyin ti̱mä kɛ kui̱ gan I-thɛ-rɛl. Bi Ä-ron ciöötkiɛn a nyooth wuɔ̱ɔ̱knikɛ da̱ŋ rɛw nhiamdä, kɛ kui̱ kä ɣöö dëë nɛɛkä la tiɛɛmä ciɛɛŋä.

¹³ Bi kääpni dääpä ɛ tɔ̱ kɛt.

¹⁴ Takɛ kɛ kɛ kuatni dääpä da̱ŋ rɛw ti ca ŋɔn kɛ ŋön deep, kä bi de̱p kuatdä cu gɔan kääpä guiiyä indaan.”

Bi̱i̱ kath

¹⁵ “Täämɛ bi bi̱i̱ kath mi luk naath la̱t ni kuurä, biɛ la̱t ni kɛ la̱t biey gɔ̱rä kɛ da̱a̱p, kɛ biɛl mi yie̱l kɛnɛ mi mɛr, kɛ mi do̱l, kɛ bi̱i̱ mi ca mɛn agɔaa.

¹⁶ Bi bärɛ pa̱a̱r kui̱cnikɛ diaal, kä ba jicdɛ mat kä rɛɛw, kä bi bärɛ a nuth jua̱a̱th tetdä, kä riewdɛ nuth jua̱a̱th tetdä.

¹⁷ Kä bi jɛ moc bëër guiiyni dääpä da̱ŋ ŋuaan. Ber in nhiam biɛ la̱t kɛ guɛɛy mi määl mi tëë maan mi gɔaa, kɛ guɛɛy mi tok, kɛ mi gui̱i̱r.

¹⁸ Kä bi be̱r in rɛwdɛ a guɛɛy mi tɔ̱c, kɛ guɛɛy mi yie̱l, kɛ guɛɛy mi riaw riaw.

¹⁹ Kä bi be̱r in diɔ̱ɔ̱kdiɛn a guɛɛy mi thiäŋ, kɛ guɛɛy mi dɛ̈ɛ̈r kɛnɛ guɛɛy mi yian.

²⁰ Kä bi be̱r in ŋuaandiɛn a guɛɛy mi duäy, kɛ guɛɛy mi ca̱r, kɛ guɛɛy mi tɔ̱c cäärä.

²¹ Kä bɛ tekɛ guiy da̱ŋ wäl rɛw ti luɔtkɛ ni ciööt gan I-thɛ-rɛl, ba kɛ kɛ̈t jɔkdiɛn ce̱tkɛ kuec pa̱a̱m, guɛɛy ɔ kɛ ciöt döör ɔ gua̱thnikiɛn da̱ŋ wäl rɛw.

²² Kä bi bi̱i̱ kath ta̱th kuatni ti ca ŋɔn kɛ ŋön deep kɛ da̱a̱p mi ti̱l ti̱l.

²³ Kä bi tiil da̱ŋ rɛw täth kɛ da̱a̱p kɛ kui̱ biey kath, kä bi tiil da̱ŋ rɛw tɔ̱tɔ̱ la̱th thukni biey kath.

²⁴ Kä bi kuatni dääpä da̱ŋ rɛw tin kɔn cu gɔan tiili da̱ŋ rɛw.

²⁵ Kä bi thuk kuatni tɔ̱tɔ̱ yian kä kääpni guiiyni wuɔ̱ɔ̱kni, bi bi̱i̱ kath cu yian thi̱n nhiam.

²⁶ Ku tiil dääpä da̱ŋ rɛw täth, kä bi kɛ gɔan thukni biey kath da̱ŋ rɛw thok in te rɛc ɔ kä bi̱i̱ gɔ̱rä.

²⁷ Kä täth tiil dääpä da̱ŋ rɛw kɔ̱kiɛn, kä gɔni kɛ piny biey gɔ̱rä nhiam thukni biey gɔ̱rä da̱ŋ rɛw. Ko̱cä yieenä min ca tak ni kuurä ro̱mädiɛn nhial.

²⁸ Bi tiil biey kath gɔan tiili biey gɔ̱rä, ba kɛ yian biey gɔ̱rä kɛ bi̱i̱ mi rɛp rɛp mi yie̱l, kɛ ɣöö /ci bi̱i̱ kath rɔɔdɛ bi pot biey gɔ̱rä.

²⁹ Kä bi Ä-ron ciööt gan I-thɛ-rɛl rɔm kɛ bi̱i̱ kath in luk naath, bɛ kɛ rɔam lɔɔcdɛ guäth in la wee guäth in rɛl gɔɔydɛ rɔ, bɛ kɛ naŋ thi̱n kɛ ɣöö ba kɛ tit ciaŋ nhiamdä.

³⁰ Kä bi̱i̱ U-rim kɛnɛ Tu-mim la̱th rɛy biey kath in luk naath, kä bikɛ te lɔɔy Ä-ron guäth in la wëë rɛc nhiamdä ɣän Kuoth Nhial. Bi Ä-ron luɔ̱ɔ̱k ji̱ I-thɛ-rɛl kap kɛ rɛy lɔaacdɛ ni nɔ nhiamdä a wee wä.”

Bieyni kua̱ri palä ti kɔ̱kiɛn

³¹ “Kä bi bi̱i̱ piɛny mi bäär kɛ kui̱ biey gɔ̱rä kɔc kɛ bi̱i̱ mi biɛl lathdɛ yie̱l ni kɛɛliw.

³² Bɛ tekɛ ɣöŋ kɛ kui̱ wec, kä ba thokdɛ ko̱r kɛ bi̱i̱ mi ciw mi bum bum kɛ ɣöö /cɛ bi rɛ̈t.

³³ Kä bi thok biey piny ɛ köc dhuɔɔr kɛ lath mi yie̱l kɛnɛ lath mi mɛr, kɛ mi do̱l, kä bi giɛɛri ti ca täth kɛ da̱a̱p kɔac ni kamnikiɛn.

³⁴ Bi giɛɛr la̱th, kä bi dhur lath la̱th. Bi kuoluok la̱th, kä bi dhur lath la̱th thok biey piny kɛɛliw inɔ.

³⁵ Kä bi Ä-ron ɛ a kue̱ŋ mi la lätdɛ lätkä ala bo̱o̱th palä, ba jɛ la liɛɛŋkɛ ni ben guäth thɛkä nhiamdä, amäni jiɛndɛ thi̱n kɛ ɣöö /cɛ dëë lɛ li̱w.

³⁶ “Bi gɔ̱rɔ̱k mi pat pat kä puɔth täth kɛ da̱a̱p mi ti̱l ti̱l, bi jɔkdɛ gɔ̱r kɛ gɔ̱a̱r guiiyä mi ca kɛt i̱, ‘Duŋ gɔaa mi rɛl rɔ kä Kuoth Nhial.’

³⁷ Kä biɛ yian kumä wecdɛ kɛ bi̱i̱ mi rɛp rɛp mi yie̱l, a tëë nhiam kuɔ̱m.

³⁸ Kä bɛ te nhiam Ä-ron, kɛ ɣöö ɣän Kuoth Nhial, bä luuri tin tho̱p ji̱ I-thɛ-rɛl kɛ nhɔk cäŋ tëë mi bi rɔ guäc kä tin ca ɣël ɣä ɛ ji̱ I-thɛ-rɛl, bi Ä-ron ɛ ka̱n ala guäcdɛ, bɛ te nhiamdɛ ni ciaŋ, kɛ ɣöö bi Kuoth Nhial kɛ nhɔk.

³⁹ Kä bi̱i̱ bi̱i̱ mi cor tak kɛ lath mi ca mɛn agɔaa, kä ba ta̱kdɛ thi̱n, kä bi̱i̱ bi̱i̱ mi la riɛthkɛ wi̱c tak kɛ lath mi ca mɛn ni gɔaa, kä thiɛnkɛ ta̱kdɛ, kä bi la̱a̱k tak kä biɛɛ ja̱m kɛ liprɔ.

⁴⁰ “Bi bieyni kɛnɛ läk lɛtni kɛ kumni wec la̱t kɛ kui̱ gan Ä-ron, kɛ kui̱ thiɛkä kɛnɛ maan.

⁴¹ Kä bi kɛ la̱th puɔ̱ɔ̱ny dämuɔɔr ni Ä-ron, kɛnɛ gaatkɛ kɛɛl, bi kɛ yi̱r, kä bi kɛ buɔ̱k ɣä. Kä bi ji̱n kɛ tany a gɔw kɛ ɣöö bikɛ tekɛ lua̱ŋ kɛ lätnidä ikä, ala bööth palä.

⁴² Kä bi kɛ ta̱k thuruaali ti kuɔ̱ɔ̱mkɛ lɛtkiɛn bikɛ a guɔ̱t guɔ̱ɔ̱t lɛtnikiɛn bikɛ ben pe̱e̱k wuɔ̱thni ta̱a̱tnikiɛn.

⁴³ Bi Ä-ron kɛ ciɛŋ kɛnɛ gaatkɛ guäth in la wäkɛ kɛmɛkä ro̱mä nath kɛ Kuoth Nhial, kɛnɛ gua̱a̱th in la bäkɛ gekä yi̱kä guäth in rɛl rɔ, gua̱a̱th in bikɛ lät Kuɔth ben la̱t thi̱n, kɛ ɣöö /cikɛ rɔ̱ dëë lɛ yɔ̱a̱c duer mi näk kɛ, kɛ ɣöö ba ŋut mi bit kä jɛ amäni kuaykɛ tin bëë kɔɔrɛ.”