Ɣöth 27 - RUAC KUƆTH IN RƐL RƆ

Yi̱k Kuɔth

¹ “Täämɛ, ji̱n, bi yi̱k la̱t kɛ jiath thëëp. Bi ri̱i̱wnikɛ kui̱cni diaal a jua̱th te̱tni da̱ŋ dhieec. Dhieec kui̱c ɔ kɛ dhieec kui̱c ɔ. Kä bi bärɛ nhial a jua̱th te̱tni da̱ŋ diɔ̱k.

² Biɛ lät kä tuɔ̱ŋ guɔ̱ɔ̱knikɛ da̱ŋ ŋuaan nhial. Ba tuɔ̱ŋkɛ la̱t puɔ̱ɔ̱ny jiaath mi kɛl kɛ yi̱k, kä biɛ rɔth kɛ yieeth in yian.

³ Kä bi̱i̱ thääk ti ba la naŋkɛ ni ŋɛ̈thdɛ täth, kɛ jio̱o̱mnikɛ, kɛ took tin ba kiɛthkɛ riɛm wi̱i̱ yi̱kä, kɛ go̱o̱ni ti ba gɔaankɛ ri̱ŋ, kɛ yio̱mni miim ti ba la tɔa̱a̱wkɛ mim. Nyinkɛ diaal bi kɛ la̱t kɛ ciek in yian.

⁴ Bi duɔ̱ɔ̱r mi ce̱tkɛ cambak tak kɛ kui̱ ŋɛthädɛ kɛ yieeth in yian. Bi guɔ̱ɔ̱k cambakä da̱ŋ ŋuaan moc kɛ ciik yie̱e̱thä mi yian da̱ŋ ŋuaan.

⁵ Kä bi jɛ la̱t piny, thɛɛrä yi̱kä, bi yieeth in ca tak ce̱tkɛ cambak cu te wi̱i̱ yi̱kä a muooci kamdiɛn nuth.

⁶ Kä bi to̱ŋ jiaath thëëp la̱t kɛ kui̱ yi̱kä, rɔth kɛ kɛ ciɛk in yian.

⁷ Kä a to̱ŋ tɔ̱tɔ̱ cuɔtkɛ rɛy ciikni kɛ ɣöö bi to̱ŋ te kui̱cni yi̱kä da̱ŋ rɛw nhial, min kapkɛ jɛ.

⁸ Biɛ la̱t ala thanduk mi ɣööŋ jic. Kä biɛ täth ni kɛ ca̱pdɛ ëë cä nyuɔ̱th ji̱ wi̱i̱ pa̱a̱m.

Kal duëël Kuɔth

⁹ “Bi kal duëël la̱t kɛ bi̱i̱ mi ca tak kɛ lath mi gɔaa kä bärɛ jua̱th te̱tni ti kuɔ̱r kui̱ cuëëc.

¹⁰ Bi ge̱e̱li duëël kui̱c targɛ̈w te kui̱c kɛl. Ba kɛ yian thieeri ti jiɛn da̱ŋ rɛw kɛ kääpni ti jiɛn da̱ŋ rɛw bä ti ca täth kɛ ciɛk in yian kä ba go̱o̱nikiɛn kɛnɛ go̱o̱nikiɛn täth kɛ ciɛk in bo̱r.

¹¹ Ba jɛn inɔ bä kui̱c kayŋua̱a̱k, bi bäriɛn ri̱i̱wädiɛn a jua̱th te̱tni ti kuɔ̱r, kɛn bieyni tin ba ŋap, bi thieerkiɛn a jiɛn rɛw kä bi kääpnikiɛn piny a jiɛn da̱ŋ rɛw ti ba täth kɛ ciɛk in yian. Kä bi go̱o̱ni thieeri kɛnɛ go̱o̱nikiɛn a ciɛk in bo̱r.

¹² Riew kal kui̱c kony cäŋ ba ŋap bieyni ti riewdiɛn jua̱th te̱tni ti jiɛn dhieec kɛ thieer wäl ti tekɛ thär wäl ti ka̱a̱pkɛ ni kɛ piny.

¹³ Riew kal nhiamdɛ kui̱c käny cäŋ ba jua̱th te̱tni ti jiɛn dhieec.

¹⁴ Bi kui̱c thi̱ek kui̱c kɛl tekɛ bieyni ti ŋaap ti bäriɛn ri̱i̱wädiɛn jua̱th te̱tni da̱ŋ wäl dhieec, kɛ thieer da̱ŋ diɔ̱k kɛnɛ kääpni thärikiɛn da̱ŋ diɔ̱k.

¹⁵ Kui̱c thi̱ek kui̱c in dɔ̱ŋ bi bieynikɛ tin ŋaap a jua̱th te̱tni da̱ŋ wäl wi̱cdɛ dhieec kɛ thieerkiɛn da̱ŋ diɔ̱k, kɛ kääpni thärkiɛn da̱ŋ diɔ̱k.

¹⁶ Thok kal ba jɛ moc kɛ bi̱i̱ mi bärɛ jua̱th te̱tni ti jiɛn rɛw, mi ca ja̱m kɛ biɛl mi yie̱l kɛ mi mɛr kɛ mi do̱l kɛ lath mi ca mɛn agɔaa, kä ba jɛ tak kɛ tet ni kuurä. Bɛ tekɛ thieer da̱ŋ ŋuaan, kɛ kääpnikiɛn da̱ŋ ŋuaan.

¹⁷ Thieer diaal tin ca cuuŋ ni kal ba kɛ dööp wi̱i̱diɛn nhial kɛ ciɛk in bo̱r, bi go̱o̱nikiɛn a ciɛk in bo̱r bä, kä bi kääpnikiɛn thärikiɛn a ciɛk in yian.

¹⁸ Bi bär kal a jua̱th te̱tni ti kuɔ̱r. Bi riew a jiɛn dhieec, kä tho̱lɛ kɛ bieyni ti ŋaap ti ca tak kɛ lath mi ca mɛn agɔaa, kɛ kääpni ti ca täth kɛ ciek in yian.

¹⁹ Kɛn kuak la̱t duëël diaal kɛnɛ löckɛ diaal, kɛ löc rɛ̈ɛ̈kdɛ diaal ba kɛ täth kɛ ciek in yian.

Yuɔ̱p lɛmbärä

²⁰ “Jio̱kni ji̱ I-thɛ-rɛl i̱ ba ji̱ nöŋ ni liɛɛth in gɔaa kɛ kui̱ lɛmbärä, kɛ ɣöö bi lɛmbär a pɛt gua̱thni diaal.

²¹ Dueel Kuɔth in la ro̱m naath thi̱n kɛ Kuoth Nhial, kui̱c ge̱e̱lä jɔk ɛ nhiam thandukä, bi Ä-ron kɛnɛ gaatkɛ mac a rialkɛ ikä nhiam Kuɔth Nhial kɛ thiaŋ amäni bak. Ba ŋut mi ba la̱t ɛ ri̱c diaal kä ji̱ I-thɛ-rɛl amäni cäŋ kɛl.”