Ɣöth 24 - RUAC KUƆTH IN RƐL RƆ

Nhök gukä ruac Kuɔth

¹ Täämɛ, cu Kuoth Nhial Muthɛ ku jiök i̱, “Bër kä ɣä, ji̱n yɛnɛ Ä-ron kɛ Na-dab kɛnɛ Ä-bi-ɣu kɛ bööth I-thɛ-rɛl ti jiɛn bärɔw, bia pal nänä.

² Bi ränh ni Muthɛ kärɔaadɛ nhiamdä, kä /ci nɛy tin kɔ̱kiɛn rɔ̱ bi ti̱eec thiäkä. A naath /ci ko̱t wi̱i̱ pa̱a̱m kɛɛl kɛ jɛ.”

³ Cu Muthɛ ben, cuɛ rieet Kuɔth Nhial diaal ben la̱t naath amäni ŋuɔ̱tkɛ diaal. Kä cu nɛy diaal ɛ loc ni kɛɛl kɛ jɔw kɛl, kä cukɛ wee i̱, “Rieet diaal ti ci Kuoth Nhial kɛ lar, bakɔ kɛ la̱t.”

⁴ Cu Muthɛ rieet Kuɔth Nhial diaal gɔ̱r. Kä mëë ruɔ̱ndɛ, cuɛ rɔ jiɛc ni kɛ runwaŋ ɛlɔ̱ŋ. Cuɛ yi̱k täth thaar pa̱a̱m, kä cuɛ pääm da̱ŋ wäl rɛw ti ca ta̱th nhial cuŋ ti luɔtkɛ ni döör I-thɛ-rɛl da̱ŋ wäl wi̱cdɛ rɛw.

⁵ Kä cuɛ ŋuɛ̈tni I-thɛ-rɛl ja̱k kɛ ɣöö bikɛ luuri wäŋä kɛnɛ luuri malä tin la na̱kɛ tin la thääk wä thöp Kuoth Nhial.

⁶ Cu Muthɛ kui̱c riɛm ka̱n, cuɛ jɛ la̱th rɛy thääkni, kä cuɛ kui̱ydɛ min dɔ̱ŋ kiɛth wi̱i̱ yi̱kä.

⁷ Cuɛ warɛgak gukä Kuɔth ka̱n, cuɛ jɛ kuɛn, liŋ naath ɛ, kä cukɛ wee i̱, “Ŋɔak diaal ti ci Kuoth Nhial kɛ lat, bakɔ kɛ la̱t, kä bakɔ liŋ ni min lärɛ kɔ.”

⁸ Kä cu Muthɛ riɛm ka̱n, cuɛ jɛ kiɛth puɔ̱ɔ̱ny nath, cuɛ wee i̱, “Guɛcɛ jɛ, riɛm ɛmɛ ɛ riɛm guk ruac kɛ tëë ci Kuoth Nhial kɛ la̱t kä tɔ̱tɔ̱ kɛ kɛn rieetkɛ.”

⁹ Cu Muthɛ kɛnɛ Ä-ron, kɛ Na-dab, kɛ Ä-bi-ɣu, kɛ bööth I-thɛ-rɛl ti jiɛn bärɔw ben wi̱i̱ pa̱a̱m.

¹⁰ Cukɛ Kuoth I-thɛ-rɛl ben nɛn, a tëë kɛ mi te piny ciöknikɛ mi ca rɔth kä ca nyac kɛ pääm kä ɛ wi̱r wi̱r mi ce̱t jaŋdɛ kɛ pua̱a̱r.

¹¹ Kä /kenɛ tetdɛ kuëŋ pua̱nyni kua̱ri ji̱ I-thɛ-rɛl. Cukɛ jɛ guic, kä cukɛ mi̱th kä mäthkɛ.

Muthɛ wi̱i̱ Pa̱a̱m Thi-nay

¹² Cu Kuoth Nhial Muthɛ jiök i̱, “Bër kä ɣä wi̱i̱ pa̱a̱m. Li̱pni thi̱n, bä ji̱ wä ka̱m pääm ti pat paat, ti te ruac thi̱n kɛnɛ lueek ti cä gɔ̱r kɛ kui̱ rui̱cä nath.”

¹³ Cu Muthɛ kɛnɛ läätdɛ mi cɔal i̱ Jɔ-cua rɔ̱ jiɛc, cu Muthɛ wä wi̱i̱ pa̱a̱m Kuɔth.

¹⁴ Cuɛ di̱t jiök i̱, “Liɛpɛ kɔ wanɛ mi amäni lunyda jɔk, kä nɛ̈nɛ jɛ, Ä-ron kɛn Ɣur te kɛɛl kɛ yɛ ti, ram mi wä tëë kɛ mi latdɛ, a wä kä kɛ.”

¹⁵ Cuɛ wä wi̱i̱ pa̱a̱m kä cu pua̱r päm kum.

¹⁶ Kä cu gɔɔy Kuɔth wi̱c Pa̱a̱m Thi-nay nyuɔ̱ɔ̱r, cu pua̱r ɛ kum kɛ ni̱n bäkɛl. Kä cu Kuoth Muthɛ cɔl rɛy puɔ̱rä kɛ ni̱en in bärɔwdiɛn.

¹⁷ Täämɛ cu buay Kuɔth Nhial ce̱tnikɛ mac mi ci kac nhial wi̱i̱ pa̱a̱m nhiam ji̱ I-thɛ-rɛl.

¹⁸ Cu Muthɛ coth rɛy puɔ̱rä, cuɛ wä wi̱i̱ pa̱a̱m, cuɛ te wi̱i̱ pa̱a̱m kɛ ni̱n ti jiɛn ŋuaan butdɛ kä ninɛ thi̱n.